ରାଞ୍ଚି,୨୭/୦୨: ଝାଡ଼ଖଣ୍ଡରେ କଂଗ୍ରେସକୁ ସୋମବାର ଜୋରଦାର ଝଟ୍କା ଲାଗିଛି । ରାଜ୍ୟରେ କଂଗ୍ରେସର ଏକମାତ୍ର ଲୋକସଭା ସାଂସଦ ଓ ପୂର୍ବତନ ମୁଖ୍ୟମନ୍ତ୍ରୀ ମଧୁ କୋଡ଼ାଙ୍କର ପତ୍ନୀ ଗୀତା କୋଡ଼ା ରବିବାର କଂଗ୍ରେସ ଛାଡି ବିଜେପିରେ ସାମିଲ ହୋଇଛନ୍ତି ।
ରାଜ୍ୟରେ କଂଗ୍ରେସ ପକ୍ଷରୁ କରାଯାଇଥିବା ମେଣ୍ଟ ଯୋଗୁ ବିଗତ କିଛି ଦିନ ହେଲା ସେ ଅସନ୍ତୁଷ୍ଟ ଥିଲେ ବୋଲି କୁହାଯାଉଛି । ରାଞ୍ଚିରେ ବିଜେପିର ଦଳୀୟ ଅଫିସ୍ରେ ପ୍ରଦେଶ ଅଧ୍ୟକ୍ଷ ବାବୁଲାଲ ମାରାଣ୍ଡି ତାଙ୍କୁ ଦଳକୁ ସ୍ୱାଗତ କରିଛନ୍ତି । ବିଜେପିରେ ଯୋଗ ଦେବା ପରେ ଗୀତା କହିଛନ୍ତି, କଂଗ୍ରେସ ନିକଟରେ କୌଣସି ନୀତି, ଚିନ୍ତାଧାରା ନାହିଁ । ଦଳ ଦେଶକୁ ଖାତକୁ ନେଇଯିବାର କାମ କରିଛି । ତୁଷ୍ଟୀକରଣ ରାଜନୀତି କରିଆସୁଛି । କଂଗ୍ରେସ ସମସ୍ତଙ୍କୁ ସାଙ୍ଗରେ ନେଇ ଚାଲିବା କଥା କହିଥାଏ କିନ୍ତୁ ନିଜ ପରିବାରକୁ ସାଙ୍ଗରେ ନେଇ ଚାଲୁଛି । ରାଜନୀତିର ଉଦ୍ଦେଶ୍ୟ ଜନତାଙ୍କ ସେବା କରିବା । ଯେଉଁଠାରେ ଜନତାଙ୍କ ହିତକୁ ଅଣଦେଖା କରାଯାଉଛି ସେଠାରେ ରହିବା ଉଚିତ୍ ନୁହେଁ । ଏବେ ମୁଁ ବିଜେପି ସହ ଜନତାଙ୍କ ସେବା କରିବି । ମୋଦିଜୀଙ୍କ ସ୍ୱପ୍ନର ଭାରତରେ ମୋର ଯାହା ଭୂମିକା ରହିବ ତାକୁ ନିର୍ବାହ କରିବି ।
ସେହିପରି ଗୀତା କୋଡ଼ା ବିଜେପିରେ ମିଶିବା ପରେ ଦଳକୁ ନୂଆ ଶକ୍ତି ମିଳିବ ବୋଲି ବାବୁଲାଲ ମାରାଣ୍ଡି କହିଛନ୍ତି । ଝାଡ଼ଖଣ୍ଡର ୧୪ଟି ଯାକ ଲୋକସଭା ଆସନ ବିଜେପି ଖାତାକୁ ଆସିବ ବୋଲି ସେ ଦୃଢ଼ୋକ୍ତି କରିଛନ୍ତି । ୨୦୦୯ରେ ଦୁର୍ନୀତି ମାମଲାରେ ସ୍ୱାମୀ ମଧୁ କୋଡ଼ା ଜେଲ୍ ଯିବା ପରେ ଗୀତା ରାଜନୀତିରେ ପ୍ରବେଶ କରିଥିଲେ । ୨୦୦୯-୨୦୧୯ ମଧ୍ୟରେ ଦୁଇ ଥର ବିଧାୟକ ହୋଇଥିଲେ । ୨୦୧୯ରେ ସେ ପ୍ରଥମ ଥର ଲାଗି ସିଂହଭୂମ ଲୋକସଭା ଆସନରୁ ସାଂସଦ ଭାବେ ନିର୍ବାଚିତ ହୋଇଥିଲେ ।
