ନୂଆଦିଲ୍ଲୀ ୦୫/୦୯: ଆଇପିଏଲ ପ୍ରତିଷ୍ଠାତା ତଥା ଦିଗଜ ବ୍ୟବସାୟୀ ଲଳିତ ମୋଦୀ। ନିକଟରେ ସୁସ୍ମିତା ସେନ୍ଙ୍କ ସହ ଫଟୋ ଭାଇରାଲ ହେବା କାରଣରୁ ଚର୍ଚ୍ଚାରେ ରହିଥିଲେ। ଲଳିତ -ସୁସ୍ମିତାଙ୍କ ସମ୍ପର୍କକୁ ନେଇ ଖୁବ୍ ଆଲୋଚନା ହୋଇଥିଲା । ଏହା ଉପରେ ଅଭିନେତ୍ରୀ ନୀରବ ରହିଥିଲେ। ବର୍ତ୍ତମାନ ଲଳିତ ପୁଣି ଥରେ ଚର୍ଚ୍ଚାକୁ ଆସିଛନ୍ତି। ଏଥର କିନ୍ତୁ ସୁସ୍ମିତାଙ୍କ ପାଇଁ ନୁହେଁ, ବରଂ ସୁପରମଡେଲ ଉଜ୍ୱଳା ରାଉତଙ୍କ ସହ ଭାଇରାଲ୍ ହୋଇଥିବା ଫଟୋ ଯୋଗୁଁ।
ପ୍ରଖ୍ୟାତ ଓକିଲ ତଥା ସଲିସିଟର ଜେନେରାଲ୍ ଅଫ୍ ଇଣ୍ଡିଆ ହରିଶ ସାଲଭେ ଲଣ୍ଡନରେ ତୃତୀୟ ଥର ପାଇଁ ବିବାହ କରିଛନ୍ତି। ସାଲଭେ ଏବଂ ତାଙ୍କ ପତ୍ନୀ ବ୍ରିଟିଶ କ୍ୟାପିଟାଲରେ ଏକ ରିସେପ୍ସନ୍ ପାର୍ଟି ଆୟୋଜନ କରିଥିଲେ । ଯେଉଁଥିରେ ବହୁ ଅଗ୍ରଣୀ ଭାରତୀୟ ବ୍ୟବସାୟୀ ମଧ୍ୟ ଉପସ୍ଥିତ ଥିଲେ। ଏହି ଅତିଥିମାନଙ୍କ ମଧ୍ୟରେ ଲଳିତ ମୋଦୀଙ୍କୁ ମଧ୍ୟ ଦେଖିବାକୁ ମିଳିଥିଲା। ଭାଇରାଲ୍ ହୋଇଥିବା ଫଟୋରେ ଲଳିତଙ୍କୁ ୯୦ ଦଶକର ସୁପରମଡେଲ ଉଜ୍ୱଳା ରାଉତଙ୍କ ସହ ଦେଖିବାକୁ ମିଳିଛି। ଯାହାପରେ ଲଳିତ ଉଜ୍ୱଳାଙ୍କୁ ଡେଟ୍ କରୁଥିବା ଆଲୋଚନା ହେଉଛି।
ଅନେକ ଗଣମାଧ୍ୟମ ରିପୋର୍ଟରେ ଉଜ୍ୱଳାଙ୍କୁ ଲଳିତ ମୋଦୀଙ୍କ ଗର୍ଲଫ୍ରେଣ୍ଡ ଭାବେ ଉଲ୍ଲେଖ କରାଯାଇଛି। ଗୋଟିଏ ଫଟୋରେ ଲଳିତ କଳା ସୁଟ ପିନ୍ଧି ଉଜୱାଳାଙ୍କ ସହ ସିଡ଼ିରେ ପୋଜ୍ ଦେଉଥିବା ନଜର ଆସିଛନ୍ତି। ରିସେପ୍ସନର ଏହି ଫଟୋଗୁଡ଼ିକରେ, ଉଜ୍ୱଳା ଲାଭେଣ୍ଡର ରଙ୍ଗର ଗାଉନ୍ ପିନ୍ଧିଥିବାର ଏବଂ ଉଭୟ ହସୁଥିବାର ନଜର ଆସିଛନ୍ତି । ତେବେ ଏପର୍ଯ୍ୟନ୍ତ ଉଜ୍ୱଳା କିମ୍ବା ଲଳିତଙ୍କ ଠାରୁ କୌଣସି ନିଶ୍ଚିତକରଣ ଆସିନାହିଁ।
