ମୁମ୍ବାଇ, ୦୨/୧୨: ସମୁଦ୍ର ମଝିରେ ନିଆଁ ଲାଗିଛି । ହୁତୁହୁତୁ ହୋଇ ଜଳୁଛି ବିଳାସପୂର୍ଣ୍ଣ ବୋଟ୍ । ଶନିବାର ଅପରାହ୍ଣରେ ମୁମ୍ବାଇ ନିକଟ ମଦୱା ଆଲିବାଗରେ ଏହି ଦୃଶ୍ୟ ଦେଖିବାକୁ ମିଳିଛି । ମଝି ସମୁଦ୍ରରେ ନିଆଁ ଲାଗିଥିବାରୁ ଲିଭାଇବା ସମ୍ଭବ ପର ହୋଇ ନାହିଁ । ସମୁଦ୍ର ମଝିରେ ବୋଟରେ ନିଆଁ ଲାଗିବା ପରେ ଆକାଶ ଧୂଆଁମୟ ହୋଇ ଯାଇଛି । ଯାହାର ଫଟୋ ଓ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେଉଛି ।

ବୋଟରେ ନିଆଁ ଲାଗିବା ନେଇ ମଣ୍ଡୱା ପୋର୍ଟର ଇନ୍ସପେକ୍ଟର ଆଶିଷ ମେହେର କହିଛନ୍ତି, ଅଗ୍ନିକାଣ୍ଡ ବେଳେ ବୋଟରେ ୨ ଜଣ ଥିଲେ । ସେମାନେ ଅଗ୍ନିକାଣ୍ଡରେ ଆହତ ହୋଇଛନ୍ତି । ନିଆଁ ଲାଗିବା ପରେ ଦମକଳ ବାହିନୀକୁ ଡକା ଯାଇଥିଲା, ତେବେ ବୋଟଟି ମଝି ସମୁଦ୍ରରେ ଥିବାରୁ ଏହା ଫଳପ୍ରଦ ହୋଇ ନଥିଲା । ବୋଟରେ ଅଧିକ ପରିମାଣର ତୈଳ ଥିବାରୁ ଦୀର୍ଘ ସମୟ ପର୍ଯ୍ୟନ୍ତ ଜଳି ଚାଲିଥିବା ସେ କହିଛନ୍ତି ।

ତେବେ କେଉଁ କାରଣରୁ, କିଭଳି ପରିସ୍ଥିତିରେ ବୋଟରେ ନିଆଁ ଲାଗିଲା । ତାହା ସ୍ପଷ୍ଟ ହୋଇ ନାହିଁ । ନିଆଁ ଲାଗିଥିବା ବୋଟର ଲମ୍ବ ୩୩ ଫୁଟ୍ ହୋଇଥିବା ବେଳେ ଏଥିରେ ଗୋଟିଏ ସମୟରେ ୮ରୁ ୧୦ ଜଣ ବସି ପାରିବେ । ଅଗ୍ନିକାଣ୍ଡ ସମୟରେ ବୋଟରେ ୨ ଜଣ କ୍ରିଉ ମେମ୍ବର ଥିଲେ ବୋଲି କମ୍ପାନୀ ପକ୍ଷରୁ କୁହାଯାଇଛି ।

ତେବେ ଅଗ୍ନିକାଣ୍ଡ ସମୟରେ ବୋଟର ଇଞ୍ଜିନ୍ ବନ୍ଦ ରହିଥିଲା । ତଥାପି କିଭଳି ବୋଟରେ ନିଆଁ ଲାଗିଲା ତାହା ଜଣା ନାହିଁ ବୋଲି କହିଛନ୍ତି ପିଏଲସି କମ୍ପାନୀର ପରିଚାଳନା ନିର୍ଦ୍ଦେଶକ ଅଞ୍ଜୁ ଦତ୍ତ ।