କୋକସରା, ୨୫।୨: କଳାହାଣ୍ଡି ଜିଲ୍ଲା କୋକସରା ବ୍ଲକ ମହିମା ପଞ୍ଚାୟତ ଡେଙ୍ଗାଗୁଡ଼ାଠାରେ ମା’ ଫେଣ୍ଡ୍ରାଣୀ ଦେବୀଙ୍କ ମାଘ ମଣ୍ଡେଇ ଯାତ୍ରା ଅନୁଷ୍ଠିତ ହୋଇଯାଇଛି । ୨ ଦିନ ଧରି ମହାଆଡମ୍ବରରେ ଚାଲିଥିଲା ଯାତ୍ରା । ଗ୍ରାମବାସୀଙ୍କ ବିଶ୍ୱାସ ରହିଛି ସୁଖଦୁଃଖରେ ଡାକ ଦେଲେ ସାହା ହୁଅନ୍ତି ମା’ ଫେଣ୍ଡ୍ରାଣୀ । ତେଣୁ ଦେବୀଙ୍କ ପ୍ରତି ରହିଛି ଅଗାଢ଼ ବିଶ୍ୱାସ । ମାଘ ମାସର ପ୍ରଥମ ସପ୍ତାହରେ ଦେବୀଙ୍କ ମାଘ ମଣ୍ଡେଇ ଯାତ୍ରା ପାଳନ ହେଉଥିବା ବେଳେ ଚଳିତ ବର୍ଷ ଏହି ଯାତ୍ରାରେ ପ୍ରବଳ ଜନଗହଳି ଦେଖିବାକୁ ମିଳିଥିଲା । ଦୁଇ ଦିନ ଧରି ପାଳିତ ହେଉଥିବା ଏହି ମଣ୍ଡେଇ ଯାତ୍ରାର ନିଆଁରା ପରମ୍ପରା ରହିଛି । 

ଏହି ଯାତ୍ରା ପରିଶେଷରେ ଦେବାଦେବୀମାନେ ଭକ୍ତଙ୍କ ଗୁହାରି ଶୁଣାଣି କରିବାକୁ ଏକ କଚେରିର ଅନୁଷ୍ଠାନ ହୋଇଥାଏ । ଯେଉଁଠି ଶହ ଶହ ଶ୍ରଦ୍ଧାଳୁ ଓ ମାନସିକଧାରୀ ଭକ୍ତ ଦେବାଦେବୀଙ୍କ ଶରଣାପନ୍ନ ହୋଇ ଆଶିଷ ଭିକ୍ଷା କରିଥାନ୍ତି ଓ ମନସ୍କାମନା ପୂର୍ଣ୍ଣ ହେଲେ ମାନସିକ ଅର୍ପଣ କରିଥାନ୍ତି । ସ୍ଥାନୀୟ ଲୋକଙ୍କ କହିବାନୁସାର, ମା ଫେଣ୍ଡ୍ରାଣୀ ଦେବୀଙ୍କୁ ୧୯୭୧ ମସିହାରେ ଡେଙ୍ଗାଗୁଡ଼ା ଗ୍ରାମର ମାୟାଧର ନାଏକ। ଦେବୀଙ୍କୁ ନବରଙ୍ଗପୁର ଜିଲ୍ଲା ଉମରକୋଟ ଅଞ୍ଚଳରୁ ଆଣି ଡେଙ୍ଗାଗୁଡ଼ା ଗ୍ରାମରେ ସ୍ଥାପନ କରିଥିଲେ ଓ ସେହି ଦିନଠାରୁ ମା’ ଫେଣ୍ଡ୍ରାଣୀ ଦେବୀ ଡେଙ୍ଗାଗୁଡ଼ା ଗ୍ରାମରେ ପୂଜା ପାଇ ଆସୁଛନ୍ତି । ୨ ଦିନ ଧରି ଅନୁଷ୍ଠିତ ମା’ ଫେଣ୍ଡ୍ରାଣୀ ଦେବୀଙ୍କ ମାଘ ମଣ୍ଡେଇ ଯାତ୍ରାକୁ ଡେଙ୍ଗାଗୁଡ଼ା ଅଞ୍ଚଳବାସୀମାନେ ଉପସ୍ଥିତ ରହି ପରିଚାଳନାରେ ସହଯୋଗ କରିଥିଲେ ।