ଗୁଣପୁର,୦୪/୧୨: ସାଥୀଟିଏ ପାଇବା ଆଶାରେ ମହାରାଷ୍ଟ୍ରରୁ ଛୁଟି ଆସିଲା ଓଡ଼ିଶା । ଏବେ ସୁଦ୍ଧା ୩୦୦୦ କିଲୋମିଟର ବାଟ ବୁଲି ସାରିଲାଣି । ହେଲେ ସାଥୀଟିଏ ମିଳୁନି । ପାଗଳ ପ୍ରାୟ ହୋଇଗଲାଣି ମହାରାଷ୍ଟ୍ରର ମହାବଳ । କେବେ ଗଜପତିରୁ ରାୟଗଡ଼ା ଚାଲିଯାଉଛି ତ ପୁଣି କେବେ ଓଡ଼ିଶା ସୀମାନ୍ତ ଆଉ କନ୍ଧମାଳ ଘୂରି ବୁଲୁଛି । ସାଥୀକୁ ଖୋଜିଖୋଜି ନୟାନ୍ତ ହୋଇପଡ଼ିଲାଣି ଏହି ମହାବଳ ।
ମହାରାଷ୍ଟ୍ରରୁ ୪ ରାଜ୍ୟ ପାର୍ କରି ଓଡ଼ିଶାରେ ପହଞ୍ଚିଛି ମହାବଳ । ୪ ମାସ ହେଲା ଏଠାରେ ଚହଳ ସୃଷ୍ଟି କରିଛି । ସାଥୀ ବାଘୁଣୀଟିଏ ନପାଇ ଏବେ ବାଟବଣା ହୋଇପଡ଼ିଛି । ପଛକୁ ଫେରିପାରୁଛି ନା’ ଆଗକୁ ଯାଉଛି । ନିଜପାଇଁ ସୁରକ୍ଷିତ ଜଙ୍ଗଲ ମଧ୍ୟ ପାଇପାରୁନି । ବିପଦ ଆଶଙ୍କା କରି ପ୍ରତିଦିନ ସ୍ଥାନ ବଦଳାଉଛି । ଯେଉଁଠି ଯାହା ପାଇଲା ଖାଉଛି । ଅଥଚ କୌଣସି ସ୍ଥାନରେ ମଣିଷ ସହ ମୁହାଁମୁହିଁ ହେବାର ସାହାସ ଜୁଟାଇନି । କେବଳ ଗୋରୁଗାଈ ଶିକାରରେ ସୀମିତ ରହିଛି । ଏମିତିରେ ସବୁଦିନେ ନୂଆ ଜିଲ୍ଲା ଓ ନୂଆ ବନଖଣ୍ଡର ସଂରକ୍ଷିତ ଜଙ୍ଗଲ ଘୂରିବୁଲି ନୟାନ୍ତ ହୋଇପଡ଼ିଛି ।
ଏପଟେ ବାଘର ପିଛା କରି ବନ କର୍ମଚାରୀ ମଧ୍ୟ ନାକେଦମ୍ । ଗଞ୍ଜାମରୁ ଗଜପତି, ରାୟଗଡ଼ାରୁ କନ୍ଧମାଳ ଓ କଳାହାଣ୍ଡି ସବୁଠି ଏହି ବାଘ ଆତଙ୍କ । ୫ଟି ଜିଲ୍ଲାର ଏକାଧିକ ବନଖଣ୍ଡ ଘୂରି ବୁଲିବା ମଧ୍ୟରେ ବନ ବିଭାଗ ପିଛା କରୁଥିବା ଜାଣି ନିଜକୁ ଅସୁରକ୍ଷିତ ମଣୁଛି । ତେଣୁ ପ୍ରତିଦିନ ସ୍ଥାନ ବଦଳାଉଥିବା ବନ କର୍ମଚାରୀମାନେ କହିଛନ୍ତି । ଗତ ଶନିବାର ରାତିରେ ଗଜପତି ଜିଲ୍ଲାରୁ ଆସି ଗୁଣପୁର ବନଖଣ୍ଡ, ଗୁଡ଼ାରୀ ବନଖଣ୍ଡ ହୋଇ ମୁନିଗୁଡ଼ା ବନଖଣ୍ଡର ଚନ୍ଦ୍ରପୁର, ଡାଙ୍ଗଶାରଡ଼ା, ତେଲେଙ୍ଗାପଦର ଆଦି ଅଞ୍ଚଳ ଘୂରି ବୁଲିବା ପରେ ଦହିଖାଲ ପଟକୁ ଯାଇଥିଲା ମହାବଳ । କନ୍ଧମାଳ ପଟକୁ ଯିବ କି କଳାହାଣ୍ଡି ପଟକୁ ବନ ବିଭାଗ କୌଣସି ନିସ୍କର୍ଷରେ ପହଞ୍ଚି ପାରିନଥିଲା । ଗତକାଲି ତାଇମାଗୁଡ଼ି ପାହାଡ଼ରେ ବିଶ୍ରାମ ନେବା ପରେ ଆଜି ଭୋର୍ରୁ ହୁମାଗୁଞ୍ଜି ଗାଁରେ ପହଞ୍ଚିଥିଲା । ଗୋଟିଏ ଗାଈକୁ ଶିକାର କରିବାକୁ ଚେଷ୍ଟା କରିଥିଲା । ଗାଁ ଲୋକ ଦେଖି ତାକୁ ଘଉଡ଼ାଇଥିଲେ ।
କେତେକ ବନ କର୍ମଚାରୀ କହିଛନ୍ତି, ମହାବଳ ଖାଦ୍ୟ, ସୁରକ୍ଷିତ ବାସସ୍ଥାନ ଖୋଜିବା ସହ ମନଲାଖି ବାଘୁଣୀ ପାଇଁ ଏଠାକୁ ଆସିଛି । ଅଥଚ ଏଠାରେ ବାଘୁଣୀ ନାହିଁ । ଏବେ ଓଡ଼ିଶାର ଶିମିଳିପାଳ ଅଭୟାରଣ୍ୟ ଛଡ଼ା ଅନ୍ୟ କୌଣସି ସ୍ଥାନରେ ମହାବଳ ନାହାଁନ୍ତି । ତେଣୁ ସାଥୀ ବାଘୁଣୀ ମିଳିବା ମୁସ୍କିଲ୍ । ସାଥୀଟିଏ ମିଳିବା ଯାଏଁ ସେ ଏମିତି ଏଣେତେଣେ ବୁଲିବ । କୋଟଗଡ଼ ଅଭୟାରଣ୍ୟକୁ ଗଲେ ଖାଦ୍ୟ ପାଇବ କିନ୍ତୁ ସାଥୀ ପାଇବନି । କଳାହାଣ୍ଡି ଜିଲ୍ଲାର ନର୍ଲା ଦେଇ ନୂଆପଡ଼ାର ଖଡ଼ିଆଳ ନିକଟସ୍ଥ ଶୀତାନଦୀ ପାର୍ କଲେ ଛତିଶଗଡ଼ ସୀମାନ୍ତ ଟାଇଗର କରିଡ଼ରରେ ପହଞ୍ଚିବ । ସେଠାରେ ବାଘୁଣୀ ସାଥୀ ପାଇବା ମଧ୍ୟ ସମ୍ଭବ ନୁହଁ । ତେଣୁ ବାଘ ଏମିତି ହିଁ ଘୂରି ବୁଲିବ ।