ନୂଆଦିଲ୍ଲୀ, ୨୯/୧୧: ଉତ୍ତର-ପୂର୍ବ ରାଜ୍ୟ ମଣିପୁରକୁ ବଡ଼ ଆଶ୍ୱସ୍ତି । ମଣିପୁରରେ ଶାନ୍ତି ପ୍ରତିଷ୍ଠା ପାଇଁ ରାଜ୍ୟ ଓ କେନ୍ଦ୍ର ସରକାର କରୁଥିବା ପ୍ରୟାସରେ ବଡ଼ ସଫଳତା ମିଳିଛି । ମଣିପୁରର ସବୁଠୁ ପୁରୁଣା ବିଦ୍ରୋହୀ ଗୋଷ୍ଠୀ ୟୁନାଇଟେଡ୍ ନ୍ୟାସନାଲ୍ ଲିବରେସନ୍ ଫ୍ରଣ୍ଟ (UNLF) ବୁଧବାର ସ୍ଥାୟୀ ଶାନ୍ତି ବୁଝାମଣାରେ ମୋହର ମାରିଛି ।
ଏନେଇ ସୋସିଆଲ୍ ମିଡିଆରେ ପୋଷ୍ଟ କରି ସୂଚନା ଦେଇଛନ୍ତି କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ । ଦୀର୍ଘ ଦିନରୁ ସରକାର ମଣିପୁରରେ ଶାନ୍ତି ପ୍ରତିଷ୍ଠା ନେଇ ଏହି ବିଦ୍ରୋହୀ ସମୁହ ସହ ଆଲୋଚନା ଜାରି ରଖିଥିବା ବେଳେ ସଫଳତା ମିଳିଛି ।
‘ଆମ ପାଖରେ ୩ ଜିଲ୍ଲା, ୧୦ ବିଧାୟକ, ଗଢ଼ିବୁ ଅଲଗା ସରକାର’ କେନ୍ଦ୍ର ସରକାରଙ୍କୁ କୁକି ସମ୍ପ୍ରଦାୟର ଅଲ୍ଟିମେଟମ୍
ସୋସିଆଲ୍ ମିଡିଆରେ ସୂଚନା ଦେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଲେଖିଛନ୍ତି, ‘ଏକ ଐତିହାସିକ ଉପଲବ୍ଧି ମିଳିଛି । ପୂର୍ବତ୍ତୋର ରାଜ୍ୟରେ ଶାନ୍ତି ପ୍ରତିଷ୍ଠା ପ୍ରୟାସରେ ଯୋଡ଼ି ହୋଇଛି ନୂଆ ଅଧ୍ୟାୟ । ଆଜି ନୂଆଦିଲ୍ଲୀରେ ଶାନ୍ତି ଚୁକ୍ତିରେ ହସ୍ତାକ୍ଷର କରିଛି ୟୁଏନ୍ଏଲ୍ଏଫ୍ । ମଣିପୁର ଘାଟିର ସବୁଠୁ ପୁରୁଣା ଉଗ୍ରବାଦୀ ୟୁଏନ୍ଏଲ୍ଏଫ୍ ହିଂସା ଛାଡ଼ି ସମାଜର ମୁଖ୍ୟତ୍ସୋତରେ ସାମିଲ୍ ହେବା ଲାଗି ସହମତ ହୋଇଛନ୍ତି । ମୁଁ ଗଣତାନ୍ତ୍ରିକ ବ୍ୟବସ୍ଥାକୁ ସେମାନଙ୍କୁ ସ୍ୱାଗତ କରୁଛି । ଶାନ୍ତି ଓ ପ୍ରଗତିରେ ରାସ୍ତାରେ ଯାତ୍ରା ପାଇଁ ଶୁଭକାମନା ଜଣାଉଛି ।’
ନିକଟରେ ମଣିପୁର ମୁଖ୍ୟମନ୍ତ୍ରୀ ଏନ୍. ବୀରେନ୍ ସିଂହ କହିଥିଲେ, ୟୁଏନ୍ଏଲ୍ଏଫ୍ ସହ ଆଲୋଚନା ଚାଲିଛି । ମଣିପୁରର ବିଦ୍ରୋହୀ ଗୋଷ୍ଠୀ ୟୁଏନ୍ଏଲ୍ଏଫ୍ ବିଗତ ୬ ଦଶନ୍ଧି ଧରି ଭ୍ୟାଲିରେ ଭାରତୀୟ ସେନା ସହ ଲଢ଼ି ଆସୁଥିଲା । ଗରିଲା ଯୁଦ୍ଧ ଭଳି ଲଢ଼ୁଥିଲା ୟୁଏନ୍ଏଲ୍ଏଫ୍ ।
ଇମ୍ଫାଲରେ ପୁଣି ସ୍ଥିତି ଅଣାୟତ୍ତ, କର୍ଫ୍ୟୁ ଲଗାଇଲା ପ୍ରଶାସନ
ମେ ୩ରୁ ବ୍ୟାପିଥିଲା ହିଂସା
ମୈତେଇ ସମ୍ପ୍ରଦାୟକୁ ଆଦିବାସୀ ମାନ୍ୟତା ଦାବି କରି ମଣିପୁରରେ ମେ ୩ରୁ ହିଂସା ଆରମ୍ଭ ହୋଇଥିଲା । ଆଦିବାସୀ ଏକଜୁଟତା ମାର୍ଚ୍ଚ ପରେ ହିଂସା ବ୍ୟାପିଥିଲା । ଉକ୍ତ ହିଂସାରେ ୧୮୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା । ମଣିପୁରର ମୋଟ ଜନସଂଖ୍ୟାର ୫୩ ପ୍ରତିଶତ ହେଉଛନ୍ତି ମୈତେଇ । ଯେଉଁମାନଙ୍କ ମଧ୍ୟରୁ ଅଧିକାଂଶ ଘାଟିରେ ରୁହନ୍ତି । ଯେତେବେଳେ କି ଆଦିବାସୀ (ନାଗା ଓ କୁକି)ଙ୍କ ଜନସଂଖ୍ୟା ୪୦ ପ୍ରତିଶତ ହୋଇଥିବା ବେଳେ ସେମାନେ ମୁଖ୍ୟତଃ ପାହାଡ଼ିଆ ଅଞ୍ଚଳରେ ରହିଥାନ୍ତି ।