ମୁମ୍ବାଇ ୧୮/୧୧: ୭୨ତମ ବ୍ରହ୍ମାଣ୍ଡ ସୁନ୍ଦରୀ ପ୍ରତିଯୋଗିତାରେ ଭାରତକୁ ପ୍ରତିନିଧିତ୍ୱ କରିବେ ଶ୍ୱେତା ଶାରଦା । ଚଣ୍ଡିଗଡ଼ ଜନ୍ମିତ ଏହି ମଡେଲ ମିସ୍‌ ଡିଭା ୟୁନିଭର୍ସ  ମୁକୁଟ ପିନ୍ଧିବା ପରେ ଆସନ୍ତା ୧୯ ତାରିଖରେ ଏଲ ସାଲଭାଡୋରରେ  ଅନୁଷ୍ଠିତ ହେବାକୁ ଯାଉଥିବା ବ୍ରହ୍ମାଣ୍ଡ ସୁନ୍ଦରୀ ପ୍ରତିଯୋଗିତାରେ ଭାଗ  ନେବେ । 

ଗତ ବର୍ଷ ମୁମ୍ବାଇଠାରେ ୧୫ ପ୍ରତିଯୋଗୀଙ୍କ ମଧ୍ୟରେ ହୋଇଥିବା  କଡ଼ା ପ୍ରତିଯୋଗିତାରେ ଭାଗ ନେଇ ଶ୍ୱେତା ସମ୍ମାନାସ୍ପଦ ମିସ୍‌ ଡିଭା  ୟୁନିଭର୍ସ ଟାଇଟଲ ହାସଲ କରିଥିଲେ । ପୂର୍ବ ବର୍ଷର ଏହି ଟାଇଟଲ୍‌ ବିଜୟିନୀ ଦିବିତା ରାଏଙ୍କ ହାତରୁ ସେ ମୁକୁଟ ପିନ୍ଧିଥିଲେ। ମିସ୍‌ ଡିଭା ହେଉଛି ଫେମିନା ମିସ୍‌ ଇଣ୍ଡିଆ ଗ୍ରୁପ୍‌ର ଅଂଶ । ବ୍ରହ୍ମାଣ୍ଡ  ସୁନ୍ଦରୀ ପ୍ରତିଯୋଗିତା ପାଇଁ ଭାରତୀୟ ପ୍ରତିନିଧିଙ୍କୁ  ଚୟନ କରିବାରେ ଏହା ଗୁରୁତ୍ୱପୂର୍ଣ୍ଣ ଭୂମିକା  ନିର୍ବାହ କରେ । ଏକ ଗଣମାଧ୍ୟମ ସହ  ବାର୍ତ୍ତାଳାପରେ ଶ୍ୱେତା କହିଛନ୍ତି,  ଭାରତକୁ ପ୍ରତିନିଧିତ୍ୱ କରିବା ପାଇଁ  ଭାରତର ପ୍ରତ୍ୟେକ ଝିଅ ଏହି ମୁକୁଟ  ହାସଲ କରିବାକୁ ସ୍ୱପ୍ନ ଦେଖନ୍ତି । 

 ଅନ୍ତର୍ଜାତୀୟ ମଞ୍ଚରେ ନିଜ ଦେଶକୁ  ପ୍ରତିନିଧିତ୍ୱ କରିବା ଜୀବନର ଏକ  ବଡ଼ ଉପଲବ୍ଧି । ଏହି ସୁଯୋଗ  ପାଇଥିବାରୁ ମୁଁ ଭାଗ୍ୟଶାଳୀ ଓ  କୃତଜ୍ଞ ମନେକରୁଛି । ବ୍ରହ୍ମାଣ୍ଡ ସୁନ୍ଦରୀ  ମୁକୁଟ ଦେଶକୁ ଆଣିବା ପାଇଁ ମୁଁ  ମୋର ଶ୍ରେଷ୍ଠ ଦେବି ।’ ମଡେଲିଂରେ କ୍ୟାରିଅର୍‌ କରିବା ପାଇଁ ଶ୍ୱେତା ୧୬ ବର୍ଷ ବୟସରେ ମା’ଙ୍କ  ସହ ମୁମ୍ବାଇ ଆସିଥିଲେ ।  ଇନ୍ଦିରା ଗାନ୍ଧି ନ୍ୟାସନାଲ ଓପନ୍‌  ୟୁନିଭର୍ସିଟିରୁ ସେ ସ୍ନାତକ ଡିଗ୍ରୀ  ହାସଲ କରିଛନ୍ତି । 

ଗତ ଅଗଷ୍ଟ  ୨୭ ତାରିଖରେ ଅନୁଷ୍ଠିତ ମିସ୍‌  ଡିଭା ପ୍ରତିଯୋଗିତାରେ ସେ ମିସ୍‌  ଡିଭା-୨୦୨୩ ଟାଇଟଲ ଜିତିଥିଲେ ।  ‘ଡ୍ୟାନ୍ସ ଇଣ୍ଡିଆ ଡ୍ୟାନ୍ସ’, ‘ଡ୍ୟାନ୍ସ  ଦିୱାନେ’ ଓ ‘ଡ୍ୟାନ୍ସ ପ୍ଲସ୍‌’ ଭଳି  ଅନେକ ରିୟଲିଟି ଶୋ’ରେ  ସେ ନଜର ଆସିଥିଲେ ।  ‘ଝଲକ୍‌ ଦିଖ୍‌ଲା ଜା’ରେ  ସେ କୋରିଓଗ୍ରାଫର୍‌  ମଧ୍ୟ ଥିଲେ ।