ମୁମ୍ବାଇ: ବିଶ୍ପକପର ସେମି ଫାଇନାଲ ମୁକାବିଲାରେ ଭାରତୀୟ ବ୍ୟାଟରଙ୍କ ପରେ ବୋଲିଂରେ ମହମ୍ମଦ ସାମି କମାଲ କରିଛନ୍ତି । ନ୍ୟୁଜିଲାଣ୍ଡକୁ ଚେକ୍ ଦେବାରେ ପ୍ରମୁଖ ଭୂମିକା ନେଇଥିବା ସାମି ବିଶାଳ ରେକର୍ଡର ଅଧିକାରୀ ହୋଇଛନ୍ତି । ସାମି ବିଶ୍ବକପ ଇତିହାସରେ ସବୁଠୁ କମ ବଲରେ ୫୦ ଓ୍ବିକେଟ ନେଇଥିବା ବୋଲର ତାଲିକାରେ ଶୀର୍ଷରେ ରହିଛନ୍ତି । ସେ ୭୯୫ ବଲରେ ଏହି ରେକର୍ଡ କରିଥିବା ବେଳେ ଅଷ୍ଟ୍ରେଲିଆର ମିଚେଲ ଷ୍ଟାର୍କଙ୍କୁ ପଛରେ ପକାଇ ଦେଇଛନ୍ତି । ମିଚେଲ ଷ୍ଟାର୍କ ୯୪୧ ବଲରେ ଏହି କୀର୍ତ୍ତିମାନ ସ୍ଥାପନ କରିଥିଲେ ।
ଅନ୍ୟପଟେ ପ୍ରଥମ ଭାରତୀୟ ବୋଲର ଭାବେ ସାମି ବିଶ୍ବକପରେ ୫୦ ଓ୍ବିକେଟ ଅକ୍ତିଆର କରିବାରେ ରେକର୍ଡ କରିଛନ୍ତି । ବିଶ୍ବସ୍ତରରେ ଗ୍ଲେନ୍ ମ୍ୟାଗାର୍ଥ, ମୁଥିଆ ମୂରଲୀଧରନ, ଷ୍ଟାର୍କ, ଲସିଥ ମାଲିଙ୍ଗା, ଓ୍ବାସିମ ଆକ୍ରମ ଏବଂ ଟ୍ରେଣ୍ଟ ବୋଲ୍ଟ ପରେ ସପ୍ତମ ବୋଲର ଭାବେ ଏହି ରେକର୍ଡ କରିଛନ୍ତି । ଏହା ପୂର୍ବରୁ ୪୪ଟି ଓ୍ବିକେଟ ନେବା ସହ ଭାରତର ଜାହିର ଖାନ ଏବଂ ଶ୍ରୀନାଥଙ୍କୁ ଟପିଯାଇଥିଲେ । ତେବେ ଆଜିର ମ୍ୟାଚ୍ରେ କେନ୍ ଓ୍ବିଲିୟମସନଙ୍କ ଓ୍ବିକେଟ ନେବା ସହ ସେ ୫୦ ଓ୍ବିକେଟ ଟେକର ଲିଷ୍ଟରେ ସାମିଲ ହୋଇଛନ୍ତି ।
ସବୁଠୁ କମ ବଲରେ ସାମି ୫୦ ଓ୍ବିକେଟ ନେଇ ବିଶ୍ବ ରେକର୍ଡ କରିଛନ୍ତି । ମହମ୍ମଦ ସାମି ୩ଟି ବିଶ୍ବକପରେ ୧୭ଟି ଇନିଂସ୍ରେ ୫୦ ଓ୍ବିକେଟ ନେଇଥିବା ବେଳେ ମିଚେଲ ଷ୍ଟାର୍କ ୧୯ଟି ଇନିଂସରେ ଏହି ରେକର୍ଡ କରିଥିଲେ । ଲସିଥ ମାଲିଙ୍ଗା ୨୫ ଇିନିଂସ, ଗ୍ଲେନ୍ ମ୍ୟାଗାର୍ଥ ୩୦ଟି ଇନିଂସ, ମୂରଲୀଧରନ ୩୦ ଏବଂ ପାକିସ୍ତାନର ଓ୍ବାସିମ୍ ଆକ୍ରମ ୩୩ଟି ଇନିଂସରେ ୫୦ ଓ୍ବିକେଟ ଅକ୍ତିଆର କରିଥିଲେ ।
