ବାରଣାସୀ: ବଲିଉଡ ଅଭିନେତା ନାନା ପାଟେକର ଏବେ ବାରଣାସୀରେ ନିଜ ଫିଲ୍ମ ‘ଜର୍ଣ୍ଣି’ର ସୁଟିଂରେ ବ୍ୟସ୍ତ ଅଛନ୍ତି । ଏଭଳି ସମୟରେ ନାନାଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ୍ ହେଉଛି । ଏହି ଭିଡିଓ ପାଇଁ ନାନାଙ୍କ ବିବାଦ ବୃଦ୍ଧି ପାଇଛି। ବାରଣାସୀରେ ସୁଟିଂ ସମୟରେ ନାନା ପାଟେକରଙ୍କୁ ପ୍ରଶଂସକମାନେ ଦେଖିବାକୁ ଆସୁଛନ୍ତି । କେହି କେହି ତାଙ୍କ ସହ ସେଲ୍ଫି ନେବାକୁ ବି ଚେଷ୍ଟା କରୁଛନ୍ତି । ହେଲେ ସେଲ୍ଫି ନେବା ସମୟରେ ଜଣେ ଯୁବକଙ୍କୁ ନାନା ପାଟେକର ଚାପୁଡ଼ା ମାରିବାର ଭିଡିଆ ସାମ୍ନାକୁ ଆସିଛି ।
ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, କୌଶସି ଏକ ମାର୍କେଟରେ ନାନା ପାଟେକର ବ୍ରାଉନ ରଙ୍ଗର ସୁଟ୍ ପିନ୍ଧିଥିବା ବେଳେ ମୁଣ୍ଡରେ ହ୍ୟାଟ ଲାଗାଇଛନ୍ତି । ଏହି ସମୟରେ ତାଙ୍କର ଜଣେ ପ୍ରଶଂସକ ନାନାଙ୍କ ସହ ସେଲ୍ଫି ନେବାକୁ ଆସୁଛନ୍ତି । ନାନାଙ୍କ ସହ ଯୁବକଜଣଙ୍କ ସେଲ୍ଫି ନେବା ବେଳେ ଅଭିନେତା ରାଗରେ ତାଙ୍କ ମୁଣ୍ଡକୁ ଚାପୁଡ଼ା ମାରିଦେଉଛନ୍ତି । ଏହା ପରେ ଅଭିନେତାଙ୍କ ବଡିଗାର୍ଡ ସଂପୃକ୍ତ ଯୁବକଙ୍କୁ ଟାଣି ଟାଣି ବାହାରକୁ ନେଇଯାଉଥିବା ଦେଖିବାକୁ ମିଳିଛି । ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ୟୁଜର୍ସ ଅଭିନେତାଙ୍କୁ ଟ୍ରୋଲ କରୁଛନ୍ତି ।
ଜଣେ ଟ୍ବିଟର ୟୁଜର ଲେଖିଛନ୍ତି, ‘ଆପଣ ଭଗବାନ ନୁହଁନ୍ତି । ଲୋକମାନେ ଆପଣଙ୍କୁ ହିରୋ କରିଛନ୍ତି । ଆପଣ ଯେତେବେଳେ ଆତ୍ମଗର୍ବରେ ଫ୍ୟାନଙ୍କୁ ଚାପୁଡ଼ା ମାରିଲେ ସେତେବେଳେ ଆପଣଙ୍କ ଭିତରେ ଥିବା ଅଭିନେତା ପଣିଆ ମରିଗଲା । ଯାହା କଲେ ଭଲ ଲାଗିଲାନି । ଏଥିପାଇଁ ଆପଣଙ୍କ ପାଖରେ ବଡିଗାର୍ଡ ରଖିଥାନ୍ତେ । ସାଉଥ ଷ୍ଟାରଙ୍କ ପାଖରୁ ଶିଖିବା ଦରକାର।’
ଅନ୍ୟ ଜଣେ ୟୁଜର ନାନା ପାଟେକରଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ବାରଣାସୀର ନିରୀହ ଲୋକମାନଙ୍କ ସହ ଏଭଳି ବ୍ୟବହାର ନିନ୍ଦନୀୟ । ଏହା ସହ ସେ ବାରଣାସୀ ପ୍ରଶାସନ ଏବଂ ପୋଲିସକୁ ନାନା ପାଟେକରଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ନିବେଦନ ମଧ୍ୟ କରିଛନ୍ତି ।
