ବାରଙ୍ଗ,୦୬/୧୧: ନନ୍ଦନକାନନ ପ୍ରାଣୀ ଉଦ୍ୟାନର ସରୀସୃପ  ଉଦ୍ୟାନରେ ରହୁଥିବା ଅସୁସ୍ଥ ବଉଳା କୁମ୍ଭୀରର ରବିବାର  ଅପରାହ୍ନରେ ମୃତ୍ୟୁ ହୋଇଛି । ଅଣ୍ଡା ଦେଇନପାରି କୁମ୍ଭୀରଟି  କଷ୍ଟ ପାଉଥିଲା । ନନ୍ଦନକାନନ ପ୍ରାଣୀ ଚିକିତ୍ସକ ଓ ଓୟୁଏଟିର  ପ୍ରଫସରଙ୍କ କୁମ୍ଭୀରର ଚିକିତ୍ସା ଜାରୀ ରଖିଥିଲେ । ବହୁ ଚେଷ୍ଟା ପରେ ମଧ୍ୟ କୁମ୍ଭୀରଟିକୁ ଚିକିତ୍ସକ ମାନେ ବଞ୍ଚାଇପାରିନାହାନ୍ତି ।  ସୋମବାର କୁମ୍ଭୀରର ମୃତଦେହ ବ୍ୟବଚ୍ଛେଦ କରାଯିବ । ତେବେ ଯାଇ ମୃତ୍ୟୁର କାରଣ ସ୍ପଷ୍ଟ  ହେବ ବୋଲି କର୍ତ୍ତୃପକ୍ଷ କହିଛନ୍ତି ।  

କୁମ୍ଭୀରଟି ଅସୁସ୍ଥ ହେବା ସହିତ ଠିକ ଭାବରେ ଖାଦ୍ୟ ଗ୍ରହଣ କରୁନଥିଲା । ତେଣୁ ପ୍ରାଣୀ ଚିକିତ୍ସକ ମାନେ ରହୁଥିବା ଖୁଆଡ଼ରେ ତାର ସ୍ୱାସ୍ଥ୍ୟ ପରୀକ୍ଷା  କରିବା ସହିତ ତାକୁ ଭିଟାମିନ ଓ ଆଣ୍ଟିବାୟୋଟିକ ଦେଉଥିଲେ । ଦିନକୁ ଦିନ ଅଧିକ ଅସୁସ୍ଥ ହେବାରୁ ପ୍ରାଣୀ ଚିକିତ୍ସକମାନେ ବିଭିନ୍ନ ପରିକ୍ଷା କରିବାରୁ ତା ପେଟରେ ଅଣ୍ଡା ଥିବା ଜଣିବାକୁ ପାଇଥିଲେ । ତେବେ କୁମ୍ଭୀରଟି ପ୍ରଥମ ଥର ଅଣ୍ଡା ଦେଉଥିବାରୁ ଓ ସେ ଅଣ୍ଡା ଦାନ କରି ନପାରିବାରୁ ତାକୁ ପ୍ରାଣୀ ଚିକିତ୍ସାଳୟକୁ ଅଣାଯାଇଥିଲା । ଓୟୁଏଟିରୁ ଏକ ଟିମ୍‌ ଆସି କୁମ୍ଭୀରର ସ୍ୱାସ୍ଥ୍ୟ ପରୀକ୍ଷା କରିବା ସହିତ ବିଭିନ୍ନ ପରୀକ୍ଷା କରିଥିଲେ। କୁମ୍ଭୀରଟି ସମ୍ପୁର୍ଣ୍ଣ ସୁସ୍ଥ ହୋଇନଥିଲେ ମଧ୍ୟ କର୍ତ୍ତୃପକ୍ଷ ତାକୁ ପୂର୍ବରୁ ରହୁଥିବା ଖୁଆଡ଼ରେ ଶନିବାର ଅପରାହ୍ନରେ ଛଡ଼ିଦେଇଥିଲେ।