ପ୍ରମୁଖ ଖବର
  • ନୂଆଦିଲ୍ଲୀ : ଦ୍ୱିତୀୟ ପର୍ଯ୍ୟାୟ ଲୋକସଭା ନିର୍ବାଚନ: ୧୬୭ ଜଣଙ୍କ ବିରୋଧରେ ସଙ୍ଗିନ ମାମଲା, କଂଗ୍ରେସର ଭେଙ୍କଟରମଣ ସବୁଠୁ ଧନୀ
  • ||
  • ଭୁବନେଶ୍ୱର : ପିସିସି ପ୍ରଚାର କମିଟି ବୈଠକ, ୨୮ରେ ଓଡ଼ିଶା ଆସିବେ ରାହୁଲ ଗାନ୍ଧି
  • ||
  • ଆଇପିଏଲ୍‌ରେ ଆଜି ଦିଲ୍ଲୀ ଓ ଗୁଜୁରାଟ ମଧ୍ୟରେ ଟକ୍କର, ଅହମ୍ମଦାବାଦରେ ହେବ ମୁକାବିଲା
  • ||
  • ଦୁବାଇରେ ବର୍ଷାର ପ୍ରକୋପ, ଚାରିଆଡେ ଖାଲି ପାଣି ପାଣି, ଓମାନରେ ଚାଲିଗଲା ୧୮ ଜୀବନ
  • ||
  • ଭୁବନେଶ୍ଵର : ଅସହ୍ୟ ତାତି ଓ ଗୁଳୁଗୁଳିରେ ସିଝୁଛି ରାଜ୍ୟ, ୪ ଦିନ ପ୍ରଚଣ୍ଡ ଗ୍ରୀଷ୍ମପ୍ରବାହ, ୧୮ ଓ ୧୯ରେ ୪୫ ଡିଗ୍ରୀ ଛୁଇଁବ
  • ||
  • ଭୁବନେଶ୍ଵର : ଆଜି ପବିତ୍ର ରାମନବମୀ, ପ୍ରାଣ ପ୍ରତିଷ୍ଠା ପରେ ଅଯୋଧ୍ୟାରେ ପ୍ରଥମ ରାମନବମୀ, ଆସିବେ ୨୫ ଲକ୍ଷ ଶ୍ରଦ୍ଧାଳୁ
  • ||

ଦୁଃଖ ବଖାଣିଲେ ଲୁଟ୍‌ର ଶିକାର ନେଦର୍‌ଲାଣ୍ଡସ୍‌ ପର୍ଯ୍ୟଟକ: ଟ୍ୟାକ୍ସି ଚାଳକ ସବୁକିଛି ନେଇଗଲା, ଧାଁ ଧପଡ଼ରେ କଟିଲା ୫୧ ଦିନ

ପୁରୀ,୦୩/୦୩: ମୋ ପରିବାରରେ କେହି ନାହାନ୍ତି । ମୁଁ ଅତି ସାଧାରଣ ଜୀବନଯାପନ କରେ । ନେଦର୍‌ଲାଣ୍ଡସ୍‌ରେ ବିଭିନ୍ନ ପୁରାତନ ଜିନିଷ ବ୍ୟବସାୟ କରେ । ସେଥିରୁ ଯାହା ରୋଜଗାର କରେ  ସେଥିରେ ପେଟ ପୋଷେ । ବଳକା ଅର୍ଥରେ ବିଦେଶ ଭ୍ରମଣ କରେ । ଅତି ସରଳ ବିଶ୍ୱାସୀ । ସହଜରେ ସମସ୍ତଙ୍କୁ ଗ୍ରହଣ କରିଦିଏ । ଯେଉଁଥିପାଇଁ ଆଜି ଏଭଳି ଦୁଃଖ ଭୋଗିବାକୁ ପଡ଼ିଲା । ଟ୍ୟାକ୍ସି ଚାଳକ ମୋତେ ଫସାଇ ଦେଲା । ପୁରୀରେ ଲୁଟ୍‌ର ଶିକାର ନେଦର୍‌ଲାଣ୍ଡ୍‌ରର ପର୍ଯ୍ୟଟକ ଆନ୍ଥୋନୀ ଭ୍ୟାନ୍‌ ଆର୍କେଲ୍‌ କୋହଭରା କଣ୍ଠରେ ଏହା କହିଛନ୍ତି ।  

ଜାନୁଆରୀ ୧୦ରୁ ଫେବ୍ରୁଆରୀ ୨୯ ଯାଏଁ ଦୀର୍ଘ  ୫୧ ଦିନର କଷ୍ଟ ଓ ତାଙ୍କ ସହ ଘଟିଥିବା ଅଘଟଣ  ସମ୍ପର୍କରେ ଆନ୍ଥୋନୀ ଗୋଟି ଗୋଟି କରି ଅତିରିକ୍ତ  ଜିଲ୍ଲାପାଳ (ରାଜସ୍ୱ) କୈଳାସ ଚନ୍ଦ୍ର ନାୟକଙ୍କ ସମ୍ମୁଖରେ  ବଖାଣିଛନ୍ତି । ସେ କହିଛନ୍ତି, ଜାନୁଆରୀ ୯ ରାତିରେ  ପୁରୀରେ ପହଞ୍ଚିଥିଲେ । ପୁରୀ-କୋଣାର୍କ ବେଳାମାର୍ଗ  ପାଶ୍ୱର୍ ପେଣ୍ଠକଟା ମେରାଇନ୍‌ ଥାନା ଅଧୀନ ତୋଷାଳୀ  ସ୍ୟାଣ୍ଡ୍‌ ହୋଟେଲ୍‌ରେ ରହିଥିଲେ । ସେଠାରୁ ଏକ ଟ୍ୟାକ୍ସି  ଭଡ଼ା କରି ଚାନ୍ଦବାଲି ଯାଇଥିଲେ । ବାଟରେ ପରିସ୍ରା  କରିବାକୁ ଓହ୍ଲାଇଥିବାବେଳେ ସମସ୍ତ ଟଙ୍କା ଲୁଟ୍‌ କରିଥିଲା ଟ୍ୟାକ୍ସି ଚାଳକ । ପରବର୍ତ୍ତୀ ସମୟରେ ବିଭିନ୍ନ ବାହାନା  ଦେଖାଇଥିଲା । ନିଜେ ଟଙ୍କା ଲୁଚାଇ ଲୁଟେରା ନେଇଗଲା  ବୋଲି କହିଥିଲା । ଏହାପରେ ଭୁବନେଶ୍ୱରରେ ୨ ଦିନ  ରଖିଲା । ସେଠାରୁ ଆଣି ପୁରୀ ବଳିଆପଣ୍ଡାରେ ୧୧ଦିନ  ବନ୍ଦ କୋଠରିରେ ରଖିଥିଲା । ପଦାକୁ ବାହାରିଲେ  ହାତୀ ମାରିଦେବ ବୋଲି କହିଥିଲା । 

ମୁମ୍ବାଇ ପୁଲିସ ଲୁଟେରାକୁ ଧରିଛି, ତୁମେ ସେଠାକୁ ଯାଅ କହି ଟ୍ୟାକ୍ସି  ଚାଳକ ଜଣକ ଟ୍ରେନ୍‌ରେ ବସାଇ ଦେଇଥିଲା । ଏହି  ସମୟରେ ଟ୍ୟାକ୍ସି ଚାଳକ ପୁଣି ଲୁଟ୍‌ କରିବାକୁ ଚକ୍ରାନ୍ତ  କରିଥିଲା । କହିଥିଲା, ଯିବାବେଳେ ଟ୍ରେନ୍‌ରେ ଜିନିଷ  ଚୋରି ହୋଇଯିବ । ତେଣୁ ଆଉ ଯାହା କିଛି ଅଛି ମୋ  ପାଖରେ ରଖିକି ଯାଅ । ମୁମ୍ବାଇରୁ ଫେରିଲେ ତୁମ  ଜିନିଷ ନେଇଯିବ ବୋଲି ପ୍ରତିଶ୍ରୁତି ଦେଇଥିଲା । ହାତ  ଘଣ୍ଟା, ହୀରା ମୁଦି, କ୍ୟାମେରା ଓ ଅନ୍ୟାନ୍ୟ ଜିନିଷ ସବୁ  ଛାଡ଼ି କେବଳ ଭିସା ଓ ପାସ୍‌ପୋର୍ଟ ପାଖରେ ରଖିଥିଲି ।  ମୁମ୍ବାଇ କହି ଦିଲ୍ଲୀ ଟ୍ରେନ୍‌ରେ ମୋତେ ବସାଇଥିଲା  ଟ୍ୟାକ୍ସି ଚାଳକ । ଦିଲ୍ଲୀରେ ପହଞ୍ଚି ପୁଣି ଠକାମିର ଶିକାର  ହୋଇଥିବା ଜାଣିବା ପରେ ପୁରୀ ଫେରିଥିଲି । ହେଲେ  ଟ୍ୟାକ୍ସି ଚାଳକ ରହୁଥିବା ଘର ତାଲା ପଡ଼ିଥିଲା । ସମସ୍ତ  ଜିନିଷ ଲୁଟ୍‌ ହୋଇଗଲା ବୋଲି ଜାଣିବାକୁ ପାଇଥିଲି ।  ଏହାପରେ ଆଇନ୍‌ର ଆଶ୍ରୟ ନେଲି । ରହୁଥିବା ଅଞ୍ଚଳ  ଟାଉନ୍‌ ଥାନା ସୀମା ହୋଇଥିବାରୁ ଏହି ଥାନା ପୁଲିସ  ମାମଲା ରୁଜୁ କରିଥିଲା ।  

ପରେ ନୀଳାଦ୍ରି ନିଳୟରେ ରହିଥିଲି ।  ଟାଉନ୍‌ ଥାନାରେ ଲୁଟ୍‌ ସମ୍ପର୍କରେ ମାମଲା ରୁଜୁ  ହୋଇଥିବାବେଳେ ଲୁଟେରା ଜଣକ ଫେରାର୍‌  ହୋଇଯାଇଥିଲା । ଲୁଟେରା ଚଳାଉଥିବା ଟ୍ୟାକ୍ସି ପୁଲିସ  ଜବତ କରିଥିବାବେଳେ ତଦନ୍ତ ଆଗେଇ ନଥିଲା । ଲୁଟ୍‌  ହୋଇଥିବା ଟଙ୍କା ଓ ଜିନିଷ ଫେରି ନପାଇ ଚିନ୍ତାରେ  ଥିଲି । ପାଖରେ ଭିସା ଓ ପାସ୍‌ପୋର୍ଟ ଥିଲେ ବି ଟଙ୍କା  ନଥିବାରୁ କେମିତି ନିଜ ଦେଶ ଫେରିବି ସେଥିପାଇଁ  ଅସ୍ଥିର ହୋଇ ପଡ଼ିଥିଲି । ପୁରୀର ଉମିଦ ଫାଉଣ୍ଡେସନ  ସମ୍ପାଦକ ତଥା ଯୁବ ସମାଜସେବୀ ଡାନିଆଲ ନାୟକ  ମୋତେ ନେଇ ବରିଷ୍ଠ ପୁଲିସ ଅଧିକାରୀଙ୍କ ଦ୍ୱାରସ୍ଥ  ହୋଇଥିଲେ ବି କିଛି ପଦକ୍ଷେପ ନିଆଯାଇ ନଥିଲା ।  

ଶେଷରେ ଗତ ୨୯ ତାରିଖରେ ଡାନିଏଲ୍‌  ଏକ ସାମ୍ବାଦିକ ସମ୍ମିଳନୀ କରି ଘଟଣାକୁ ସାମ୍ନାକୁ  ଆଣିଥିଲେ । ଏହାପରେ ତାଙ୍କୁ ନୀଳାଦ୍ରି ନିଳୟରୁ ଉଦ୍ଧାର  କରାଯାଇଥିଲା । ଜିଲ୍ଲା ପ୍ରଶାସନ ପକ୍ଷରୁ ସରକାରୀ  ବ୍ୟବସ୍ଥାରେ ଆନ୍ଥୋନୀଙ୍କୁ ଆଶ୍ରୟ ଦିଆଯିବା ପରେ  ତାଙ୍କର ସ୍ୱାସ୍ଥ୍ୟାବସ୍ଥା ଯାଞ୍ଚ୍‌ କରାଯାଇଛି । ଚିକିତ୍ସା ସହ  ଖାଦ୍ୟପେୟ ଓ ରହଣି ସ୍ଥଳ ଉନ୍ନତମାନର ବୋଲି  ସେ କହିଛନ୍ତି । 

ଆସନ୍ତା ୧୫ ତାରିଖ ଭୋର୍‌ ୩ଟା  ୫୦ରେ ନାଗପୁରରୁ ନେଦର୍‌ଲାଣ୍ଡସ୍‌କୁ ଫ୍ଲାଇଟ୍‌ ଥିବା  ସେ କହିଛନ୍ତି । ତେଣୁ ତାଙ୍କୁ ପୂର୍ବରୁ ନାଗପୁରରେ  ନେଇ ରଖିବାକୁ ପ୍ରଶାସନ ବ୍ୟବସ୍ଥା କରୁଥିଲା । କିନ୍ତୁ ଏଥିରେ ନାରାଜ୍‌ ହୋଇଥିଲେ ଆନ୍ଥୋନୀ । ସେ  ପୁରୀରେ ରହି ୧୪ ତାରିଖ ରାତିରେ ନାଗପୁରରେ ପହଞ୍ଚିବାକୁ ନିବେଦନ କରିଥିଲେ । ତେଣୁ ପୁରୀ ଜିଲ୍ଲା  ପ୍ରଶାସନ ସେହିଦିନ ଯାଏଁ ରହଣି ବ୍ୟବସ୍ଥା କରାଇଛି । ୧୪ ତାରିଖ ରାତିରେ ନାଗପୁରରେ ପହଞ୍ଚିବା ପରେ  ଭୋର୍‌ରୁ ନେଦର୍‌ଲାଣ୍ଡସ୍‌ ଫେରିଯିବେ ବୋଲି ପ୍ରଶାସନିକ  ଅଧିକାରୀମାନେ କହିଛନ୍ତି । ସେପଟେ ଲୁଟ୍‌ ମାମଲାର  ତଦନ୍ତ ଜାରି ରହିଥିବାବେଳେ ଏହି ସମୟ ମଧ୍ୟରେ  ଲୁଟେରା ଯଦି ଧରାପଡ଼ିଯାଏ, ତେବେ ଆନ୍ଥୋନୀଙ୍କ  ଜିନିଷ ଜବତ କରାଯାଇ ତାଙ୍କୁ ହସ୍ତାନ୍ତର କରାଯିବ । ଯଦି  ଫେରିବା ପୂର୍ବରୁ ଲୁଟେରା କିମ୍ବା ଲୁଟ୍‌ ଜିନିଷ ନମିଳେ  ତେବେ ପରବର୍ତ୍ତୀ ସମୟରେ ଏହାକୁ ଫେରାଇବାର  ବ୍ୟବସ୍ଥା କରାଯାଇଛି । ସେଥିପାଇଁ ଆନ୍ଥୋନୀଙ୍କ  ବ୍ୟାଙ୍କ୍‌ ଆକାଉଣ୍ଟ୍‌ ନମ୍ବର ସଂଗ୍ରହ କରିଛି ପ୍ରଶାସନ ।

  • prameyanews
  • PrameyaOdia
  • prameya
  • News7 Is Now On WhatsApp Join And Get Latest News Updates Delivered To You Via WhatsApp

    Copyright © 2024 - Summa Real Media Private Limited. All Rights Reserved.