ଇସଲାମାବାଦ, ୨୮/୦୯: ପାକିସ୍ତାନ ଆତଙ୍କବାଦର ପେଣ୍ଠସ୍ଥଳ ହୋଇଥିବା ବେଳେ ବିଭିନ୍ନ ସମୟରେ ଭାରତ ଏହାର କୁପରିଣାମ ଭୋଗିଛି । ଆତଙ୍କବାଦୀଙ୍କ ପରେ ଚୀନକୁ ଗଧ ରପ୍ତାନୀ କରି ଚର୍ଚ୍ଚାକୁ ଆସିଥିଲା ପାକିସ୍ତାନ । ହେଲେ ଏବେ ନିଜର ଭିକାରୀଙ୍କୁ ଅନ୍ୟ ଦେଶକୁ ପାକିସ୍ତାନ ରପ୍ତାନୀ କରୁଥିବା ନେଇ ଖବର ସମଗ୍ର ବିଶ୍ବରେ ଚର୍ଚ୍ଚାର ପ୍ରସଙ୍ଗ ପାଲଟିଛି । ପରିସ୍ଥିତି ଏମିତି ହେଲାଣି ଯେ, ସାଉଦି ଆରବ ଭଳି ଦେଶ ପାକିସ୍ତାନକୁ ନିଜର ଭିକାରୀଙ୍କୁ ରୋକିବାକୁ ଅପିଲ କରିଛି ।
ଆଶ୍ଚର୍ଯ୍ୟର କଥା ହେଉଛି, ମକ୍କା ମଦିନାରୁ ଗିରଫ ହେଉଥିବା ଅଧିକାଂଶ ପକେଟ ମାର୍ କେବଳ ପାକିସ୍ତାନର ବୋଲି ଜଣାପଡ଼ିଛି । ଦେଶରେ ଆର୍ଥିକ ସଂକଟ ଏବଂ ଖାଦ୍ୟାଭାବ ଉତ୍କଟ ହେଉଥିବା ବେଳେ ଭିକାରୀଙ୍କ ସଂଖ୍ୟା ବୃଦ୍ଧି ପାଇଛି । ଫଳରେ ବହୁ ସଂଖ୍ୟକ ଭିକାରୀ ପଶ୍ଚିମ ଏସିଆର ଦେଶଗୁଡ଼ିକୁ ଚାଲିଯାଉଥିବା କୁହାଯାଉଛି । ପଶ୍ଚିମ ଏସୀୟ ଦେଶଗୁଡ଼ିକରେ ଗିରଫ ହୋଇଥିବା ଭିକାରୀଙ୍କ ମଧ୍ୟରେ ୯୦ ପ୍ରତିଶତ ପାକିସ୍ତାନୀ ବୋଲି ଜଣାପଡ଼ିଛି । ବିଶେଷ କରି ଏମାନେ ଇରାକ୍ ଏବଂ ସାଉଦି ଆରବର ଜେଲ୍ରେ ଥିବା ନେଇ କହିଛନ୍ତି ପାକିସ୍ତାନୀ କୂଟନୈତିଜ୍ଞ ଜୀଶାନ୍ ଖାନଜାଦା ।
ମିଳିଥିବା ସୂଚନା ଅନୁସାରେ, ତୀର୍ଥଯାତ୍ରା କରିବା ବାହାନାରେ ଭିସା ନେଇ ଇରାକ୍ ଏବଂ ସାଉଦି ଆରବ ଭଳି ଦେଶର ବିଭିନ୍ନ ଗଳିରେ ଭିକ ମାଗୁଛନ୍ତି ପାକିସ୍ତାନ ନାଗରିକ । ସିନେଟର ମଞ୍ଜୁର କାକରଙ୍କ ଅଧ୍ୟକ୍ଷତାରେ ବସିଥିବା ଏକ ବୈଠକରେ ଜୀଶାନ୍ ଖାନଜାଦା କହିଛନ୍ତି ଯେ, ପାଖାପାଖି ଏକ କୋଟି ପାକିସ୍ତାନୀ ବିଦେଶରେ ରହୁଛନ୍ତି । ସେଥିମଧ୍ୟରୁ ଅଧିକାଂଶ ଲୋକେ ବିଦେଶରେ ଭିକ ମାଗୁଛନ୍ତି । ମିଡଲ ଇଷ୍ଟ ଦେଶଗୁଡ଼ିକୁ ପାକିସ୍ତାନରୁ ଯାଉଥିବା ବିମାନରେ ଅଧିକ ଭିକାରୀ ଯାତ୍ରା କରୁଛନ୍ତି ବୋଲି ସେ କହିଛନ୍ତି ।
ସେପଟେ ଇରାକ ଏବଂ ସାଉଦି ଆରବର କୂଟନୈତିଜ୍ଞଙ୍କ ଅନୁସାରେ, ଏହି ଦୁଇ ଦଶର ଜେଲ୍ରେ ପାକିସ୍ତାନୀ ଭିକାରୀଙ୍କ ସଂଖ୍ୟା ଅଧିକ । ଏଭଳି ତଥ୍ୟ ବିଶ୍ବସ୍ତରରେ ପାକିସ୍ତାନକୁ ଲଜ୍ଜିତ କରୁଛି ବୋଲି ବୈଠକରେ କହିଛନ୍ତି ଜୀଶାନ୍ ଖାନଜାଦା । ଅନ୍ୟପଟେ ୨୦୨୨ ତୁଳନାରେ ୨୦୨୩ରେ ଗଧମାନଙ୍କ ସଂଖ୍ୟା ବୃଦ୍ଧି ପାଇଛି । ଚୀନର ଚାହିଦା ବଢ଼ୁଥିବାରୁ ପାକିସ୍ତାନରେ ଗଧ ସଂଖ୍ୟାରେ ବୃଦ୍ଧି ଆସିଛି ବୋଲି କୁହାଯାଉଛି । ତେବେ ପାକିସ୍ତାନରେ ଆର୍ଥିକ ସଂକଟରେ ଚରମରେ ପହଞ୍ଚିଯାଇଛି । ଲୋକମାନେ ଖାଇବାକୁ ପାଉନାହାନ୍ତି । ଏଭଳି ସ୍ଥିତିରେ ଦେଶରେ ନୂଆ ନୀତି ଆଣିବାକୁ ବିଶ୍ବ ବ୍ୟାଙ୍କ ଚେତାବନୀ ଦେଇସାରିଛି ।
