ରାୟପୁର, ୦୧/୧୨: ଆଉ କିଛି ଘଣ୍ଟା ପରେ ରାୟପୁରର ସହିଦ ବୀର ନାରାୟଣ ସିଂହ ଅନ୍ତର୍ଜାତୀୟ ଷ୍ଟାଡିୟମରେ ଅଷ୍ଟ୍ରେଲିଆ ବପକ୍ଷରେ ଭାରତ ଚତୁର୍ଥ ଟି-ଟ୍ୱେଣ୍ଟି ଖେଳିବ । ତେବେ ମ୍ୟାଚ୍ ପୂର୍ବରୁ ସମସ୍ତଙ୍କୁ ଚକିତ କଲା ଭଳି ଏକ ଖବର ସାମ୍ନାକୁ ଆସିଛି । ଷ୍ଟାଡିୟମରେ ବିଦ୍ୟୁତ୍ ନଥିବା ଜଣାପଡ଼ିଛି । ୨୦୦୯ ମସିହାରୁ ବିଦ୍ୟୁତ୍ ବିଲ୍ ଦେୟ ଦିଆଯାଇ ନାହିଁ ।
ସହିଦ ବୀର ନାରାୟଣ ସିଂହ ଅନ୍ତର୍ଜାତୀୟ ଷ୍ଟାଡିୟମ ଉପରେ ୩.୧୬ କୋଟି ଟଙ୍କାର ବିଦ୍ୟୁତ୍ ବକେୟା ଗଡ଼ୁଛି । ଯେଉଁଥି ପାଇଁ ୫ ବର୍ଷ ତଳେ ଷ୍ଟାଡିୟମରୁ ବିଦ୍ୟୁତ୍ ସଂଯୋଗ କାଟି ଦିଆ ଯାଇଥିଲା । ପରେ ଛତିଶଗଡ଼ ରାଜ୍ୟ କ୍ରିକେଟ୍ ଆସୋସିଏସନ୍ ଅନୁରୋଧରେ ଏକ ଅସ୍ଥାୟୀ ବିଦ୍ୟୁତ୍ ସଂଯୋଗ ଦିଆଯାଇଛି । ଯାହାକି କେବଳ ସ୍ପେକ୍ଟାଟର୍ସ ଗ୍ୟାଲେରି ଓ ବକ୍ସକୁ କଭର କରୁଛି ।
ଦକ୍ଷିଣ ଆଫ୍ରିକା ଗସ୍ତ ପାଇଁ ଭାରତୀୟ ଦଳ ଘୋଷିତ : ଟେଷ୍ଟ ଦଳକୁ ଫେରିଲେ ବୁମରା, ରାହୁଲ, ଆୟର
ଫଳରେ ଆଜିର ମ୍ୟାଚ୍ ସମୟରେ ଜେନେରେଟର୍ ସାହାଯ୍ୟରେ ଫ୍ଲଡ୍ ଲାଇଟ୍ ଲାଗିବ । ରାୟପୁର ଗ୍ରାମୀଣ ସର୍କଲ ଇନଚାର୍ଜ ଅଶୋକ ଖଣ୍ଡେଲୱାଲ୍ କହିଛନ୍ତି, କ୍ରିକେଟ୍ ଆସୋସିଏସନର ସମ୍ପାଦକ ଷ୍ଟାଡିୟମକୁ ଦିଆ ଯାଇଥିବା ଅସ୍ଥାୟୀ ସଂଯୋଗର କ୍ଷମତା ବଢ଼ାଇବା ଲାଗି ଆବେଦନ କରିଛନ୍ତି ।
ଏବେ ଦିଆ ଯାଇଥିବା ଅସ୍ଥାୟୀ ବିଦ୍ୟୁତ୍ ସଂଯୋଗର କ୍ଷମତା ୨୦୦ କେଭି । ଏହାକୁ ୧ ହଜାର କେଭି କରିବାକୁ ଆବେଦନ କରାଯାଇଛି । କିନ୍ତୁ ଏ ଦିଗରେ ଏଯାଏଁ କାର୍ଯ୍ୟ ଆରମ୍ଭ ହୋଇ ନାହିଁ । ୨୦୧୮ରେ ଷ୍ଟାଡିୟମରେ ମାରାଥନ୍ ଆୟୋଜନ ବେଳେ ବିଦ୍ୟୁତ୍ ନଥିବା ଜଣାପଡ଼ିଥିଲା । ସେତେବେଳେ କୁହା ଯାଇଥିଲା ୨୦୦୯ରୁ ବିଦ୍ୟୁତ୍ ବକେୟା ଦିଆଯାଇ ନାହିଁ ।
ଦିନିକିଆ ଓ ଟି-ଟ୍ୱେଣ୍ଟି କ୍ରିକେଟରୁ ଲମ୍ବା ବିରତି ଚାହୁଁଛନ୍ତି ବିରାଟ କୋହଲି
ତେବେ ଷ୍ଟାଡିୟମ୍ ନିର୍ମାଣ ପରେ ପୂର୍ତ୍ତ ବିଭାଗକୁ ଏହାର ରକ୍ଷାଣବେକ୍ଷଣ ଦାୟିତ୍ୱ ଦିଆ ଯାଇଥିଲା । ଯେତେବେଳେ କି ଖର୍ଚ୍ଚ ଅର୍ଥରାଶି ଅର୍ଥ ଖେଳ ବିଭାଗ ଦେବ ବୋଲି ଧାର୍ଯ୍ୟ ହୋଇଥିଲା । ଏବେ ବିଦ୍ୟୁତ୍ ବକେୟାକୁ ନେଇ ଦୁଇ ବିଭାଗ ପରସ୍ପରକୁ ଦୋଷ ଲଦିଛନ୍ତି । ବିଦ୍ୟୁତ୍ ବିତରଣକାରୀ ସଂସ୍ଥା ଉଭୟ ବିଭାଗକୁ ବକେୟା ନେଇ ଏକାଧିକ୍ ବିଲ୍ ପଠାଇଛି, ତଥାପି ଦେୟ ଭରା ଯାଇନି ।