ବେଙ୍ଗାଲୁରୁ,୦୪/୧୧: ଚଳିତ ବିଶ୍ୱକପ୍ରେ ଶନିବାର ଏକ ଦମ୍ଦାର ମୁକାବିଲା ରହିଛି । ଏମ୍ ଚିନ୍ନାସ୍ୱାମୀ ଷ୍ଟାଡିୟମ୍ରେ ପାକିସ୍ତାନ ଓ ନ୍ୟୁଜିଲାଣ୍ଡ ପରସ୍ପରକୁ ଭେଟିବେ । ବର୍ତ୍ତମାନ ଏହି ମ୍ୟାଚ୍ ଉପରେ ସମସ୍ତଙ୍କ ନଜର ରହିଛି । ଉଭୟ ଦଳ ସେମିରେ ପ୍ରବେଶ କରିବା ପାଇଁ ସଂଘର୍ଷ କରୁଛନ୍ତି । ୮ପଏଣ୍ଟ ହାସଲ କରିସାରିଥିବା ନ୍ୟୁଜିଲାଣ୍ଡ ଶନିବାର ଜିତିଲେ ସେମି ଫାଇନାଲ୍ ନିକଟତର ହେବ । ପାକିସ୍ତାନର ଆଶା ମଉଳିଯିବ । ପାକିସ୍ତାନ ଏହି ମ୍ୟାଚ୍ ଜିତିଲେ ମଧ୍ୟ ଅନ୍ୟ ଦଳର ପ୍ରଦର୍ଶନ ଉପରେ ନିର୍ଭର କରିବ ।
ସେମିରେ ପ୍ରବେଶ କରିବାକୁ ହେଲେ ପାକିସ୍ତାନକୁ ଶେଷ ୨ଟି ଯାକ ମ୍ୟାଚ୍ ଜିତିବା ଜରୁରି । ତେଣୁ ଶନିବାର ବିଜୟ ପାଇଁ ପାକ୍ ଦଳ ସବୁ ଶକ୍ତି ଖଟାଇବାକୁ ପ୍ରସ୍ତୁତ । ପୂର୍ବ ରେକର୍ଡକୁ ଦେଖିଲେ ପାକିସ୍ତାନର ପଲା ଭାରି ରହିଥିବା ସ୍ପଷ୍ଟହେବ । ଉଭୟ ବିଶ୍ୱକପ୍ରେ ପରସ୍ପରକୁ ୯ଥର ଭେଟିଛନ୍ତି । ଏଥିରୁ ପାକିସ୍ତାନ ୭ଟି ମ୍ୟାଚ୍ ଜିତିଛି । କେବଳ ୧୯୮୩ ଓ ୨୦୧୧ ବିଶ୍ୱକପ୍ରେ ପାକିସ୍ତାନ ପରାଜିତ ହୋଇଥିଲା ।
ନ୍ୟୁଜିଲାଣ୍ଡ ଦଳ ଆହତ ସମସ୍ୟା ଦେଇ ଗତି କରୁଛି । ମାଟ୍ ହେନରୀ ଆହତ ହୋଇ ବାଦ ପଡ଼ିଛନ୍ତି । କେନ ୱିଲିୟମସନ, ଲୋକି ଫର୍ଗୁସନ, ମାର୍କ ଚାପମାନ ଓ ଜିମ୍ମି ନୀଶମ ପ୍ରମୁଖ ଆହତ ସମସ୍ୟା ଦେଇ ଗତି କରୁଥିଲେ ହେଁ ଆଜି ଅଭ୍ୟାସ କରିଥିବାରୁ ଦଳ ସାମାନ୍ୟ ଆଶ୍ୱସ୍ତ ହୋଇଛି । ଶନିବାର ୱିଲିୟମସନ ଖେଳିବା ସମ୍ଭାବନା ରହିଛି । ସେ ଫେରିଲେ ବ୍ୟାଟିଂ ବିଭାଗ ସୁଦୃଢ ହେବ । ୱିଲ ୟଙ୍ଗ୍ ଏକାଦଶରୁ ବାଦ ପଡ଼ିବେ ଓ ତାଙ୍କ ସ୍ଥାନରେ ରଚିନ ରବିନ୍ଦ୍ର ପାଳି ଆରମ୍ଭ କରିବେ । ଟ୍ରେଣ୍ଟ ବୋଲ୍ଟଙ୍କ ଉପରେ ସମସ୍ତଙ୍କ ନଜର ରହିବ । ସେ ଆଉ ଗୋଟିଏ ୱିକେଟ୍ ନେଲେ ବିଶ୍ୱକପ୍ରେ ୫୦ୱିକେଟ୍ ପୂରଣ କରିବେ ।
ଚିନ୍ନାସ୍ୱାମୀ ଷ୍ଟାଡ଼ିୟମ୍ର ପିଚ୍ ବ୍ୟାଟିଂ ପାଇଁ ଅନୁକୂଳ । ଛୋଟ ବାଉଣ୍ଡାରୀ ଓ ଦ୍ରୁତ ଆଉଟ୍ଫିଲ୍ଡ ଯୋଗୁଁ ଏଠାରେ ବିଶାଳ ସ୍କୋର ହେବା ନିଶ୍ଚିତ । ଅବଶ୍ୟ ଏଠାରେ ସ୍ପିନରମାନେ ପିଚ୍ର ଫାଉଦା ଉଠାଇ ପାରିବେ । ଦିନ ବେଳା ମ୍ୟାଚ୍ ରହିଥିବାରୁ ଟସ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଆଶା କରାଯାଉଛି ।
-: ସମ୍ଭାବ୍ୟ ଦଳ :-
ନ୍ୟୁଜିଲାଣ୍ଡ: ଡେଭନ କନୱେ, ୱିଲ ୟଙ୍ଗ୍, ରଚିନ ରବିନ୍ଦ୍ର, ଡାରିଲ ମିଚେଲ, ଟମ ଲାଥମ (ଅଧିନାୟକ), ଗ୍ଲେନ ଫିଲିପ୍ସ, ମିଚେଲ ସାଣ୍ଟନର, ଜେମ୍ସ ନୀଶମ, କେଲି ଜାମିସନ, ଟିମ ସାଉଦି/ଲୋକି ଫର୍ଗୁସନ, ଟ୍ରେଣ୍ଟ ବୋଲ୍ଟ ।
ପାକିସ୍ତାନ: ଅବଦୁଲ୍ଲା ଶଫିକ, ଫଖାର ଜମାନ, ବାବର ଆଜମ (ଅଧିନାୟକ), ମହମ୍ମଦ ରିଜୱାନ, ସୌଦ ସକିଲ, ଇଫତିଖର ଅହମ୍ମଦ, ଆଘା ସଲମାନ, ଶଦାବ ଖାନ, ମହମ୍ମଦ ୱାସିମ, ସହିନ ଆଫ୍ରିଦି, ହ୍ୟାରିସ ରୌଫ ।
