ନୂଆଦିଲ୍ଲୀ,୨୭/୦୨: ଆଗକୁ ଲୋକସଭା ନିର୍ବାଚନ ଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ତାକୁ ନେଇ ବଡ଼ ଭବିଷ୍ୟବାଣୀ କରିଛନ୍ତି । ବିଜେପି ହିଁ କ୍ଷମତାକୁ ଫେରିବ ବୋଲି ସେ ଦୃଢ଼ୋକ୍ତି କରିଛନ୍ତି । ତାଙ୍କ ଅନୁସାରେ, ଆମ ସରକାରର ତୃତୀୟ ପାଳି ଜୁନ୍ରୁ ଆରମ୍ଭ ହେବ । ଯେଉଁଭଳି ବ୍ୟାପକତା ଓ ଗତିରେ ଏହି ସରକାର କାମ କରୁଛି ତାହା ଲୋକଙ୍କୁ ଆଶ୍ଚର୍ଯ୍ୟ କରିଦେଇଛି । ଭିଡିଓ କନ୍ଫରେନ୍ସିଂ ମାଧ୍ୟମରେ ୪୧ ହଜାର କୋଟିରୁ ଅଧିକ ଟଙ୍କା ବିନିଯୋଗରେ ୨୦୦୦ରୁ ଅଧିକ ରେଳ ଭିତ୍ତିଭୂମି ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ ଅବସରରେ ପ୍ରଧାନମନ୍ତ୍ରୀ ଏହା କହିଛନ୍ତି ।
ରେଲୱେର ରୂପାନ୍ତରୀକରଣ ପ୍ରସଙ୍ଗରେ ପ୍ରଧାନମନ୍ତ୍ରୀ କହିଲେ ଯେ, ଲୋକମାନେ ବିଗତ ୧୦ ବର୍ଷ ମଧ୍ୟରେ ଏକ ନୂଆ ଭାରତ ନିର୍ମାଣ ହେଉଥିବାର ଦେଖିଛନ୍ତି । ୨୦୧୪ରେ ରେଳ ବଜେଟ୍ ମାତ୍ର ୪୫ ହଜାର କୋଟି ଥିବାବେଳେ ବର୍ତ୍ତମାନ ବଜେଟ୍ ଅଢ଼େଇ ଲକ୍ଷ କୋଟିରେ ପହଞ୍ଚିଛି । ଦେଶରେ ନୂଆ ରେଳଲାଇନ ବିଛାଯିବାର ଗତି ବଢ଼ିଛି । ସେହିପରି ବନ୍ଦେ ଭାରତ ଟ୍ରେନ୍ ଓ ଅମୃତ ଭାରତ ଟ୍ରେନ୍ ରେଳ ବିଭାଗକୁ ସଂପୂର୍ଣ୍ଣ ପରିବର୍ତ୍ତନ କରିଛି । ଲୋକେ ଏବେ ବିଶ୍ୱସ୍ତରୀୟ ସୁବିଧା ଅନୁଭବ କରୁଛନ୍ତି ।
ମୋଦି ଆହୁରି କହିଥିଲେ, ଆମେ ଯେତେବେଳେ ବିକଶିତ ଭାରତ କଥା କହିଥାଉ ସେତେବେଳେ ଏହାର ସୂତ୍ରଧର ଓ ସବୁଠୁ ବଡ଼ ହିତାଧିକାରୀ ହେଉଛନ୍ତି ଦେଶର ଯୁବବର୍ଗ । ଆଜିର ଏହି ଯୋଜନାଗୁଡି଼କ ଦ୍ୱାରା ଦେଶର ଲକ୍ଷ ଲକ୍ଷ ଯୁବକଙ୍କୁ ରୋଜଗାରର ସୁଯୋଗ ମିଳିବ। ଭାରତ ଏବେ ବଡ଼ ସ୍ୱପ୍ନ ଦେଖୁଛି । ସେହି ସ୍ୱପ୍ନକୁ ପୂରଣ କରିବା ଲାଗି ଦିନରାତି କାମ କରୁଛି । ଯୁବବର୍ଗଙ୍କର ସ୍ୱପ୍ନ ଓ କଠିନ ପରିଶ୍ରମ ଏବଂ ମୋର ଦୃଢ଼ ସଂକଳ୍ପ ବିକଶିତ ଭାରତର ଗ୍ୟାରେଣ୍ଟି ବୋଲି ସେ କହିଥିଲେ । କାର୍ଯ୍ୟକ୍ରମରେ ବିଭିନ୍ନ ରାଜ୍ୟର ରାଜ୍ୟପାଳ ଓ ମୁଖ୍ୟମନ୍ତ୍ରୀ ସାମିଲ ହୋଇଥିଲେ । ରେଳ ବିଭାଗର ରୂପାନ୍ତରଣ ଉଦ୍ଦେଶ୍ୟରେ ଆଜିର ଏହି ପ୍ରକଳ୍ପଗୁଡି଼କର ଲୋକାର୍ପଣ ଓ ଶିଳାନ୍ୟାସ ଲାଗି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେଇଥିଲେ ।
ସୂଚନାଥାଉକି, ପୂର୍ବରୁ ମୋଦି ଆଗାମୀ ଲୋକସଭା ନିର୍ବାଚନରେ ବିଜେପି ୩୭୦ଟି ଆସନ ଜିତିବ ବୋଲି ଦାବି କରିଥିଲେ । ଏଥିସହ ଏନ୍ଡିଏର ଆସନ ସଂଖ୍ୟା ୪୦୦ ଟପିବ ବୋଲି ସେ କହିଥିଲେ ।
