ଜେରୁସାଲେମ: ଯୁଦ୍ଧର ତୀବ୍ରତା ବୃଦ୍ଧି ମଧ୍ୟରେ ପାଲେଷ୍ଟାଇନ୍ ପ୍ରଧାନମନ୍ତ୍ରୀ ମହମ୍ମଦ ଶତୟହ ଇସ୍ତଫା ଦେଇଛନ୍ତି । ପାଲେଷ୍ଟାଇନ୍ ପ୍ରାଧିକରଣ (ପିଏ)ର ଅଧ୍ୟକ୍ଷ ତଥା ରାଷ୍ଟ୍ରପତି ମହମୁଦ ଅବ୍ବାସଙ୍କୁ ସୋମବାର ନିଜର ଇସ୍ତଫା ପତ୍ର ଦେଇଛନ୍ତି ମହମ୍ମଦ ଶତୟହ । ଓ୍ବେଷ୍ଟ ବ୍ୟାଙ୍କ ଓ ଜେରୁସାଲେମରେ ଅଶାନ୍ତି ଏବଂ ଗାଜାରେ ଯୁଦ୍ଧ ଏବଂ ନରସଂହାର ଯୋଗୁଁ ଏହି ଇସ୍ତଫା ଦେଉଛି ବୋଲି ସେ କହିଛନ୍ତି । ଯୁଦ୍ଧ ଅଶାନ୍ତିକୁ କମ୍ କରିବା ଲାଗି ନୂଆ ସରକାର ଏବଂ ବ୍ୟବସ୍ଥାର ଆବଶ୍ୟକତା ରହିଛି । ଆଉ ଏହି ନୂଆ ସରକାର ଗାଜାର ବାସ୍ତବିକତା ଏବଂ ପାଲେଷ୍ଟାଇନ୍ର ଏକତା ଦିଗରେ ବଳିଷ୍ଠ ପଦକ୍ଷେପ ଗ୍ରହଣ କରିବ ବୋଲି ଆଶା ପ୍ରକଟ କରିଛନ୍ତି ମହମ୍ମଦ ଶତୟହ ।
ପାଲେଷ୍ଟାଇନ୍ ପ୍ରାଧିକରଣକୁ ଭଙ୍ଗ କରି ନୂଆ ରାଜନୈତିକ ବାତାବରଣ ସୃଷ୍ଟି କରିବାକୁ ଆମେରିକାର ଚାପ ମଧ୍ୟରେ ଶତୟହଙ୍କ ଇସ୍ତଫା ଦେଇଛନ୍ତି । ଇସ୍ରାଏଲ ଏବଂ ହମାସ ଯୁଦ୍ଧ ଭିତରେ ଦେଶରେ ରାଜନୀତିର ଦୃଶ୍ୟପଟ୍ଟ ପରିବର୍ତ୍ତନ ନେଇ ଆମେରିକା ଆହ୍ବାନ ଦେଇଥିଲା । ସେପଟେ ପାଲେଷ୍ଟାଇନ୍କୁ ନିଜ ଅଧୀନରେ ନେବା ଅଭିଯୋଗକୁ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଖଣ୍ଡନ କରିଆସିଛନ୍ତି ।
୭ ଅକ୍ଟୋବର ୨୦୨୩ରେ ଦକ୍ଷିଣ ଇସ୍ରାଏଲରେ ହମାସର ଆକ୍ରମଣ ପରଠାରୁ ଯୁଦ୍ଧର ତୀବ୍ରତା ବୃଦ୍ଧି ପାଇବାରେ ଲାଗିଛି । ଇସ୍ରାଏଲର ପ୍ରତିଆକ୍ରମଣରେ ୨୯୦୦୦ରୁ ଅଧିକ ପାଲେଷ୍ଟାଇନ୍ ନାଗରିକଙ୍କ ମୃତ୍ୟୁ ହୋଇଥିବା ନେଇ ଗାଜାରେ ପରିଚାଳିତ ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି । ସେହିଭଳି ଅଧୀକୃତ ଓ୍ବେଷ୍ଟ ବ୍ୟାଙ୍କରେ ଇସ୍ରାଏଲର ଆକ୍ରମଣ ଯୋଗୁଁ ୪୦୧ ଜଣଙ୍କ ମୃତ୍ୟୁ ହୋଇଥିବା ନେଇ ପାଲେଷ୍ଟାଇନ୍ ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
