ଓ୍ବାଶିଂଟନ ଡିସି: ଆମେରିକାର ଫ୍ଲୋରିଡାରେ ବିମାନ ଦୁର୍ଘଟଣା । ଏହି ଦୁର୍ଘଟଣାରେ ପାଇଲଟଙ୍କ ସମେତ ୩ ଜଣଙ୍କ ମୃତ୍ୟୁ ହୋଇଛି । ଏହା ଏକ ଛୋଟ ବିମାନ ଥିବାରୁ ଏଥିରେ ଅଧିକ ଯାତ୍ରୀ ନଥିଲେ । ମୋବାଇଲ ଟାଓ୍ବାର ସହ ଧକ୍କା ହେବା ପରେ ବିମାନଟି ବିସ୍ଫୋରଣ ଘଟି ଜଳିଯାଇଥିଲା । ବିମାନ ଦୁର୍ଘଟଣା ଫ୍ଲୋରିଡାର କ୍ଲିୟରଓ୍ବାଟର ଟେଲର ପାର୍କରେ ଘଟିଛି ।
ଦୁର୍ଘଟଣାର ଶିକାର ହୋଇଥିବା ଏହି ବିମାନରେ ଗୋଟିଏ ଇଞ୍ଜିନ୍ ଥିଲା । ଦୁର୍ଘଟଣା ଘଟିବା ହେବା ପୂର୍ବରୁ ସିଙ୍ଗଲ ଇଞ୍ଜିନ୍ ବିଚକ୍ରାଫ୍ଟ ବୋନାଞ୍ଜା ଭି୩୫ ବିମାନର ଇଞ୍ଜିନରେ ତ୍ରୁଟି ଥିବା ନେଇ ଫେଡରାଲ୍ ଆଭିଏସନ୍ ଆଡମିନିଷ୍ଟ୍ରେସନ୍ (ଏଫଏଏ) ସୂଚନା ଦେଇଛି । କ୍ଲିୟରଓ୍ବାଟର ଅନ୍ତର୍ଜାତୀୟ ବିମାନ ବନ୍ଦରରୁ ମାତ୍ର ୩ ମାଇଲ୍ ଉତ୍ତରରେ ଥିବା ବେଳେ ରାଡାର ସହ ବିମାନର ଯୋଗଯୋଗ ବିଚ୍ଛିନ୍ନ ହୋଇଥିଲା । ହେଲେ ଏହା ପୂର୍ବରୁ ପାଇଲଟ ବିମାନକୁ ଜରୁରି ଅବତରଣ କରିବାକୁ ଅନୁମତି ମାଗିଥିଲେ ।
ବିମାନ ଦୁର୍ଘଟଣାର ବେଳର ଭିଡିଓ ସୋସିଆଲ ମିଡିଆରେ ସେୟାର କରାଯାଇଛି । ଏଥିରୁ ସ୍ପଷ୍ଟ ଭାବେ ଜଣାପଡ଼ିଛି ଯେ, ବିମାନ ଦୁର୍ଘଟଣା କେତେ ଭୟଙ୍କର ଥିଲା । ବିସ୍ଫୋରଣ ଘଟିବା ପରେ ହୁତୁ ହୁତୁ ହୋଇ ନିଆଁ ଜଳୁଥିବା ବେଳେ ଧୂଆଁ ବହୁତ ଉଚ୍ଚକୁ ଉଠୁଥିବା ନେଇ ଭିଡିଓରେ ଦେଖିବାକୁ ମିଳିଛି । ସେପଟେ ବିମାନ ଦୁର୍ଘଟଣା ନେଇ ଖବର ଶୁଣିବା ପରେ ଘଟଣାସ୍ଥଳରେ ଦମକଳବାହିନୀ ପହଞ୍ଚିଥିଲା ଏବଂ ନିଆଁକୁ ଆୟତ୍ତ କରିଥିଲା ।
