ନୂଆଦିଲ୍ଲୀ,୧୨/୦୨: ଦେଶର ୪୭ ସ୍ଥାନରେ ସୋମବାର ପୂର୍ବାହ୍ନରେ ଅନୁଷ୍ଠିତ ରାଷ୍ଟ୍ରୀୟ ରୋଜଗାର ମେଳାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଭାସୀ ମାଧ୍ୟମରେ ସମ୍ବୋଧିତ କରିବେ । ଏହି ଅବସରରେ ମୋଦି କେନ୍ଦ୍ର ସରକାରଙ୍କ ବିଭିନ୍ନ ବିଭାଗ, ରାଜ୍ୟ ସରକାର ଏବଂ କେନ୍ଦ୍ର ଶାସିତ ପ୍ରଦେଶରେ ୧ ଲକ୍ଷ ନବନିଯୁକ୍ତଙ୍କୁ ନିଯୁକ୍ତି ପତ୍ର ବଣ୍ଟନ କରିବେ । ଏହା ସହ କର୍ମଯୋଗୀ ଭବନ ସମନ୍ୱିତ କମ୍ପେ୍ଲକ୍ସର ପ୍ରଥମ ପର୍ଯ୍ୟାୟ ଭିତ୍ତିପ୍ରସ୍ତର ଦେବେ ପ୍ରଧାନମନ୍ତ୍ରୀ । ମିଶନ କର୍ମଯୋଗୀର ବିଭିନ୍ନ କ୍ଷେତ୍ରକୁ ଦୃଢ଼ କରିବା ସହ ଏହାର ପ୍ରୋତ୍ସାହନ ଓ ସହଭାଗିତା ଦ୍ୱାରା ଅଭିବୃଦ୍ଧିରେ ନୂଆ ପଦକ୍ଷେପ ସହାୟକ ହେବ ।
ସେହିଭଳି ଭୁବନେଶ୍ୱରରେ ଅନୁଷ୍ଠିତ ରାଷ୍ଟ୍ରୀୟ ରୋଜଗାର ମେଳାରେ କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ୩୦୦ ନବନିଯୁକ୍ତଙ୍କୁ ନିଯୁକ୍ତିପତ୍ର ଦେବାର କାର୍ଯ୍ୟକ୍ରମ ରହିଛି । ନବନିଯୁକ୍ତ ବିଭିନ୍ନ ମନ୍ତ୍ରଣାଳୟ ଓ ବିଭାଗ ଯଥା- ରାଜସ୍ୱ, ସୌରାଷ୍ଟ୍ର, ଉଚ୍ଚଶିକ୍ଷା, ଆଣବିକ ଶକ୍ତି, ପ୍ରତିରକ୍ଷା, ଆର୍ଥିକ ସେବା, ଜନଜାତି ବ୍ୟାପାର ଓ ରେଳପଥରେ ନିଯୁକ୍ତି ପାଇଛନ୍ତି ।
ଯୁବବର୍ଗଙ୍କ ନିଯୁକ୍ତି ପ୍ରଦାନକୁ ପ୍ରାଥମିକତା ଆଧାରରେ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତା ଆଧାରରେ ଏଭଳି ରୋଜଗାର ମେଳା ଆୟୋଜନ କରାଯାଉଛି । ଏହା ଦ୍ୱାରା ଯୁବବର୍ଗ ଦେଶର ବିକାଶରେ ନିଜକୁ ସାମିଲ କରାଇବା ସହ ସେମାନଙ୍କ ପାଇଁ ନୂଆ ସୁଯୋଗ ସୃଷ୍ଟି କରିବା ଓ ଶସକ୍ତିକରଣରେ ସହାୟକ ହେବ । ନବନିଯୁକ୍ତ ମାନେ କର୍ମଯୋଗୀ ପ୍ରାରମ୍ଭ ଦ୍ୱାରା ନିଜକୁ ତାଲିମ ପ୍ରଦାନ କରିବାର ସୁଯୋଗ ପାଇବେ । ଆଇଗଟ କର୍ମଯୋଗୀ ପୋର୍ଟାଲ ଦ୍ୱାରା ଅନଲାଇନ ମଡ୍ୟୁଲ ମାଧ୍ୟମରେ ପ୍ରଦାନ କରାଯାଉଥିବା ୮୮୦ରୁ ଉଦ୍ଧ୍ୱର୍ ଇ-ଲର୍ଣ୍ଣିଂ କୋର୍ସ ଯେକୌଣସି ସ୍ଥାନ ଓ ସମୟରେ ଶିଖିବାକୁ ସୁଯୋଗ ଦେବ ।