ନୂଆଦିଲ୍ଲୀ,୦୭/୧୨: ଏକ ପୂର୍ଣ୍ଣାଙ୍ଗ କ୍ରିକେଟ୍‌ ସିରିଜ ଖେଳିବା ପାଇଁ ଭାରତୀୟ ଦଳ ଇତି ମଧ୍ୟରେ ଦକ୍ଷିଣ ଆଫ୍ରିକା ଯାତ୍ରା କରିଛି । ଟି-ଟ୍ୱେଣ୍ଟି ଦଳ ପ୍ରଥମେ ଦକ୍ଷିଣ ଆଫ୍ରିକା ଗସ୍ତ କରିଛି । ଟେଷ୍ଟ ଦଳର ସଦସ୍ୟମାନେ ଧିରେ ଧିରେ ସେଠାରେ ପହଞ୍ଚିବେ । ଏହି ଗସ୍ତରେ ଭାରତ ୩ଟି ଟି-ଟ୍ୱେଣ୍ଟି, ୩ଟି  ଦିନିକିଆ ଓ ୨ଟି ଟେଷ୍ଟ ଖେଳିବ । ଉକ୍ତ ଗୁରୁତ୍ୱପୂର୍ଣ୍ଣ ସିରିଜରେ  ଖେଳାଳିମାନେ ମ୍ୟାଚ୍‌ ବିଜୟୀ ପ୍ରଦର୍ଶନ କରନ୍ତୁ ବୋଲି ମୁଖ୍ୟ  କୋଚ୍‌ ରାହୁଲ ଦ୍ରାବିଡ ପରାମର୍ଶ ଦେଇଛନ୍ତି । 

ସେ କହିଛନ୍ତି, ଦକ୍ଷିଣ ଆଫ୍ରିକାର ପିଚ୍‌ଗୁଡ଼ିକରେ ବ୍ୟାଟିଂ କରିବା କଷ୍ଟକର । ତେଣୁ ସିରିଜଟି ଆମ ପାଇଁ କଠିନ ଚ୍ୟାଲେଞ୍ଜ ହେବ । ପ୍ରତ୍ୟେକ ଖେଳାଳିମାନେ ନିଜ ନିଜ ପାଇଁ ସ୍ୱତନ୍ତ ରଣନୀତି ପ୍ରସ୍ତୁତ କରିବେ ବୋଲି ମୁଁ ଆଶା କରୁଛି । ମୋଟ୍‌ ଉପରେ କହିବାକୁ ଗଲେ ପ୍ରତ୍ୟେକ ଖେଳାଳିଙ୍କ ଯୋଗଦାନ ରହିବା ଜରୁରି । ପରିସ୍ଥିତି ଓ ଜଳବାୟୁକୁ ଧ୍ୟାନରେ ରଖି ଖେଳାଳିମାନେ ରଣନୀତି ପ୍ରସ୍ତୁତ କରିବେ । ମାନସିକ ସ୍ତରରେ ପ୍ରସ୍ତୁତ ହୋଇପାରିଲେ ଦକ୍ଷିଣ  ଆଫ୍ରିକାରେ ସଫଳତା ମିଳିବ ବୋଲି ଦ୍ରାବିଡ କହିଛନ୍ତି ।