ପୁରୀ,୦୨/୧୨: ଦୂର ହେବ ଜିଲ୍ଲାର ସ୍ୱାସ୍ଥ୍ୟ ସମସ୍ୟା । ଆଧୁନିକ ସ୍ୱାସ୍ଥ୍ୟ ସେବା ପାଇବେ ରୋଗୀ । ଆଧୁନିକ ସୁବିଧା ସହ ଶ୍ରୀଜଗନ୍ନାଥ ମେଡିକାଲ କଲେଜର ଟିଚିଂ ହସ୍ପିଟାଲ ଜାନୁଆରୀ ସୁଦ୍ଧା କାର୍ଯ୍ୟକାରୀ ହେବ । ତେବେ ପ୍ରାଥମିକ ଭାବେ ଏଠାରେ ୩ରୁ ୪ଟି ବିଭାଗ ଖୋଲିବ । ପରବର୍ତ୍ତୀ ପର୍ଯ୍ୟାୟରେ ବର୍ଷେରୁ ଦେଢ଼ ବର୍ଷ ମଧ୍ୟରେ ସଂପୂର୍ଣ୍ଣ ହସ୍ପିଟାଲଟି କାର୍ଯ୍ୟକାରୀ ହେବ । ପୂର୍ତ୍ତ ବିଭାଗ ମେଡିକାଲ କଲେଜର ନିର୍ମାଣ ଦାୟିତ୍ୱ ନେଇଛି । କଲେଜ ନିର୍ମାଣ କାର୍ଯ୍ୟ ପାଖାପାଖି ଅନ୍ତିମ ପର୍ଯ୍ୟାୟରେ ପହଞ୍ଚି ସାରିଲାଣି ।
କଲେଜରେ ପ୍ରାଥମିକ ଭାବେ ମେଡିସିନ, ମାନସିକ ରୋଗ ଏବଂ ଚର୍ମ ରୋଗ ବିଭାଗ ଖୋଲିବାକୁ ଯୋଜନା ରହିଛି । ଏହି ସବୁ ବିଭାଗରେ ଆଉଟଡୋର ଆବଶ୍ୟକ ହେଉ ନଥିବାରୁ ପ୍ରାଥମିକ ଭାବେ ଏହା ଖୋଲାଯିବ । ମାନବ ସମ୍ବଳ ଯୋଗାଡ଼, ମେଡିକାଲ ଉପକରଣ କ୍ରୟ ଏବଂ ଅନ୍ୟାନ୍ୟ ସମସ୍ତ ସୁବିଧା ଉପଲବ୍ଧ ହେବା ପରେ ଅନ୍ୟ ବିଭାଗଗୁଡ଼ିକ ଖୋଲିବ । ଏଠାରେ ମୋଡ୍ୟୁଲାର ଓଟି ରହିବ । ବର୍ତ୍ତମାନ ସୁଦ୍ଧା ଓଟି ନିର୍ମାଣ ସରିନି ।
ଏଣୁ ମୋଡ୍ୟୁଲାର ଓଟି ଖୋଲିବାକୁ ଆହୁରି ସମୟ ଲାଗିପାରେ ବୋଲି ଶ୍ରୀଜଗନ୍ନାଥ ମେଡିକାଲ କଲେଜର ଅଧ୍ୟକ୍ଷା ପ୍ରଫେସର ଡ. ସବିତା ମହାପାତ୍ର ସୂଚନା ଦେଇଛନ୍ତି । ଡିସେମ୍ବର ୩୧ରେ କଲେଜ ହ୍ୟାଣ୍ଡଓଭର ଏବଂ ଜାନୁଆରୀ ୧୧ରେ କାର୍ଯ୍ୟକାରୀ ହୋଇପାରେ ବୋଲି ଡ. ମହାପାତ୍ର କହିଛନ୍ତି । ପୂର୍ତ୍ତ ବିଭାଗ ଏହାର ନିର୍ମାଣ ଦାୟିତ୍ୱ ନେଇଛି । ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ରଶ୍ମୀରଞ୍ଜନ ସାହୁ ଏନେଇ କହିଛନ୍ତି, ୨୨୪.୫୬ କୋଟି ଟଙ୍କା ବ୍ୟୟରେ ଏହି ଟିଚିଂ ହସ୍ପିଟାଲ ନିର୍ମାଣ ହୋଇଛି । ଜାନୁଆରୀ ସୁଦ୍ଧା ଏହାକୁ ହସ୍ତାନ୍ତର କରିବାକୁ ଲକ୍ଷ୍ୟ ରହିଛି । ନିର୍ମାଣ କାର୍ଯ୍ୟ ପାଖାପାଖି ଶେଷ ହୋଇସାରିଲାଣି ।
ପ୍ରତ୍ୟେକ ମେଡିକାଲ କଲେଜର ନିଜସ୍ୱ ହସ୍ପିଟାଲ ରହିବା ବାଧ୍ୟତାମୂଳକ । ହେଲେ ଶ୍ରୀ ଜଗନ୍ନାଥ ମେଡିକାଲ କଲେଜର ନିଜସ୍ୱ ଟିଚିଂ ହସ୍ପିଟାଲ ନଥିବାରୁ ଏହାର ଛାତ୍ରଛାତ୍ରୀମାନେ ଜିଲ୍ଲା ସଦର ମୁଖ୍ୟ ଚିକିତ୍ସାଳୟରେ ଅଭ୍ୟାସ କରୁଛନ୍ତି । ନିଜସ୍ୱ ହସ୍ପିଟାଲ ଖୋଲିବା ପରେ ଛାତ୍ରଛାତ୍ରୀ ଏବଂ ପ୍ରଫେସରମାନେ ଆଉ ମୁଖ୍ୟ ଚିକିତ୍ସାଳୟକୁ ଆସି ରୋଗୀ ଦେଖିବେ ନାହିଁ । ଶ୍ରୀଜଗନ୍ନାଥ ମେଡିକାଲ କଲେଜର ଡାକ୍ତର ରହିବା ପରେ ମଧ୍ୟ ଜିଲ୍ଲା ମୁଖ୍ୟ ଚିକିତ୍ସାଳୟ ନିଅଁଟିଆ ଡାକ୍ତରରେ ଚାଲୁଛି । ଏଣୁ ଏହି ଡାକ୍ତରମାନେ ଚାଲିଯିବା ପରେ ମୁଖ୍ୟ ଚିକିତ୍ସାଳୟରେ ଡାକ୍ତର ଅଭାବଦେଖାଯାଇପାରେ ଏବଂ ରୋଗୀ ସେବା ବାଧାପ୍ରାପ୍ତ ହୋଇପାରେ ।
