କୋଲକାତା,୧୨/୦୨: ଆଗାମୀ ରାଜ୍ୟସଭା ନିର୍ବାଚନ ପାଇଁ ତୃଣମୂଳ କଂଗ୍ରେସ (ଟିଏମ୍ସି) ପ୍ରାର୍ଥୀଙ୍କ ନାମ ଘୋଷଣା କରିଛି । ଏମାନଙ୍କ ମଧ୍ୟରେ ସାମ୍ବାଦିକା ସାଗରିକା ଘୋଷ, ସୁସ୍ମିତା ଦେବ, ନାଦିମୁଲ୍ ହକ୍ ଏବଂ ମମତା ବାଲା ଠାକୁର ରହିଛନ୍ତି । ଏ ନେଇ ସୋସିଆଲ୍ ମିଡିଆରେ ଟିଏମ୍ସି କହିଛି ଯେ ରାଜ୍ୟସଭା ନିର୍ବାଚନ ପାଇଁ ଆମେ ଏହି ପ୍ରାର୍ଥୀମାନଙ୍କ ନାମ ଘୋଷଣା କରି ବେଶ୍ ଖୁସି । ସେମାନଙ୍କୁ ଆମର ହାର୍ଦ୍ଦିକ ଶୁଭେଚ୍ଛା । ତୃଣମୂଳର ବିଚାରଧାରା ସହିତ ସେମାନେ ପ୍ରତ୍ୟେକ ଭାରତୀୟଙ୍କ ଅଧିକାର ପାଇଁ କାର୍ଯ୍ୟ କରିବେ ବୋଲି ବିଶ୍ୱାସ।
ଉଲ୍ଲେଖଯୋଗ୍ୟ, ୫୯ ବର୍ଷୀୟା ସାଗରିକା ଘୋଷ ଜଣେ ସାମ୍ବାଦିକା, ଯେ କି ମୁଖ୍ୟତଃ ରାଜନୀତି ବ୍ୟାପାରରେ ସାମ୍ବାଦିକତା ପାଇଁ ଫୋକସ୍ କରିଥିଲେ । ଟାଇମ୍ସ ଅଫ୍ ଇଣ୍ଡିଆ, ଆଉଟ୍ଲୁକ୍ ମାଗାଜିନ୍ ଏବଂ ସିଏନ୍ଏନ୍-ଆଇବିଏନ୍ (ବର୍ତ୍ତମାନ ସିଏନ୍ଏନ୍-ନ୍ୟୁଜ୍୧୮) ଭଳି ବିଭିନ୍ନ ଗଣମାଧ୍ୟମ ସଂସ୍ଥାରେ ସେ କାର୍ଯ୍ୟ କରିଛନ୍ତି । ଜଣେ ଟେଲିଭିଜନ୍ ଆଙ୍କର୍ ଏବଂ ରାଜନୈତିକ ଭାଷ୍ୟକାର ଭାବେ ସେ ବେଶ୍ ଜଣାଶୁଣା । ସେ ଅନେକ ପୁସ୍ତକ ବି ଲେଖିଛନ୍ତି । ଟିଏମ୍ସି ଓ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ତାଙ୍କର ସୁସମ୍ପର୍କ ରହିଛି ।
ଉଲ୍ଲେଖଯୋଗ୍ୟ, ନିକଟରେ ନିର୍ବାଚନ କମିଶନ ୧୫ ରାଜ୍ୟରେ ୫୬ ରାଜ୍ୟସଭା ଆସନ ପାଇଁ ନିର୍ବାଚନ ତାରିଖ ଘୋଷଣା କରିଥିଲେ । ଫେବ୍ରୁଆରୀ ୨୭ରେ ନିର୍ବାଚନ ହୋଇ ସମାନ ଦିନରେ ଭୋଟ ଗଣତି ହେବ ।