ନୂଆଦିଲ୍ଲୀ: ଦିନିକିଆ ବିଶ୍ବକପ ୨୦୨୩ର ସେମିଫାଇନାଲରେ ପୁଣି ଥରେ ସାମ୍ନାସାମ୍ନି ହେବେ ଭାରତ ଏବଂ ନ୍ୟୁଜିଲାଣ୍ଡ କ୍ରିକେଟ ଟିମ୍ । ଚଳିତ ଟୁର୍ଣ୍ଣାମେଣ୍ଟରେ ନ୍ୟୁଜିଲାଣ୍ଡ ନିଜର ନବମ ତଥା ଶେଷ ଲିଗ୍ ମ୍ୟାଚ୍ରେ ଶ୍ରୀଲଙ୍କାକୁ ୫ ଓ୍ବିକେଟରେ ପରାସ୍ତ କରି ଚତୁର୍ଥ ସେମିଫାଇନାଲ ଲିଷ୍ଟରେ ପ୍ରାୟତଃ ସାମିଲ ହୋଇସାରିଛି । ଯଦିଓ ଏବେ ବି ପାକିସ୍ତାନ ଏବଂ ଆଫଗାନିସ୍ତାନ ଚତୁର୍ଥ ସେମିଫାଇନାଲିଷ୍ଟ ଦୌଡ଼ରେ ଅଛନ୍ତି କିନ୍ତୁ ଖରାପ ନେଟ୍ ରନରେଟ୍ ଯୋଗୁଁ ଦୁଇ ଟିମ୍ କ୍ବାଲିଫାଏ କରିପାରିବେ ନାହିଁ ।
ଟୁର୍ଣ୍ଣାମେଣ୍ଟର ପ୍ରଥମ ସେମିଫାଇନାଲ ମ୍ୟାଚ୍ ମୁମ୍ବାଇର ଓ୍ବାଙ୍ଖେଡେ ଷ୍ଟାଡିୟମରେ ନଭେମ୍ବର ୧୫ରେ ହେବ । ଏହି ପ୍ରଥମ ସେମିଫାଇନାଲ ମ୍ୟାଚ୍ ଇଣ୍ଡିଆ ଏବଂ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବା ନେଇ ଏକପ୍ରକାର ସ୍ପଷ୍ଟ । ପ୍ରଥମେ କ୍ବାଲିଫାଏ ହୋଇଥିବା ଭାରତୀୟ ଟିମ୍ ପଏଣ୍ଟ ଟେବୁଲର ଶୀର୍ଷରେ ରହିଥିବା ବେଳେ ନ୍ୟୁଜିଲାଣ୍ଡ କ୍ବାଲିଫାଏ ପରେ ଚତୁର୍ଥ ସ୍ଥାନରେ ରହିଛି । ଏହା ପୂର୍ବରୁ ୨୦୧୯ ବିଶ୍ବକପ ସେମିଫାଇନାଲରେ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଟକ୍କର ହୋଇଥିଲା । ହେଲେ ୧୮ ରନ୍ରେ ହାରିଥିଲା ଟିମ ଇଣ୍ଡିଆ ।
୨୦୧୯ରେ ପଏଣ୍ଟ ଟେବୁଲର ଶୀର୍ଷରେ ଭାରତ ଥିବା ବେଳେ ଚଳିତ ବିଶ୍ବକପ ଭଳି ସେତେବେଳେ ନ୍ୟୁଜିଲାଣ୍ଡ ଚତୁର୍ଥ ସ୍ଥାନରେ ରହିଥିଲା। ଟୁର୍ଣ୍ଣାମେଣ୍ଟର ଦ୍ବିତୀୟ ସେମିଫାଇନାଲ ମ୍ୟାଚ୍ କଥା କହିଲେ, ନଭେମ୍ବର ୧୬ରେ କୋଲକାତାର ଇଡେନ ଗାର୍ଡେନ୍ରେ ନମ୍ବର ୨ ଓ ୩ ଟିମ୍ ମଧ୍ୟରେ ଖେଳାଯିବ । ୨୦୨୩ ବିଶ୍ବକପର ଦ୍ବିତୀୟ ସେମିଫାଇନାଲ ମ୍ୟାଚ୍ ଦକ୍ଷିଣ ଆଫ୍ରିକା ଏବଂ ଅଷ୍ଟ୍ରେଲିଆ ମଧ୍ୟରେ ହେବ ।
ଦୁଇ ସେମିଫାନାଲ ବିଜୟୀ ଟିମଙ୍କ ମଧ୍ୟରେ ଫାଇନାଲ ମୁକାବିଲା ନଭେମ୍ବର ୧୯ରେ ଖେଳାଯିବ । ବିଶ୍ବକପର ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଫାଇନାଲ ଲଢ଼େଇ ହେବ । ଏହା ପୂର୍ବରୁ ୨୦୧୯ ବିଶ୍ବକପ ଫାଇନାଲରେ ଇଂଲଣ୍ଡ ଏବଂ ନ୍ୟୁଜିଲାଣ୍ଡ ସାମ୍ନାସାମ୍ନି ହୋଇଥିଲେ । ଏହି ମ୍ୟାଚ୍ରେ ନ୍ୟୁଜଲାଣ୍ଡକୁ ହରାଇ ଟାଇଟାଲ ଜିଣିଥିଲା ଇଂଲଣ୍ଡ । ହେଲେ ଏଥର ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡ ସେମିଫାଇନାଲରେ ବି ପ୍ରବେଶ କରିପାରି ନାହିଁ ।
