ଭୁବନ, ୨୯/୦୧ : ଅଜଣା ଗାଡି ଧକ୍କାରେ ଭାଲୁ ମୃତ। ଭୁବନ ଥାନା ନିକଟ ୫୩ ନଂ ଜାତୀୟ ରାଜପଥରେ ଏଭଳି ଘଟଣା ଘଟିଛି। ଜାତୀୟ ରାଜପଥ ଉପରେ ଏକ ଭାଲୁର ମୃତଦେହ ପଡିଥିବା ଦେଖିବାକୁ ମିଳିଛି ।
ଭାଲୁଟି ଖାଦ୍ୟ ଅନେଶ୍ବଣରେ ଭାରତୀ ପାହାଡରୁ ଜାତୀୟ ରାଜପଥ ୫୩ ପାର ହୋଇ ବ୍ରାହ୍ମଣୀ ନଦୀ ପଠାରେ ଥିବା ଆଖୁ କିଆରୀକୁ ଯାଉଥିବା ଅନୁମାନ କରାଯାଉଛି । ତେବେ ରାଜପଥ ପାର ହେବା ସମୟରେ କେହି ଅଜଣା ଗାଡି ଭାଲୁଟିକୁ ଧକ୍କା ଦେଇଛି। ଖବର ପାଇ ଭୁବନ ବନବିଭାଗ ଘଟଣାସ୍ଥଳରେ ପହଞ୍ଚି ମୃତ ଭାଲୁଟିକୁ ଉଦ୍ଧାର କରି କଞ୍ଚନବାହାଳୀ ନର୍ସରୀରେ ରଖିଥିଲେ। ପରେ ଢେଙ୍କାନାଳରୁ ଜଣେ ଡାକ୍ତରଙ୍କୁ ଡାକି ଭାଲୁଟିର ପୋଷ୍ଟ ମର୍ଟମ କରାଇ କଞ୍ଚନବାହାଳୀ ସଂରକ୍ଷିତ ଜଙ୍ଗଲରେ ପୋତିଥିବା ଜଣାପଡିଛି।
