ବ୍ରହ୍ମପୁର, ୦୩/୦୨ : ୬ ବର୍ଷ ପରେ ଗିରଫ ହେଲା ହତ୍ୟାକାରୀ। ତ୍ରିକୋଣୀୟ ପ୍ରେମରୁ ୨୦୧୭ରେ ଦିଗପହଣ୍ଡି ଥାନା ଅଞ୍ଚଳରେ ଏକ ହତ୍ୟାକାଣ୍ଡ ଘଟଣାରେ ଫେରାର ଥିବା ଅନ୍ୟତମ ଅଭିଯୁକ୍ତ ରାମ ମଲ୍ଲିକ ଗିରଫ ହୋଇଛି। ୬ ବର୍ଷ ପରେ ଦିଗପହଣ୍ଡି ପୋଲିସ ଗିରଫ କରିଛି । 

ସୂଚନାନୁଯାୟୀ, ୨୦୧୭ରେ ଦିଗପହଣ୍ଡି ଥାନା ଅଞ୍ଚଳରେ ତ୍ରିକୋଣୀୟ ପ୍ରେମରୁ ଏକ ହତ୍ୟାକାଣ୍ଡ ଘଟିଥିଲା। ଜଣେ ମହିଳାଙ୍କ ସହ ନିରଞ୍ଜନ ମଲ୍ଲିକଙ୍କ ପ୍ରେମ ସମ୍ପର୍କ ଗଢି ଉଠିଥିଲା। ଅଭିଯୁକ୍ତ ରାମ ମଲ୍ଲିକ ମଧ୍ୟ ମହିଳାଙ୍କ ପ୍ରେମରେ ପଡିଥିଲେ। ହେଲେ ମହିଳା ଜଣକ ନିରଞ୍ଜନ ମଲ୍ଲିକଙ୍କୁ ବାହା ହେବା ପାଇଁ ଚାହୁଁଥିଲେ। ରାମ ମଲ୍ଲିକ ଏଥିରେ ଉତ୍ତ୍ୟକ୍ତ ହୋଇ କିଛି ସହଯୋଗୀଙ୍କ ସହ ମିଶି ନିରଞ୍ଜନଙ୍କୁ ହତ୍ୟା କରିଥିଲେ। ଏହାପରେ ଶବକୁ ନେଇ ଜଙ୍ଗଲରେ ଫୋପାଡି ଦେଇଥିଲେ। 

ଏହି ଘଟଣାରେ ପୋଲିସ ପୂର୍ବରୁ ମାଧବ ଓରଫ ମିଟୁ ମଲ୍ଲିକ, ରଘୁ ମଲ୍ଲିକଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। କିନ୍ତୁ ରାମ ମଲ୍ଲିକ ସେତେବେଳେ ଫେରାର ହୋଇ ବେଙ୍ଗଲୁରୁ ଚାଲିଯାଇଥିଲେ । ନିରଞ୍ଜନଙ୍କ ଭାଇ ସୋମନାଥ ମଲ୍ଲିକ ୨୦୧୭ ମସିହା ଅଗଷ୍ଟ ୨୫ ତାରିଖରେ ନିଖୋଜ ନେଇ ଦିଗପହଣ୍ଡି ଥାନାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲେ। ଏବେ ରାମ ମଲ୍ଲିକ ନିଜ ଗାଁ ନିକଟରେ ଥିବା ଖବର ପାଇ ପୁଲିସ ଗିରଫ କରି ତାଙ୍କୁ କୋର୍ଟ ଚାଲାଣ କରିଥିବା ବ୍ରହ୍ମପୁର ଏସପି ସୂଚନା ଦେଇଛନ୍ତି ।