ବାରଙ୍ଗ, ୨୬।୨: ଏଜି ଛକରୁ ପିଛା କଲେ । ମାଷ୍ଟର କ୍ୟାଣ୍ଟିଂନରେ ଧରିଲେ । ବାଇକ ଚୋର ପଛେପଛେ ଗୋଡ଼ାଇଲେ ପବ୍ଲିକ୍ । ମାଷ୍ଟର କ୍ୟାଣ୍ଟିଂନ ରେଳ ଷ୍ଟେସନ ସମ୍ମୁଖରେ ଅତର୍କିତ ଭାବେ କିଛି ଯୁବକ ବାଇକ ଯୋଗେ ଆସି ସେଠାରେ ଏକ ଧଳା ରଙ୍ଗର ଆକ୍ଟିଭା ଉପରେ ବସିଥିବା ଜଣେ ଯୁବକଙ୍କ ଉପରେ ଅତର୍କିତ ଆକ୍ରମଣ କରିଥିଲେ । ରାସ୍ତାରେ ଘୋଷାଡ଼ି ପ୍ରବଳ ମାଡ଼ ମାରିବାରେ ଲାଗିଗଲେ ।
ଖବର ପାଇ ସ୍ଥାନୀୟ ଫାଣ୍ଡି ଅଧିକାରୀ ଏବଂ କିଛି ପୁଲିସ କର୍ମୀ ଘଟଣାସ୍ଥଳରେ ପହଁଞ୍ଚି ଉତ୍ୟକ୍ତ ଲୋକଙ୍କ କବଳରୁ ଯୁବକକୁ ଉଦ୍ଧାର କରି ସ୍ଥାନୀୟ ଫାଣ୍ଡିକୁ ନେଇଥିଲେ । ପରେ ଘଟଣା ସମ୍ପର୍କରେ ବୁଝିବା ବେଳକୁ, ସମ୍ପୃକ୍ତ ଯୁବକ ଜଣକ ଏଜି ଛକରେ ଜଣେ ବସ୍ ଚାଳକଙ୍କ ଆକ୍ଟିଭାକୁ ଚୋରି କରି ଖସି ଆସିବା ବେଳେ ସେଠାରେ ଅନ୍ୟ ଜଣେ ବସ୍ କର୍ମଚାରୀ ଦେଖି ଦେଇଥିଲେ । ସଙ୍ଗେ ସଙ୍ଗେ ସେଠାରେ ଉପସ୍ଥିତ ଥିବା କେତେକ ବସ୍ କର୍ମଚାରୀ ଏକତ୍ରିତ ହୋଇ ବାଇକ ଯୋଗେ ଯୁବକ ଜଣକୁ ପିଛା କରି ମାଷ୍ଟର କ୍ୟାଣ୍ଟିଂନ ରେଳ ଷ୍ଟେସନ ସମ୍ମୁଖରେ ମାଡ଼ି ବସିଥଲେ ।