ବେନୋନି: ୧୯ ବର୍ଷରୁ କମ୍ ବିଶ୍ବକପ୍ରେ ଭାରତୀୟ ଟିମ୍ର କମାଲ । ସେମି ଫାଇନାଲରେ ଦକ୍ଷିଣ ଆଫ୍ରିକାକୁ ହରାଇ ଫାଇନାଲରେ ପ୍ରବେଶ କରିଛି ଭାରତ । ଅଧିନାୟକ ଉଦୟ ଶରଣଙ୍କ ଅଧିନାୟକତ୍ଵ ଇନିଂସ ଓ ସଚିନ ଦାସଙ୍କ ଦମଦାର ଅର୍ଦ୍ଧଶତକ ବଳରେ ୧୯ ବର୍ଷରୁ କମ ଭାରତୀୟ ଦଳ ଦକ୍ଷିଣ ଆଫ୍ରିକାକୁ ୩ ଓ୍ଵିକେଟରେ ପରାସ୍ତ କରିଛି । ଏଥିସହ ଭାରତ ୨୦୨୦ରୁ କ୍ରମାଗତ ୩ ଥର ଫାଇନାଲରେ ପ୍ରବେଶ କରିଛି । ଏହାସହ ମୋଟ୍ ୯ ଥର ଫାଇନାଲ ମୁକାବିଲା ଖେଳିବାକୁ ଯାଉଛି ଭାରତ ।
ଆଜି ବେନୋନିରେ ଖେଳା ଯାଇଥିବା ମୁକାବିଲାରେ ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ଲୁହାନ ପ୍ରିଟୋରିୟସଙ୍କ ୭୬ ରନ ଓ ରିଚାର୍ଡଙ୍କ ୬୪ ରନ ବଳରେ ୭ ଓ୍ଵିକେଟ୍ ହରାଇ ୨୪୪ ରନର ଲଢୁଆ ସ୍କୋର କରିଥିଲା । ଜବାବରେ ସଚିନ ଦାସଙ୍କ ଚମତ୍କାର ୯୬ ରନ ଓ ଅଧିନାୟକ ଉଦୟ ଶରଣଙ୍କ ଲଢୁଆ ୮୧ ରନ ବଳରେ ଭାରତ ୪୮.୫ ଓଭରରେ ୮ ଓ୍ଵିକେଟ୍ ହରାଇ ଲକ୍ଷ୍ୟ ହାସଲ କରିଛି।
ଭାରତୀୟ ଦଳ ଆରମ୍ଭରୁ ବ୍ୟାଟିଂ ବିପର୍ଯ୍ୟୟ ଭୋଗିଥିଲା । ପ୍ରଥମ ବଲରେ ଆଦର୍ଶ ସିଂ(୦)ଙ୍କ ଓ୍ଵିକେଟ୍ ହରାଇଥିଲା ଦଳ । ପୁଣି ୮ ରନ ବେଳକୁ ମୁଶିର ଖାନ(୪) ଆଉଟ୍ ହୋଇଥିଲେ । ଏହା ପରେ ଅର୍ଶିନ କୁଲକର୍ଣ୍ଣି(୧୨) ଓ ପ୍ରିୟାଂଶୁ ମୋଲିଆ(୫) ପାଭିଲିୟନ ଫେରିଥିଲେ । ୩୨ ରନରେ ୪ ଓ୍ଵିକେଟ୍ ହରାଇ ସଙ୍କଟରେ ପଡିଥିବା ଭାରତର ଇନିଂସ ସମ୍ଭାଳିଥିଲେ ଅଧିନାୟକ ଉଦୟ ଶରଣ ଓ ସଚିନ ଦାସ । ସଚିନ ଦ୍ରୁତ ବ୍ୟାଟିଂ କରି ଅର୍ଦ୍ଧଶତକ ହାସଲ କରିଥିଲେ । ଦୁଇ ବ୍ୟାଟର ପଞ୍ଚମ ଓ୍ଵିକେଟ୍ ପାଇଁ ୧୭୧ ରନ ଯୋଡ଼ି ଦଳର ସ୍କୋରକୁ ୨୦୩ରେ ପହଞ୍ଚାଇବା ସହ ଦଳକୁ ବିଜୟର ଦ୍ଵାର ଦେଶରେ ପହଞ୍ଚାଇଥିଲେ ।
ମ୍ୟାଚ୍ରେ ସଚିନ ଦାସ ୯୫ ବଲରେ ୧୧ଟି ଚୌକା ଏବଂ ଗୋଟିଏ ଛକା ସହ ୯୬ ରନ୍ କରି ଆଉଟ ହୋଇଥିଲେ । ଏହା ପରେ ଦଳର ଦାୟିତ୍ବ ସମ୍ଭାଳିଥିଲେ ଉଦୟ ଶରଣ । ସେ ୧୨୪ ବଲରେ ୬ ଚୌକା ସହ ୮୧ ରନ୍ କରି ରନ୍ ଆଉଟ ହୋଇଥିଲେ । ଉଦୟ ଶରଣ ଆଉଟ ହେଲା ବେଳକୁ ଦଳକୁ ମାତ୍ର ଗୋଟିଏ ରନ୍ର ଆବଶ୍ୟକତା ଥିଲା । ଉଦୟଙ୍କ ପରେ କ୍ରିଜ୍କୁ ନମନ ତିଓ୍ବାରି ଆସିଥିବା ବେଳେ ପୂର୍ବରୁ ରାଜ ଲିମ୍ବାନୀ ଥିଲେ । ଶେଷରେ ୮ ଓ୍ବିକେଟ ହରାଇ ଟିମ୍ ଇଣ୍ଡିଆ ବିଜୟ ହାସଲ କରିବା ସହ ଫାଇନାଲରେ ପ୍ରବେଶ କରିଛି ।