ନୂଆଦିଲ୍ଲୀ,୧୦/୧୧: ୱେଷ୍ଟଇଣ୍ଡିଜ୍‌ର ମହାନ ବ୍ୟାଟର ଭିଭିଆନ୍‌ ରିଚାର୍ଡ୍ସ ଭାରତର ଷ୍ଟାର୍‌ ବ୍ୟାଟର ବିରାଟ କୋହଲିଙ୍କ ପ୍ରଶଂସାରେ  ଶତମୁଖ ହୋଇ ପଡ଼ିଛନ୍ତି । ସେ କୋହଲିଙ୍କୁ କ୍ରିକେଟ୍‌ ର ଅମୂଲ୍ୟ ସମ୍ପତ୍ତି ବୋଲି ବିବେଚିତ  କରିଛନ୍ତି । ଅଧାସାଧାରଣ ମାନସିକ ଶକ୍ତି ତାଙ୍କୁ ସର୍ବକାଳୀନ ଶ୍ରେଷ୍ଠ ଖେଳାଳି ଭାବେ ପରିଚୟ  ଦେଇଛି ବୋଲି ରିଚାର୍ଡ୍ସ ପ୍ରକାଶ କରିଛନ୍ତି । 

ରିଚାର୍ଡ୍ସ କହିଛନ୍ତି, କୋହଲି ଜଣେ ଉତ୍ସାହି  ଖେଳାଳି । ଅସୀମ ମାନସିକ ଶକ୍ତି ତାଙ୍କୁ ଅନ୍ୟମାନଙ୍କଠୁ ଭିନ୍ନ କରିଛି । ତାଙ୍କ ଭଳି ଖେଳାଳି  ଏବଂ ବ୍ୟକ୍ତି ବହୁତ କମ୍‌ ଦେଖିବାକୁ ମିଳନ୍ତି । ବିଶ୍ୱକପ୍‌ ପୂର୍ବରୁ ସେ ଖରାପ ସମୟ ଦେଇ ଗତି କରିଥିଲେ । ଏପରିକି ତାଙ୍କୁ ଦଳରୁ ବାଦ୍‌ ଦିଆଯାଉ ବୋଲି ଅନେକ କହିଥିଲେ । ପୂର୍ବଭଳି ପୁଣିଥରେ ସେ ସମସ୍ତଙ୍କୁ ଭୁଲ ପ୍ରମାଣିତ କଲେ । ତାଙ୍କର ପ୍ରଦର୍ଶନ ଅଦ୍ଭୁତ । ମୁଁ ତାଙ୍କର ଜଣେ ବଡ଼ ପ୍ରଶଂସକ । ସେ ନିଜ ପ୍ରଦର୍ଶନ ମାଧ୍ୟମରେ  ସର୍ବକାଳୀନ ଖେଳାଳିଙ୍କ ମଧ୍ୟରେ ଅନ୍ୟତମ ବୋଲି  ପ୍ରମାଣିତ କରି ଆସିଛନ୍ତି । ବିଶ୍ୱକପ୍‌ରେ ତାଙ୍କର ସଫଳ ପ୍ରଦର୍ଶନ ପାଇଁ ଟିମ୍‌ ମ୍ୟାନେଜମେଣ୍ଟ ଏବଂ ସହକାରୀ ଷ୍ଟାଫ୍‌ଙ୍କୁ ଶ୍ରେୟ ଦିଆଯିବା ଉଚିତ । ସେମାନେ କୋହଲିଙ୍କୁ ସମର୍ଥନ ଏବଂ ଉତ୍ସାହିତ  କରିବା ଜାରି ରଖିଥିଲେ । ବିଶ୍ୱକପ୍‌ରେ ଭାରତୀୟ ଦଳ ଯେଉଁଭଳି ଆଧିପତ୍ୟ ବିସ୍ତାର କରି ଖେଳୁଛି, ନିଶ୍ଚିତ ଭାବେ ଦଳ ଚାମ୍ପିଅନ୍‌ ହେବ ।