ନୂଆଦିଲ୍ଲୀ, ୧୨/୦୨: ଲୋକସଭା ନିର୍ବାଚନ ଲାଗି ଜୋରଦାର୍ ପ୍ରସ୍ତୁତି ଆରମ୍ଭ କରି ଦେଇଛନ୍ତି ସବୁ ଦଳ । ତେବେ ଏଯାଏ ନିର୍ବାଚନ ଆୟୋଗ କୌଣସି ଅଧିକାରିକ ଘୋଷଣା କରି ନାହାନ୍ତି । ୧୮ତମ ଲୋକସଭା ଲାଗି ଏପ୍ରିଲ୍-ମେରେ ନିର୍ବାଚନ ହେବା ସମ୍ଭାବନା ରହିଛି । ନିର୍ବାଚନ ଆୟୋଗ ଫେବ୍ରୁଆରୀ ଶେଷ କିମ୍ବା ମାର୍ଚ୍ଚ ପ୍ରଥମ ସପ୍ତାହରେ କରି ପାରନ୍ତି ନିର୍ବାଚନ ତାରିଖ ଘୋଷଣା ।

୧୭ତମ ଲୋକସଭାର କାର୍ଯ୍ୟକାଳ ୨୦୨୪ ଜୁନ୍ ୧୬ରେ ସରୁଛି । ଗତ ଲୋକସଭା ନିର୍ବାଚନ ୨୦୧୯ ଏପ୍ରିଲରୁ ମେ ମଧ୍ୟରେ ହୋଇଥିଲା । ୨୦୧୯ରେ ବିଜେପି ୩୦୩ ଆସନରେ ବିପୁଳ ବିଜୟ ହାସଲ କରିଥିଲା । ବିଜେପି ନେତୃତ୍ୱାଧିନ ଏନଡିଏକୁ ମିଳିଥିଲା ୩୫୩ ଆସନ । ନରେନ୍ଦ୍ର ମୋଦି ହୋଇଥିଲେ ଦ୍ୱିତୀୟ ଥର ଲାଗି ପ୍ରଧାନମନ୍ତ୍ରୀ ।

ଏବେ ସୁଦ୍ଧା ନିର୍ବାଚନ ଆୟୋଗ ଭୋଟ୍ ସମ୍ବନ୍ଧୀୟ କୌଣସି ତଥ୍ୟ ଘୋଷଣା କରି ନାହାନ୍ତି । ତେବେ କୁହାଯାଉଛି, ୨୦୨୪ ନିର୍ବାଚନ ୭ ପର୍ଯ୍ୟାୟରେ ହୋଇପାରେ । ୨୦୧୯ ନିର୍ବାଚନ ୭ଟି ପର୍ଯ୍ୟାୟରେ ସରିଥିଲା । ଆଶା କରାଯାଉଛି ୨୦୧୯ ଭଳି ୨୦୨୪ ନିର୍ବାଚନ ମଧ୍ୟ ଏପ୍ରିଲରେ ନିର୍ବାଚନ ହୋଇ ମେ ମାସରେ ଆସିବ ଫଳାଫଳ ।

ତେବେ ୨୦୧୯ରୁ ୨୦୨୪ ୫ ବର୍ଷ ମଧ୍ୟରେ ବିରୋଧୀଙ୍କ ରୂପ ବଦଳିଛି । ପୂର୍ବରୁ ଏନଡିଏରେ ଥିବା କିଛିଦଳ ଏବେ ଏନଡିଏ ବିରୋଧରେ ଅଛନ୍ତି । ଏହାଛଡ଼ା ୨୦୧୯ରେ ଅଲଗା ଅଲଗା ନିର୍ବାଚନ ଲଢ଼ିଥିବା କିଛିଦଳ ବିଜେପିକୁ ରୋକିବାକୁ ଏକାଠି ଲଢ଼ି ପାରନ୍ତି ନିର୍ବାଚନ । 

ବିରୋଧୀ ମେଣ୍ଟ ଇଣ୍ଡିଆରେ କଂଗ୍ରେସ, ଟିଏମସି, ସମାଜବାଦୀ ପାର୍ଟି, ଆପ୍, ଡିଏମକେ, ଶିବସେନା (ଉଦ୍ଧବ ଗୋଷ୍ଠୀ) ସାମିଲ୍ ହୋଇଛନ୍ତି । ମେଣ୍ଟରେ ଆସନ୍ ବଣ୍ଟାକୁ ନେଇ ଫାଟ ଖବର ସାମ୍ନାକୁ ଆସୁଛି । ବିରୋଧୀଙ୍କୁ ଏକାଠି କରୁଥିବା ନୀତୀଶ କୁମାର ଏନଡିଏରେ ମିଶିଛନ୍ତି । ସେପଟେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସମସ୍ତ ଆସନରେ ଏକାକୀ ନିର୍ବାଚନ ଲଢ଼ିବାକୁ ପ୍ରସ୍ତୁତ ହେଉଛନ୍ତି । ସେହିଭଳି ପଞ୍ଜାବରେ ମଧ୍ୟ ଆପ୍ ଏକାକୀ ନିର୍ବାଚନ ଲଢ଼ିବ ବୋଲି ଘୋଷଣା କରିଛି ।