ନୂଆଦିଲ୍ଲୀ ୦୪/୧୧: ଉତ୍ତରପୂର୍ବ ଫ୍ରାନ୍ସର ମାଟି ତଳେ ଜୀବାଶ୍ମ ଇନ୍ଧନ ଅନ୍ୱେଷଣ କରୁଥିବା ଦୁଇଜଣ ବୈଜ୍ଞାନିକ ଧଳା ଉଦ୍ଯାନ ଅର୍ଥାତ୍ ହ୍ୱାଇଟ୍ ହାଇଡ୍ରୋଜେନ୍ର ବିଶାଳ ଭଣ୍ଡାର ଠାବ କରିଛନ୍ତି । ପ୍ରାରମ୍ଭିକ ଆକଳନ ଅନୁସାରେ, ଅଦ୍ୟାବଧି ଆବିଷ୍କୃତ ଧଳା ଉଦ୍ଯାନର ଏହା ଅନ୍ୟତମ ସର୍ବବୃହତ ଭଣ୍ଡାର । ଏଠାରେ ୬ ନିୟୁତରୁ ୨୫୦ ନିୟୁତ ମେଟ୍ରିକ ଟନ୍ ଉଦ୍ଯାନ ଗଚ୍ଛିତ ଥିବା ଅନୁମାନ କରାଯାଉଛି । ଧଳା ଉଦ୍ଯାନ ଗୋଲ୍ଡେନ୍ ହାଇଡ୍ରୋଜେନ୍ ନାମରେ ମଧ୍ୟ ପରିଚିତ । ଜଳବାୟୁ ସଙ୍କଟରୁ ପୃଥିବୀକୁ ରକ୍ଷା କରିବାରେ ଏହା ଅତ୍ୟନ୍ତ ସହାୟକ ହେବ ବୋଲି ବୈଜ୍ଞାନିକମାନେ କହିଛନ୍ତି ।
ଫ୍ରାନ୍ସର ନ୍ୟାସନାଲ ସେଣ୍ଟର ଅଫ୍ ସାଇଣ୍ଟିଫିକ୍ ରିସର୍ଚ୍ଚର ଉଭୟ ନିର୍ଦ୍ଦେଶକ ଜ୍ୟାକ୍ୟୁସ୍ ପାଇରୋନନ୍ ଓ ଫିଲିପ ଡି ଡୋନାଟୋ ଲୋରେନ୍ ଖଣି ତଳେ ଏକ ସ୍ୱତନ୍ତ୍ର ମେସିନ୍ ଜରିଆରେ ଜୀବାଶ୍ମ ଇନ୍ଧନ ଅନ୍ୱେଷଣ କରୁଥିଲେ । ଉକ୍ତ ମେସିନ୍ ଭୂମିଠୁ ୨୦୦ ମିଟର ତଳେ କମ୍ ସାନ୍ଦ୍ରତାର ଉଦ୍ଯାନ ଠାବ କଲା । ଅଧିକ ଗଭୀରକୁ ଯାଞ୍ଚ୍ କରିବା ସହିତ ଏହି ସାନ୍ଦ୍ରତା ବଢ଼ିଲା । ୧୧ଶହ ମିଟର ତଳେ ଉଦ୍ଯାନର ସାନ୍ଦ୍ରତା ୧୪ ପ୍ରତିଶତ ଏବଂ ୧,୨୫୦ ମିଟର ତଳେ ୨୦ ପ୍ରତିଶତ ଥିଲା । ଏହା ଆଶ୍ଚର୍ଯ୍ୟଜନକ ବୋଲି ପାଇରୋନନ୍ କହିଛନ୍ତି । ଭୂମି ତଳେ ଉଦ୍ଯାନର ଏକ ବିଶାଳ ଭଣ୍ଡାର ଥିବା ଏଥିରୁ ସ୍ପଷ୍ଟ ହେଲା । ଧଳା ଉଦ୍ଯାନ ପ୍ରାକୃତିକ, ସୁନା ଓ ଭୂଗର୍ଭ ଉଦ୍ଯାନ ଭାବେ ବେଶ ପରିଚିତ । ପୃଥିବୀ ପୃଷ୍ଠର ଠିକ୍ ତଳେ ଏହା ପ୍ରାକୃତିକ ରୂପେ ଉତ୍ପନ୍ନ ହୁଏ କିମ୍ବା ମହଜୁଦ ଥାଏ ।
ଜଳବାୟୁ ରକ୍ଷାକାରୀ ପବିତ୍ର ଭଣ୍ଡାର ରୂପେ ଏହାକୁ ବିବେଚନା କରାଯାଏ । ଉଦ୍ଯାନ ଯେତେବେଳେ ଜଳେ, କେବଳ ଜଳ ଉତ୍ପନ୍ନ ହୁଏ । ମାତ୍ରାଧିକ ଶକ୍ତି ଆବଶ୍ୟକ କରୁଥିବା ଉଡ୍ଡୟନ, ନୌ ପରିବହନ ଓ ଷ୍ଟିଲ୍ ନିର୍ମାଣ ଭଳି ଉଦ୍ୟୋଗ ପାଇଁ ଗୁରୁତ୍ୱପୂର୍ଣ୍ଣ ସ୍ୱଚ୍ଛ ଶକ୍ତି ଉତ୍ସ ଭାବେ ଏହା ଅତ୍ୟନ୍ତ ଉପଯୋଗୀ । କିନ୍ତୁ ବ୍ରହ୍ମାଣ୍ଡରେ ସବୁଠୁ ପ୍ରଚୁର ମାତ୍ରାରେ ମହଜୁଦ ତତ୍ତ୍ୱ ହୋଇଥିବାରୁ ଏଥିରେ ଅନ୍ୟ କଣିକା ମିଶି ରହିଛି । ଏବେ ଆପାତତଃ ସମ୍ପୂର୍ଣ୍ଣ ଜୀବାଶ୍ମ ଇନ୍ଧନ ଦ୍ୱାରା ପରିଚାଳିତ ଶକ୍ତି-ଗହନ ପ୍ରକ୍ରିୟାରେ ବ୍ୟବସାୟିକ ଉଦ୍ଯାନ ଉତ୍ପାଦନ ହେଉଛି । ଜଳବାୟୁ ଦୃଷ୍ଟିକୋଣରୁ ସବୁଠୁ ଆଶାଜନକ ହେଉଛି ସବୁଜ ଉଦ୍ଯାନ, ଯାହା ଜଳ ବିଭାଜନ ଲାଗି ପୁନଃନବୀକରଣଯୋଗ୍ୟ ଶକ୍ତି ପ୍ରୟୋଗ ମାଧ୍ୟମରେ ପ୍ରସ୍ତୁତ ହୁଏ । ଏହାର ଉତ୍ପାଦନ କମ୍ ପରିମାଣରେ ହେଉଛି । ସେଥିପାଇଁ ପ୍ରଚୁର, ସ୍ୱଚ୍ଛ ଜାଳେଣି ଶକ୍ତିର ଅନାଲୋଚିତ ସ୍ରୋତ ଧଳା ଉଦ୍ଯାନ ପ୍ରତି ଗତ କିଛି ବର୍ଷ ହେଲା ରୁଚି ବଢ଼ିଛି ।
