ନୂଆଦିଲ୍ଲୀ ୨୬/୦୧: ଭୋପାଳର ପରିବାର ଅଦାଲତରେ ଏକ ଅଜବ ମାମଲା ପହଞ୍ଚିଛି । ଜଣେ ନବବିବାହିତା ମହିଳା ସ୍ୱାମୀଙ୍କଠାରୁ ଛାଡ଼ପତ୍ର ପାଇଁ ଆବେଦନ କରିଛନ୍ତି । ତେବେ ଏହାର କାରଣ ଜାଣିଲେ ଆପଣ ଆଶ୍ଚର୍ଯ୍ୟ ହେବେ । ବିବାହ ପରେ ହନିମୁନ୍ରେ ଗୋଆ ଓ ଦକ୍ଷିଣ ଭାରତ ଯିବାକୁ ମହିଳାଙ୍କ ସ୍ୱାମୀ କଥା ଦେଇଥିଲେ । କିନ୍ତୁ ଏହା ବଦଳରେ ତାଙ୍କୁ ଅଯୋଧ୍ୟା ଓ ବାରାଣସୀ ଗସ୍ତରେ ନେଲେ । ଗସ୍ତରୁ ଫେରିବାର ୧୦ ଦିନ ପରେ ନବବିବାହିତା ସ୍ୱାମୀଙ୍କଠାରୁ ଛାଡ଼ପତ୍ର ପାଇଁ କୋର୍ଟରେ ଆବେଦନ କଲେ ।
ଗତ ଅଗଷ୍ଟ ମାସରେ ପିପଲାନି ବାସିନ୍ଦା ଏହି ଦମ୍ପତି ବିବାହ କରିଥିଲେ । ଛାଡ଼ପତ୍ର ଆବେଦନ ପତ୍ରରେ ମହିଳା ଦାବି କରିଛନ୍ତି ଯେ ଚାକିରିରୁ ସେ ଭଲ ଦରମା ପାଉଛନ୍ତି । ଆଇଟିରେ କାର୍ଯ୍ୟରତ ତାଙ୍କ ସ୍ୱାମୀଙ୍କ ଦରମା ମଧ୍ୟ ବେଶ ଅଧିକ । ତେଣୁ ହନିମୁନ୍ ଲାଗି ବିଦେଶ ଯିବାରେ ସେମାନଙ୍କର କୌଣସି ଅସୁବିଧା ନାହିଁ । କିନ୍ତୁ ତାଙ୍କ ସ୍ୱାମୀ ନିଜ ମା’ବାପାଙ୍କ ସ୍ୱାସ୍ଥ୍ୟ ସମସ୍ୟା ଦର୍ଶାଇ ପତ୍ନୀଙ୍କ ବିଦେଶ ଭ୍ରମଣ ପ୍ରସ୍ତାବକୁ ଖଣ୍ଡନ କଲେ । ତା’ପରେ ଗୋଆ ଓ ଦକ୍ଷିଣ ଭାରତ ଭ୍ରମଣ ଲାଗି ସେ ରାଜି ହେଲେ । କିନ୍ତୁ ଚଳିତ ମାସ ଆରମ୍ଭରେ ସେ ଅଯୋଧ୍ୟା ଓ ବାରାଣସୀକୁ ଟିକେଟ୍ ବୁକ୍ କଲେ । ଗତ ୨୨ ତାରିଖରେ ରାମ ମନ୍ଦିର ପ୍ରାଣ ପ୍ରତିଷ୍ଠା ପୂର୍ବରୁ ତାଙ୍କ ମା’ ଅଯୋଧ୍ୟା ଭ୍ରମଣ କରିବାକୁ ଚାହୁଁଥିଲେ, ତେଣୁ ସେ ସେଠାକୁ ଟିକେଟ୍ ବୁକ୍ କଲେ । କିନ୍ତୁ ଅଯୋଧ୍ୟା-ବାରାଣସୀ ଗସ୍ତର ଦିନକ ପୂର୍ବରୁ ସ୍ୱାମୀ ତାଙ୍କୁ ଜଣାଇଲେ ବୋଲି ମହିଳା କହିଛନ୍ତି ।
ଶେଷ ମୁହୂର୍ତ୍ତରେ ମହିଳା ଜଣକ ଏ ନେଇ ପ୍ରତିବାଦ କଲେ ନାହିଁ । କିନ୍ତୁ ଗସ୍ତରୁ ଫେରିବା ପରେ ଛାଡ଼ପତ୍ର ଆବେଦନ କଲେ । ଅନ୍ୟପକ୍ଷେ, ସ୍ୱାମୀ ପରିବାର ଅଦାଲତରେ କହିଛନ୍ତି ଯେ ପତ୍ନୀ ଘଟଣାକୁ ଅଧିକ ବଢ଼ାଇ ଚଢ଼ାଇ କହୁଛନ୍ତି । ଉଭୟଙ୍କର କାଉନ୍ସେଲିଂ ଚାଲିଥିବା ଜଣେ ଓକିଲ କହିଛନ୍ତି ।
