ସୁରଟ: ଡିସେମ୍ବର ୧୭ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୁରଟରେ ନବନିର୍ବିତ ଦୁନିଆର ସବୁଠୁ ବଡ଼ ଅଫିସ୍ ବିଲ୍ଡିଂର ଉଦଘାଟନ କରିବେ । ସୁରଟ ଡାଇମଣ୍ଡ ବୋର୍ସ (ଏସଡିବି) କୋଠା ପ୍ରାୟ ୩,୫୦୦ କୋଟି ଟଙ୍କାରେ ନିର୍ମିତ ହୋଇଛି । ୬୭ ଲକ୍ଷ ବର୍ଗଫୁଟ ଅଞ୍ଚଳରେ ବ୍ୟପିଥିବା ଏହି କୋଠାରେ ୪୫୦୦ରୁ ଅଧିକ ହୀରା ସଂପର୍କିତ କାର୍ଯ୍ୟାଳୟ ରହିଛି ।
୨୦୨୩ ଅଗଷ୍ଟ ମାସରେ ହୀରା ଗବେଷଣା ଏବଂ ମର୍କାନଟାଇଲ ସିଟି (ଡ୍ରିମ୍) ପ୍ରକଳ୍ପ ଅଧୀନରେ ନିର୍ମାଣ ହୋଇଥିବା ଏହି ବିଲ୍ଡିଂ ଦୁନିଆର ସବୁଠାରୁ ବଡ଼ ଅଫିସ ଭାବେ ଗିନୀଜ ଓ୍ବାର୍ଲଡ ରେକର୍ଡରେ ସ୍ଥାନ ପାଇଛି । ୩୫.୫୪ ଏକର ସ୍ଥାନରେ ଏହି ବିଶାଳ ନିର୍ମାଣ କାର୍ଯ୍ୟ ହୋଇଥିବା ବେଳେ ଏହି ବିଲ୍ଡିଂରେ ୧୫ ମହଲାରୁ ଅଧିକ ରହିଛି । ନଅଟି ଆୟତକ୍ଷେତ୍ର ଟାୱାର ଏକ କେନ୍ଦ୍ରୀୟ ମେରୁଦଣ୍ଡ ଦ୍ୱାରା ସଂଯୁକ୍ତ ହୋଇଛି ।
ଆୟୋଜକଙ୍କ ଅନୁଯାୟୀ, ଉଦଘାଟନୀ କାର୍ଯ୍ୟକ୍ରମ ପାଇଁ ସମସ୍ତ ବ୍ୟବସ୍ଥା କରାଯାଇଛି ଏବଂ ଦେଶ ତଥା ବିଦେଶର ପ୍ରାୟ ୭୦ ହଜାର ଲୋକଙ୍କୁ ନିମନ୍ତ୍ରଣ ପଠାଯାଇଛି । ଗତ କିଛି ସପ୍ତାହ ମଧ୍ୟରେ ଅନେକ ହୀରା ବାଣିଜ୍ୟ ସଂସ୍ଥା ଏସଡିବିରେ ଥିବା କାର୍ଯ୍ୟାଳୟରେ କାର୍ଯ୍ୟ ଆରମ୍ଭ କରିସାରିଛନ୍ତି। ଏହି କୋଠା ୬୫୦୦୦ ରୁ ଅଧିକ ହୀରା ବିଶେଷଜ୍ଞ, କଟର, ପଲିସର ଏବଂ ବ୍ୟବସାୟୀଙ୍କ ପାଇଁ ଏକ ସୁବିଧାଜନକ ହବ୍ ହେବାକୁ ଯାଉଛି ।
କାର୍ଯ୍ୟାଳୟ ବ୍ୟତୀତ, ଡାଇମଣ୍ଡ ବୋର୍ସ କ୍ୟାମ୍ପସରେ କନଫରେନ୍ସ ହଲ୍, ବହୁମୁଖୀ ହଲ୍, ରେଷ୍ଟୁରାଣ୍ଟ, ବ୍ୟାଙ୍କ, କଷ୍ଟମ୍ କ୍ଲିୟରାନ୍ସ ହାଉସ୍, ସମ୍ମିଳନୀ କେନ୍ଦ୍ର, ପ୍ରଦର୍ଶନୀ କେନ୍ଦ୍ର, ତାଲିମ କେନ୍ଦ୍ର, ମନୋରଞ୍ଜନ କ୍ଷେତ୍ର, ରେଷ୍ଟୁରାଣ୍ଟ ଏବଂ କ୍ଲବ୍ ଭଳି ସୁବିଧା ରହିଛି । ତେବେ ବିଲ୍ଡିଂର ନିର୍ମାଣ ଫେବୃଆରି ୨୦୧୫ରୁ ଆରମ୍ଭ ହୋଇଥିଲା ।
