ଆସ୍କା, ୩୧।୩: ବେକରେ ରଶି ଲଗାଇ ଜଣେ ଯୁବକ ଆତ୍ମହତ୍ୟା କରିଥିବା ଜଣାପଡ଼ିଛି । ଗଞ୍ଜାମ ଜିଲ୍ଲା ଧରାକୋଟ ଥାନା ଅନ୍ତର୍ଗତ ମୁଣ୍ଡମରାଇ ଗ୍ରାମର ଶଙ୍କର ଜେନାଙ୍କ ୨୩ ବର୍ଷୀୟ ପୁଅ ହଜାରୀ ଜେନା  ରବିବାର ସକାଳେ ଘରେ କେହି ନଥିବା ବେଳେ ବେକରେ ଦଉଡ଼ି ଦେଇ ଆତ୍ମହତ୍ୟା କରିଛନ୍ତି । 

ମାଁ ମନ୍ଦିରରୁ ଆସିବା ପରେ ଘରେ ପୁଅକୁ ଝୁଲନ୍ତା ଅବସ୍ଥା ଦେଖି ଚିତ୍କାର କରିବା ପରେ ଗ୍ରାମର କିଛି ଲୋକ ଆସି ହଜାରିଙ୍କୁ ଉଦ୍ଧାର କରିଥିଲେ । ପରେ ତାଙ୍କୁ ଆସିକା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିବା ସହ ପୋଲିସକୁ ଖବର ଦେଇଥିଲେ । ପୋଲିସ ମେଡିକାଲରେ ପହଞ୍ଚି ଶବକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି । ତେବେ ହଜାରୀ କେଉଁ କାରଣ ପାଇଁ ଆତ୍ମହତ୍ୟା କଲେ ତା’ର କାରଣ ଏଯାଏ ଅସ୍ପଷ୍ଟ ରହିଛି ।