ଉଦଳା, ୨୬।୩: ହତ୍ୟା ପରେ ଶାଢ଼ୀ କାନିରେ ପଥର ବାନ୍ଧି ଡ୍ୟାମରେ ଫୋପାଡ଼ିଦେଲେ ମୃତଦେହ । ଡ୍ୟାମରେ ମୃତଦେହ ଭାସିବାରୁ ସାମ୍ନାକୁ ଆସିଲା ପୂରା ଘଟଣା । କପ୍ତିପଦା ଥାନା ସୋନଡ୍ୟାମରୁ ମିଳିଲା ମହିଳାଙ୍କ ମୃତଦେହ । ଶାଳଚୁଆ ଅଞ୍ଚଳର ଜଣେ ଯୁବକ ମାଛ ଧରିବା ପାଇଁ ଜାଲ ପକାଇବାକୁ ଡ୍ୟାମ୍‌ ଭିତରକୁ ଯାଇଥିଲେ । ଡ୍ୟାମ୍‌ ଭିତରେ ମୃତଦେହ ଭାସୁଥିବାର ଦେଖି ପୋଲିସକୁ ଖବର ଦେଇଥିଲେ । 

ଖବର ପାଇ କପ୍ତିପଦା ପୋଲିସ ଏବଂ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚିବା ସହ ଦମକଳ ବିଭାଗ ଭାସୁଥିବା ମୃତଦେହକୁ କୂଳକୁ ଆଣିବା ପରେ ମୃତକ ଜଣେ ମହିଳା ବୋଲି ପୋଲିସ ଜାଣିବାକୁ ପାଇଥିଲା । ତେବେ ମୃତକଙ୍କ ପରିଚୟ ମିଳିନଥିବା ବେଳେ କୂଳରେ ମହିଳାଙ୍କ ମୃତଦେହ ଦେଖିବା ପରେ ତାଙ୍କୁ ହତ୍ୟା କରାଯାଇଥିବା ଜଣାପଡ଼ିଥିଲା । କାରଣ ମୃତ ମହିଳାଙ୍କ ଶାଢ଼ୀ କାନିରେ ଏକ ବଡ଼ ପଥର ବାନ୍ଧି ତାକୁ ଡ୍ୟାମ୍ ଭିତରକୁ ଫୋପାଡ଼ି ଦିଆଯାଇଥିବା ସ୍ପଷ୍ଟ ହୋଇଥିଲା । ତେଣୁ ମହିଳାଙ୍କୁ ଯୋଜନାବଦ୍ଧ ଭାବେ କେହି ହତ୍ୟା କରିଥିବା ପୋଲିସ ସନ୍ଦେହ କରୁଛି । ପୋଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଛି ।