ଭୁବନେଶ୍ୱର, ୩।୪: ଦାଦାଙ୍କ ବ୍ୟାଙ୍କ ଆକାଉଣ୍ଟ୍‌ରୁ ୨ ଲକ୍ଷ ୨୯ ହଜାର ଟଙ୍କା ଉଠାଇ ନେବା ଅଭିଯୋଗରେ ଏୟାରଫିଲ୍ଡ ଥାନା ପୁଲିସ ପୁତୁରାକୁ ଗିରଫ କରିଛି । ଗିରଫ ପୁତୁରା ଜଣକ ୩୨ ବର୍ଷୀୟ ବିକ୍ରମ ଭୋଇ । ଘର ଜଟଣୀ ତିରିମଲ । ପୁଲିସ ସୂଚନା ଅନୁଯାୟୀ, ଫେବ୍ରୁଆରୀ ୫ ତାରିଖରେ ବିକ୍ରମ ଏୟାରଫିଲ୍ଡ ଥାନା ପାଞ୍ଚଗାଁସ୍ଥିତ ଦାଦା ଅପର୍ତ୍ତି ଭୋଇଙ୍କ ଘରକୁ ବୁଲିବାକୁ ଆସିଥିଲେ । ଦାଦାଙ୍କ ଘରେ ରହିଥିଲେ । ଅପର୍ତ୍ତି ଜମି ବିକ୍ରିକରି ବ୍ୟାଙ୍କ୍‌ରେ ଟଙ୍କା ରଖିଥିବା ବିକ୍ରମ ଜାଣିବାକୁ ପାଇଥିଲେ । ସେ ତାଙ୍କ ଏଟିଏମ୍‌ କାର୍ଡ ପିନ୍‌ ବଦଳାଇ ଫେବ୍ରୁଆରୀ ୭ ତାରିଖରୁ ୧୮ ତାରିଖ ମଧ୍ୟରେ ଅପର୍ତ୍ତିଙ୍କ ଆକାଉଣ୍ଟ୍‌ରୁ ୨ ଲକ୍ଷ ୨୯ ହଜାର ଟଙ୍କା ଉଠାଇ ନେଇଥିଲେ । ତା’ପରେ ବିକ୍ରମ ଘରକୁ ପଳାଇଥିଲେ । 

ଉକ୍ତ ଟଙ୍କାରେ ସେ କିଛି ଧାରକରଜ ସୁଝିବା ସହ ଖର୍ଚ୍ଚବାର୍ଚ୍ଚ କରିଥିଲେ ଓ ଏକ ଦାମୀ ମୋବାଇଲ କିଣିଥିଲେ । ପରେ ଅପର୍ତ୍ତି ବ୍ୟାଙ୍କରୁ ଟଙ୍କା ଉଠାଇବାକୁ ଯାଇ ତାଙ୍କ ଆକାଉଣ୍ଟ୍‌ରୁ ଟଙ୍କା ଉଠାଣ ହୋଇଥିବା ଜାଣିବାକୁ ପାଇଥିଲେ । ତେଣୁ ସେ ଏନେଇ ବିକ୍ରମଙ୍କୁ ପଚାରିବାରୁ ସେ ଓଲଟି ତାଙ୍କୁ ଗାଳିଗୁଲଜ କରିଥିଲେ । ଏନେଇ ଅପର୍ତ୍ତି ଏୟାରଫିଲ୍ଡ ଥାନାରେ ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁକରି ତଦନ୍ତ ଚଳାଇଥିଲା । ବିକ୍ରମଙ୍କ ଘରେ ପୁଲିସ ଚଢ଼ଉ କରି ୪ ହଜାର ଟଙ୍କା, ନୂଆ ମୋବାଇଲ କିଣା ବିଲ୍‌ ଜବତ କରିଥିଲା । ପଚରାଉଚରାରୁ ସେ ନିଜ ଦୋଷ ସ୍ୱୀକାର କରିଥିଲେ । ତେଣୁ ପୁଲିସ ବିକ୍ରମଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଥିଲା । ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ୍‌ ହାଜତକୁ ପଠାଇ ଦିଆଯାଇଛି ।