ନୂଆଦିଲ୍ଲୀ, ୫।୯: ଦୁନିଆରେ ଏପରି ଅନେକ ଜାଗା ରହିଛି, ଯେଉଁଠାରେ ଖୁବ୍ କମ୍ ଲୋକ ବାସ କରନ୍ତି । ଆଜି ଆମେ ଠିକ୍ ଏହିପରି ଏକ ସ୍ଥାନ ବାବଦରେ କହିବାକୁ ଯାଉଛୁ । ସେପରି ଏକ ଜାଗା ହେଉଛି ଆମେରିକାର ମେଣ୍ଟୋନ୍ ସହର । ଏଠାରେ ବାସ କରନ୍ତି ମାତ୍ର, ୫୮ ଲୋକ । କିନ୍ତୁ, ଆଶ୍ଚର୍ଯ୍ୟର କଥା କ’ଣ ଜାଣନ୍ତି ? ଏଠାରେ ବାସ କରୁଥିବା ୫୮ ଜଣଙ୍କ ମୋଟ୍ ଆୟ ଚକିତ କରିଦେବା ଭଳି । ଏଠାରେ ଥିବା ୫୮ ଜଣ କୋଟିପତି । ଜନ୍ ୱାଇଜ ନାମକ ଏହି ୟୁଟ୍ୟୁବର ଗତ ଜାନୁୟାରୀରେ ‘ଲଭିଂ କାଉଣ୍ଟି’ ଯାଇଥିଲେ । ସେଠାରେ ଥିବା ମେଣ୍ଟୋନ ସହର କିପରି ସବୁଠାରୁ ଭିନ୍ନ ତାହା ସେ ଦେଖାଇଥିଲେ ।
ବିଭିନ୍ନ ସହରକୁ ନେଇ ଗଠିତ ଅଞ୍ଚଳକୁ ଆମେରିକାରେ କାଉଣ୍ଟି କୁହାଯାଏ । ଏହା ରାଜ୍ୟଠାରୁ ଛୋଟ ଏବଂ ସହରଠାରୁ ବଡ଼ ହୋଇଥାଏ । ଜନ୍ ଟେକ୍ସାସ୍ ରାଜ୍ୟର ପଶ୍ଚିମରେ ଥିବା ଲଭିଂ କାଉଣ୍ଟିର ଏକ ଛୋଟ ସହର ମେଣ୍ଟୋନ । ଡେଲି ମେଲ୍ ନ୍ୟୁଜ୍ ୱେବସାଇଟ୍ ରିପୋର୍ଟ ଅନୁସାରେ, ମେଣ୍ଟୋନ ସହର ୧୯୩୧ରେ ବିକଶିତ ହୋଇଥିଲା । ୧୯୬୭ରେ ଏହି ସହରର ଜନସଂଖ୍ୟା ଥିଲା ୪୨ । ସେତେବେଳେ ସେଠାରେ ପାଣିର ସୁବିଧା ନ ଥିବାବେଳେ କୌଣସି ବ୍ୟାଙ୍କ, ଡାକ୍ତରଖାନା ଏପରିକି ଶ୍ମଶାନ ମଧ୍ୟ ନ ଥିଲା । ଏବେ ସେଠାରେ ପାଣି ଏବଂ ଅନ୍ୟ ସୁବିଧା ଥିଲେ ମଧ୍ୟ ଜନସଂଖ୍ୟା ସେହି ଅନୁସାରେ ବୃଦ୍ଧି ପାଉନାହିଁ । ୨୦୨୨ରେ ସେଠାରେ ପ୍ରଥମ କାଫେ ଖୋଲିଥିଲା ।
ୱାର୍ଲ୍ଡ ପପୁଲେସନ୍ ରିଭ୍ୟୁ ଅନୁସାରେ, ବର୍ତ୍ତମାନ ଏଠାକାର ଜନସଂଖ୍ୟା ୫୮ ଥିବାବେଳେ ଏହି ୟୁଟ୍ୟୁବର ଜଣକ କିନ୍ତୁ, ୬୪ ବୋଲି କହିଛନ୍ତି । ଏଠାରେ ଅନେକ ବଙ୍ଗଳା ନଷ୍ଟ ହୋଇଯାଇଛି ଏବଂ ଅନେକ ଖାଲି ପଡ଼ିରହିଛି । ଏଠାରେ ବହୁସଂଖ୍ୟାରେ ଅଏଲ ଫ୍ୟାକ୍ଟ୍ରି, ମେସିନ୍ ଓ ତୈଳ ଶିଳ୍ପ ରହିଛି । ରିପୋର୍ଟ ଅନୁସାରେ, ଏଠାକାର ଜନସଂଖ୍ୟା କମ୍ ହେଲେ ମଧ୍ୟ ସେମାନଙ୍କ ମୁଣ୍ଡପିଛା ଆୟ ଦେଶର ଅନ୍ୟ ସ୍ଥାନଗୁଡ଼ିକ ତୁଳନାରେ ଅଧିକ । ଏହା କେବଳ ଅଏଲ୍ ଇଣ୍ଡଷ୍ଟ୍ରି ଯୋଗୁଁ ସମ୍ଭବ ହୋଇଛି । ୨୦୨୧ରେ ପୁରା ଲଭିଂ କାଉଣ୍ଟିରେ ହାରାହାରି ଆୟ ଥିଲା ୯୫ ଲକ୍ଷ ଟଙ୍କା । ତେଣୁ ଏହାକୁ ଦୃଷ୍ଟିରେ ରଖିଲେ ସେଠାରେ ପ୍ରାୟ ସଭିଏଁ କୋଟିପତି ।
