ବାରଙ୍ଗ,୨୦/୦୪: ନନ୍ଦନକାନନ ପ୍ରାଣୀ ଉଦ୍ୟାନର ୩୭(ଜି) ଖୁଆଡ଼ରେ ରହୁଥିବା ଏକମାତ୍ର ମାଈ ୱାଲାବି ଗୁରୁତର ହୋଇପଡ଼ିଛି । ଗୁରୁବାର ସନ୍ଧ୍ୟାରୁ ଉକ୍ତ ଖୁଆଡ଼ରେ ଓୟୁଏଟି ପ୍ରଫେସରଙ୍କ ତତ୍ତ୍ୱାବଧାନରେ ପ୍ରାଣୀ ଚିକିତ୍ସକମାନେ ତା’ର ଚିକିତ୍ସା ଜାରି ରଖିଛନ୍ତି । ୱାଲାବି ସ୍ୱାସ୍ଥ୍ୟ ସମ୍ପର୍କରେ କର୍ତ୍ତୃପକ୍ଷ କୌଣସି ଉତ୍ତର ଦେଇନାହାନ୍ତି । ପ୍ରାଣୀ ଉଦ୍ୟାନର ୩୭(ଜି) ନୂତନ ଖୁଆଡ଼ରେ ଦୁଇଟି ୱାଲାବି ଛଡ଼ାଯାଇଥିଲା। ଗତ ମାର୍ଚ୍ଚ ୧୨ରେ ଗୋଟିଏ ଅଣ୍ଡିରା ୱାଲାବିର ମୃତ୍ୟୁ ହୋଇଥିବା ବେଳେ ମାଈଟି ଏକାକି ରହୁଥିଲା । କିଛିଦିନ ହେବ ୱାଲାବିଟି ଅସୁସ୍ଥ ହେବା ସହ ଗୁମସୁମ ହୋଇ ଗୋଟିଏ ସ୍ଥାନରେ ବସି ରହୁଥିଲା । ପ୍ରାଣୀ ଚିକିତ୍ସକମାନେ ତା’ର ସ୍ୱାସ୍ଥ୍ୟ ପରୀକ୍ଷା କରିବା ସହ ଦରକାରୀ ଚିକିତ୍ସା କରୁଥିଲେ ।
ସୂଚନାଯୋଗ୍ୟ, ପ୍ରାୟ ୩୫ ବର୍ଷ ପରେ ହାଇଦ୍ରାବାଦର ଏକ ଫାର୍ମ ମାଧ୍ୟମରେ ବାହାର ଦେଶରୁ ଦୁଇଟି (ଅଣ୍ଡିରା,ମାଈ) ୱାଲାବି ପ୍ରାଣୀ ଉଦ୍ୟାନକୁ ଆସିଥିଲେ । ସେମାନଙ୍କୁ ଗତ ଡିସେମ୍ବର ୨୯ ନନ୍ଦନକାନନ ପ୍ରତିଷ୍ଠା ଦିବସରେ ପର୍ଯ୍ୟଟକଙ୍କ ପାଇଁ ନୂତନ ଖୁଆଡ଼ରେ ଅତିଥିମାନଙ୍କ ଦ୍ୱାରା ଛଡ଼ାଯାଇଥିଲା । ଗତ ମାର୍ଚ୍ଚ ୧୨ରେ ଗୋଟିଏ ଅଣ୍ଡିରା ୱାଲାବିର ମୃତ୍ୟୁ ହୋଇଥିବା ବେଳେ କର୍ତ୍ତୃପକ୍ଷ ପୁଣି ଏକ ଅଣ୍ଡିରା ୱାଲାବି ଆଣି ତାକୁ କ୍ୱାରେଣ୍ଟାଇନ ସେଣ୍ଟରରେ ରଖିଛନ୍ତି ।