ମୁମ୍ବାଇ,୨୧/୮: ଜଣାଶୁଣା ବଙ୍ଗୀୟ ଅଭିନେତ୍ରୀଙ୍କୁ ମିଳିଲା ଦୁଷ୍କର୍ମ ଧମକ । ଅଭିନେତ୍ରୀ ତଥା ତ୍ରୁଣମୂଳ କଂଗ୍ରେସର ପୂର୍ବତନ ସାଂସଦ ମିମି ଚକ୍ରବର୍ତ୍ତୀଙ୍କୁ ଦୁଷ୍କର୍ମ ଧମକ  ମିଳିଛି। କେବଳ ସେତିକି ନୁହେଁ ତାଙ୍କ ପାଖକୁ ଅଶ୍ଳୀଳ ମେସେଜ ମଧ୍ୟ ପଠାଇଛନ୍ତି ଦୁର୍ବୃତ୍ତ। ଏନେଇ ସେ ନିଜ ସୋସିଆଲ ମିଡିଆରେ ପୋଷ୍ଟ କରି ସୂଚନା ଦେଇଛନ୍ତି। କୋଲକାତା ଦୁଷ୍କର୍ମ ଓ ହତ୍ୟା ମାମଲାକୁ ନେଇ ସାରା ଦେଶରେ ବିରୋଧ ପ୍ରଦର୍ଶନ ଜାରି ରହିଛି। ସୁପ୍ରିମକୋର୍ଟ ଏହି ମାମଲାକୁ ଗୁରୁତର ସହ ନେଇଛନ୍ତି। ସିବିଆଇ ମଧ୍ୟ ଏହି ଘଟଣାର ପୁଙ୍ଖାନୁପୁଙ୍ଖ ଅନୁସନ୍ଧାନ କରୁଛି। ଏହାରି ଭିତରେ ଟିଏମ୍‌ସିର ପୂର୍ବତନ ସାଂସଦ ତଥା ଅଭିନେତ୍ରୀ ମିମି ଚକ୍ରବର୍ତ୍ତୀଙ୍କୁ ଦୁଷ୍କର୍ମ ଧମକ ମିଳିଛି।

ତେବେ କୋଲକାତା ଦୁଷ୍କର୍ମ ଏବଂ ହତ୍ୟା ମାମଲା ବିରୋଧରେ ପୋଷ୍ଟ ସେୟାର କରିବା ଦିନଠାରୁ ତାଙ୍କୁ ସୋସିଆଲ ମିଡିଆରେ ଦୁଷ୍କର୍ମ ଧମକ ଦିଆଯାଉଛି । ଏଥିସହ ଅଶ୍ଳୀଳ ମେସେଜ ମଧ୍ୟ ପଠାଯାଉଥିବା ସେ କହିଛନ୍ତି। ଏନେଇ ସୋସିଆଲ ମିଡିଆରେ ମିମି ଧମକପୂର୍ଣ୍ଣ ମେସେଜର ସ୍କ୍ରିନଶଟ୍‌ ସେୟାର କରି ଲେଖିଛନ୍ତି, 'ଆମେ ଏଠାରେ ମହିଳାମାନଙ୍କ ପାଇଁ ନ୍ୟାୟ ଦାବି କରୁଛୁ। ଏମାନେ ହେଉଛନ୍ତି ସେମାନଙ୍କ ମଧ୍ୟରୁ ଜଣେ, ଯିଏକି ଭିଡ଼ ଭିତରେ ମୁଖାପିନ୍ଧି ଆମେ ମହିଳାଙ୍କ ସହ ଛିଡା ହୋଇଛି କୁହନ୍ତି ହେଲେ ପରେ ଦୁଷ୍କର୍ମ ଧମକ ମଧ୍ୟ ଦିଅନ୍ତି। ଦୁଷ୍କର୍ମ ଧମକ ସାଧାରଣ ହୋଇଗଲାଣି। ତେବେ ଅଭିନେତ୍ରୀ ଏହି ପୋଷ୍ଟକୁ ସେ କୋଲକାତା ପୋଲିସର ସାଇବର ସେଲ ବିଭାଗକୁ ମଧ୍ୟ ଟ୍ୟାଗ କରିଛନ୍ତି।