ନୂଆଦିଲ୍ଲୀ: ଏୟାର ଇଣ୍ଡିଆ ଏବଂ ଭିସ୍ତାରା ଏୟାରଲାଇନ୍ସ ମର୍ଜ(ବିଲୟ) ହେବ । ଏହି ବିଲୟ ପ୍ରକ୍ରିୟା ଚଳିତ ବର୍ଷ ଶେଷ ହୋଇଯିବ । ଏନେଇ ଟାଟା ଗ୍ରୁପର ଉଭୟ ଏୟାର ଲାଇନର ସିଇଓ ଆଲୋଚନା କରିଛନ୍ତି । ବିଶେଷ କରି ଦୁଇ ଏୟାର ଲାଇନର କର୍ମଚାରୀଙ୍କ ସହିତ ମାରାଥନ୍ ଆଲୋଚନା ମଧ୍ୟ ସରିଛି । ଏହି ବିଲୟକୁ ନେଇ କର୍ମଚାରୀଙ୍କ ଆଶଙ୍କା ବୃଦ୍ଧି ପାଇଥିବାରୁ ସେମାନଙ୍କ ଆତ୍ମବିଶ୍ବାସ ବଢ଼ାବାକୁ ପ୍ରୟାସ କରାଯାଇଛି । ଏହା ବ୍ୟତୀତ ପ୍ରାୟ ୭୦୦୦ କର୍ମଚାରୀଙ୍କ ଭବିଷ୍ୟତ ବିଷୟରେ ଏକ ଯୋଜନା ଚୂଡାନ୍ତ ହୋଇଥିବା ବେଳେ ସେମାନଙ୍କ ଭୂମିକା କଣ ରହିବ ସେହି ବିଷୟରେ ସୂଚନା ମଧ୍ୟ ଦିଆଯାଇଛି।
ଏୟାର ଇଣ୍ଡିଆ ଏବଂ ଭିସ୍ତାରା ଏୟାରଲାଇନ୍ସର ମିଳିତ ଭାବେ ୨୩୫୦୦ କର୍ମଚାରୀ ଅଛନ୍ତି । ଏୟାର ଇଣ୍ଡିଆର ସିଇଓ ତଥା ଏମଡି କ୍ୟାମ୍ପବେଲ ୱିଲସନ ଏବଂ ଭିସ୍ତାରା ଏୟାରଲାଇନ୍ସର ସିଇଓ ବିନୋଦ କାନନ କହିଛନ୍ତି ଯେ ବିଲୟ ପରେ ଆମର ସମ୍ବଳ ବୃଦ୍ଧି ପାଇବ । ଆମେ ଦୁନିଆର ଅନେକ ମାର୍ଗରେ ଆମର ସେବା ଯୋଗାଇବାରେ ସକ୍ଷମ ହୋଇପାରିବୁ ।
ମନି କଣ୍ଟ୍ରୋଲର ଏକ ରିପୋର୍ଟ ଅନୁଯାୟୀ, ଉଭୟ ଏୟାର ଲାଇନ୍ର ସିଇଓ କହିଛନ୍ତି ପ୍ରାୟ ୭୦୦୦ କର୍ମଚାରୀଙ୍କୁ ଫିଟମେଣ୍ଟ ଅଧୀନରେ ବିଭିନ୍ନ ଚାକିରି ଦିଆଯିବ । ଜୁନ୍ ଶେଷ ସୁଦ୍ଧା ସେମାନଙ୍କର ଫିଟମେଣ୍ଟ ଶେଷ ହେବ। ସେମାନଙ୍କର ଭୂମିକା ମଧ୍ୟ ଏକ ସମୟରେ ସ୍ଥିର ହେବ । ଏହି କାର୍ଯ୍ୟରେ ସ୍ବଚ୍ଛତା ବଜାୟ ରଖିବା ପାଇଁ ଏକ ବିଶ୍ବସ୍ତରୀୟ ପରାମର୍ଶଦାତା ସଂସ୍ଥାର ସାହାଯ୍ୟ ନିଆଯିବ ।
