ମାଲକାନଗିରି,୫/୬ : ଦୀର୍ଘ ୪ଦିନ ଧରି ପୁଲିସର ତନାଘନା ପରେ ନିଖୋଜ କାଲିମେଳା ସ୍ୱାସ୍ଥ୍ୟ କେନ୍ଦ୍ରର ଡାକ୍ତର ଅମ୍ଲାନ ଭୋଇଙ୍କୁ କର୍ଣ୍ଣାଟକ ବେଙ୍ଗାଲୁରର ଏକ ଅଞ୍ଚଳରୁ ପୁଲିସ ଠାବ କରିଛି। ଦୀର୍ଘ ୪ଦିନର ଅକ୍ଲାନ୍ତ ପରିଶ୍ରମ ପରେ ଡାକ୍ତରଙ୍କ ପତ୍ତା ମିଳିଛି। ତାଙ୍କୁ ସୁରକ୍ଷିତ ଭାବେ କର୍ଣ୍ଣାଟକ ବେଙ୍ଗାଲୁରରୁ ଉଦ୍ଧାର କରିଛି ପୁଲିସ। ସେ ସୁସ୍ଥ ଅଛନ୍ତି। ଖୁବଶୀଘ୍ର ତାଙ୍କୁ ମାଲକାନଗିରିକୁ ଅଣାଯିବ। ଏବେ ଡାକ୍ତର ଅମ୍ଲାନ ଭୋଇଙ୍କୁ କର୍ଣ୍ଣାଟକରୁ ମାଲକାନଗିରିକୁ ଆଣିବାକୁ ପ୍ରକ୍ରିୟା ଆରମ୍ଭ ହୋଇଛି। ଡାକ୍ତର ମାଲକାନଗିରିରେ ପହଁଚିଲା ପରେ ତାଙ୍କ ନିଖୋଜର ସଠିକ ବିବରଣୀ ଜଣାପଡିବ ବୋଲି ଏସପି ନୀତେଶ ୱାଧାନୀ ସୂଚନା ଦେଇଛନ୍ତି।

ସୂଚନାଯୋଗ୍ୟ ଯେ, ମାଲକାନଗିରି ଜିଲ୍ଲା କାଲିମେଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର କାର୍ଯ୍ୟରତ ଡାକ୍ତର ଅମ୍ଲାନ ଭୋଇ ଗତ ୧ ତାରିଖ ମଧ୍ୟ ରାତ୍ରରୁ ନିଜ ରୁମରୁ ନିଖୋଜ ହୋଇଯାଇଥିଲେ। ଏହା ମାଓ ଅପହରଣ ସନ୍ଦେହ କରାଯାଇ ହସ୍ପିଟାଲ ପକ୍ଷରୁ କାଲିମେଳା ଥାନାରେ ଅଭିଯୋଗ ହେବା ପରେ ପୁଲିସ ପକ୍ଷରୁ ଜୋରଦାର ତଦନ୍ତ କରାଯାଇ ବିଭିନ୍ନ ସ୍ଥାନରେ ଖୋଜାଖୋଜି ଆରମ୍ଭ ହୋଇ ଯାଇଥିଲା। ଡାକ୍ତରଙ୍କ ନିଖୋଜକୁ ନେଇ ଲୋକମାନଙ୍କ ମଧ୍ୟରେ ବିଭିନ୍ନ ପ୍ରକାରର ପ୍ରଶ୍ନ ଉଙ୍କି ମାରିଥିଲା। ଏହା ଏକ ମାଓ ଅପହରଣ କାଣ୍ଡ ହୋଇ ଥାଇପାରେ ବୋଲି ସନ୍ଦେହ ଜାତ ହୋଇଥିଲା। ଡାକ୍ତରଙ୍କ ନିଖୋଜ ମାମଲାକୁ ମାଲକାନଗିରି ଜିଲ୍ଲା ପୁଲିସ ଗୁରୁତର ଭାବେ ଗ୍ରହଣ କରି ଏସପି ନୀତେଶ ୱାଧାନୀଙ୍କ ନିର୍ଦ୍ଦେଶ କ୍ରମେ ସ୍ୱତନ୍ତ୍ର ଏକ ପୁଲିସ ଟିମ୍ ଗଠନ କରାଯାଇ ଓଡିଶା ଓ ବାହାର ରାଜ୍ୟରେ ଖୋଜାଖୋଜି କରାଯାଇଥିଲା। ଶେଷରେ ନିଖୋଜ ଡାକ୍ତର ବେଙ୍ଗଲୁରରେ ଥିବାର ବିଶ୍ବସ୍ଥ ସୂତ୍ରରୁ ପୁଲିସ ଜାଣିପାରି ସେଠାକୁ ସ୍ୱତନ୍ତ୍ର ଟିମ୍ ଯାଇ ଡାକ୍ତରଙ୍କୁ ସୁସ୍ଥ ଓ ସୁରକ୍ଷିତ ଅବସ୍ଥାରେ ଠାବ କରିବାରେ ସଫଳ ହୋଇଛନ୍ତି।