ମୁମ୍ବାଇ, ୧୧।୫: ନିର୍ବାଚନୀ ପ୍ରଚାର ପାଇଁ ତାରକାମାନେ ନିର୍ଦ୍ଦିଷ୍ଟ ଦଳ ପାଇଁ ମୈଦାନକୁ ଓହ୍ଲାଉଥିବାର ଦେଖିବାକୁ ମିଳିଥାଏ । ହେଲେ ବର୍ତ୍ତମାନ ଇଣ୍ଟରନେଟର ଯୁଗରେ ଏହା ଆହୁରି ସହଜ ସୁବିଧା ହୋଇପାରୁଛି । ଏଭଳି ପରିସ୍ଥିତିରେ ଅନେକ ତାରକାଙ୍କ ଭିଡିଓ ସାମ୍ନାକୁ ଆସିଛି, ଯେଉଁଥିରେ ବଲିଉଡ୍ ତାରକାମାନେ ନିର୍ଦ୍ଦିଷ୍ଟ ଦଳକୁ ସମର୍ଥନ କରି ପ୍ରଚାର କରୁଥିବା ଦେଖିବାକୁ ମିଳିଛି । ପ୍ରଥମେ ଆମୀର ଖାନଙ୍କ ଏକ ପ୍ରଚାର ଭିଡିଓ ଆସିଥିବା ବେଳେ ପରେ ରଣଭୀର ସିଂ ଓ ଅମିର ଖାନଙ୍କ ଭିଡିଓ ଭାଇରାଲ ହୋଇଥିଲା । ସେହିପରି ନିକଟରେ ଆଶୁତୋଷ ରଣା ମଧ୍ୟ ଏହି ଡିପଫେକର ଶିକାର ହୋଇଥିଲେ ।
ସେ ସେହି ଭିଡିଓରେ ଏକ କବିତା ପଢୁଥିବାର ନଜର ଆସିଥିଲେ ଯେଉଁଥିରେ ବିଜେପିର ଲୋଗ ଥିଲା । ଆଉ ସେ ଭିଡିଓକୁ ନିର୍ବାଚନୀ ପ୍ରଚାରରେ ବ୍ୟବହାର କରାଯାଇଥିଲା । ତେବେ ଏହି ଡିପଫେକ ଭିଡିଓକୁ ନେଇ ଆଶୁତୋଷ କହିଛନ୍ତି, ଏହା ହେଉଛି ମାୟା ଯୁଦ୍ଧ ଅଟେ । ସେଲିବ୍ରିଟିମାନଙ୍କୁ ଏହି ସବୁରୁ ସାବଧାନ ରହିବା ଆବଶ୍ୟକ । ଇଣ୍ଡିଆ ଟୁଡେ ସହିତ ଏକ ସ୍ୱତନ୍ତ୍ର ସାକ୍ଷାତକାରରେ ଆଶୁତୋଷ ଟେକ୍ନୋଲୋଜି ଓ ଏଆଇ ବ୍ୟବହାରରେ ହେଉଥିବା ଠକେଇ ବିଷୟରେ ଆଲୋଚନା କରିଛନ୍ତି ।
ସେ କହିଛନ୍ତି ଯେ, ଏହା କିଛି ନୂଆ କଥା ନୁହେଁ । ଏହା ମାୟା ଯୁଦ୍ଧ ଆଉ ଆମେ ଏହାକୁ ରାମାୟଣ ଯୁଗରେ ଲଢ଼େଇ କରୁଛେ । ଯେପରି ଲକ୍ଷ୍ମଣ ଓ ମେଘନାଦଙ୍କ ଯୁଦ୍ଧରେ ଲକ୍ଷ୍ମଣଙ୍କୁ ରାବଣଙ୍କ ପୁତ୍ରର ଅନେକ ଅବତାରରେ ଦେଖିବାକୁ ମିଳିଥିଲା । ଏହା ବହୁ ଦିନରୁ ଚାଲିଛି ହେଲେ ଆମେ ଏହାକୁ ଏବେ ଦେଖୁଛେ । ଆଶୁତୋଷ ଆହୁରି ମଧ୍ୟ କହିଛନ୍ତି ,ଏଥିରେ ନିଜକୁ ଡିଫେଣ୍ଡ କରିବ ଆବଶ୍ୟକ ନାହିଁ । ଯିଏ ଜାଣିଛି ସେ ଆମକୁ ଏହି ସବୁ ନେଇ କେବେ ପ୍ରଶ୍ନ କରିବେନି । ଆଉ ଯିଏ ନ ଜାଣିଛି ତାଙ୍କୁ କିଛିରେ ଫରକ ପଡ଼ିବନି । କାରଣ ସେ ତମକୁ ନେଇ ଭାବି ସାରିଥିବେ କି ତୁମେ କ’ଣ ?