ନୂଆଦିଲ୍ଲୀ,୦୮/୦୯: ଚୀନର ହୁଲନବୁଇର ଠାରେ ରବିବାର ଆରମ୍ଭ ହେଉଛି ଏସିଆନ୍ ହକି ଚାମ୍ପିଅନ୍ସ ଟ୍ରଫି । ଏଥିରେ ମୋଟ ୬ଟି ଦଳ ଯଥା ଚୀନ, ଭାରତ, ଜାପାନ, ମାଲେସିଆ, ପାକିସ୍ତାନ ଓ ଦକ୍ଷିଣ କୋରିଆ ଭାଗ ନେବେ । ପ୍ରଥମ ଦିବସରେ ମୋଟ ୩ଟି ମ୍ୟାଚ୍ ରହିଛି । ଡିଫେଣ୍ଡିଂ ଚାମ୍ପିଅନ୍ ଭାରତ ଆସନ୍ତାକାଲି ଆୟୋଜକ ଚୀନ ବିପକ୍ଷରେ ଅଭିଯାନ ଆରମ୍ଭ କରିବ । ସେହିପରି ୨୦୨୧ ଚାମ୍ପିଅନ୍ ଦକ୍ଷିଣ କୋରିଆ ଓ ଜାପାନ ଏବଂ ମାଲେସିଆ ଓ ପାକିସ୍ତାନ ପରସ୍ପରକୁ ଭେଟିବେ । ଚାମ୍ପିଅନସିପ୍ର ବହୁ ପ୍ରତୀକ୍ଷିତ ଭାରତ-ପାକିସ୍ତାନ ମୁକାବିଲା ଆସନ୍ତା ୧୪ ତାରିଖରେ ଖେଳାଯିବ ।
ଏହି ଟୁର୍ଣ୍ଣାମେଣ୍ଟ ରାଉଣ୍ଡ୍ ରବିନ ଗ୍ରୁପ୍ ପର୍ଯ୍ୟାୟ ଫର୍ମାଟରେ ଖେଳାଯିବ । ଶ୍ରେଷ୍ଠ ପ୍ରଦର୍ଶନକାରୀ ୪ଟି ଦଳ ସେମି ଫାଇନାଲ୍କୁ ଉନ୍ନୀତ ହେବେ । ଏସିଆନ୍ ଚାମ୍ପିଅନ୍ସ ଟ୍ରଫିରେ ଭାରତ ସବୁଠୁ ସଫଳ ଦଳ । ୭ଟି ସଂସ୍କରଣରୁ ଦଳ ୪ଥର (୨୦୧୧, ୨୦୧୬, ୨୦୧୮, ୨୦୨୩) ଚାମ୍ପିଅନ୍ ହୋଇସାରିଛି । ଗତ ସଂସ୍କରଣ ଚେନ୍ନାଇରେ ଆୟୋଜିତ ହୋଇଥିଲା ଏବଂ ଭାରତ ଫାଇନାଲ୍ରେ ୪-୩ ଗୋଲ୍ରେ ମାଲେସିଆକୁ ହରାଇ ଟାଇଟଲ୍ ହାସଲ କରିଥିଲା । ଏଥର ଦଳ ଟାଇଟଲ୍ ବଜାୟ ରଖିବା ନେଇ ଦୃଢ଼ ମନୋବଳରେ ରହିଛି । ଗତ ପ୍ୟାରିସ୍ ଅଲିମ୍ପିକ୍ସରେ ଭାରତ ବ୍ରୋଞ୍ଜ ପଦକ ଜିତିଥିଲା । ଏହି ଦଳର ୧୦ଜଣ ସଦସ୍ୟ ସ୍ଥାନ ବଜାୟ ରଖିଛନ୍ତି । ଷ୍ଟାର୍ ଖେଳାଳି ହର୍ମନପ୍ରୀତ ସିଂହ ଦଳର ନେତୃତ୍ୱ ନେବେ । ଆୟୋଜକ ଚୀନ ବିପକ୍ଷରେ ଭାରତର ପଲା ଭାରି ରହିବ । ଚୀନ ୨୦୧୨, ୨୦୧୩ରେ ଚତୁର୍ଥ ସ୍ଥାନରେ ସନ୍ତୁଷ୍ଟ ହୋଇଥିଲା ।
ଭାରତୀୟ ଦଳ ଆସନ୍ତା ୯ ତାରିଖରେ ଜାପାନ, ୧୧ ତାରିଖ ମାଲେସିଆ, ୧୨ତାରିଖ ଦକ୍ଷିଣ କୋରିଆକୁ ଭେଟିବ । ୧୪ତାରିଖ ଅନ୍ତିମ ମୁକାବିଲାରେ ଦଳ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷ ମ୍ୟାଚ୍ ଖେଳିବ । ଆସନ୍ତା ୧୬ତାରିଖରେ ଉଭୟ ସେମି ଫାଇନାଲ୍ ଏବଂ ୧୭ତାରିଖରେ ଫାଇନାଲ୍ ମୁକାବିଲା ଖେଳାଯିବ ।
ଭାରତୀୟ ଦଳ: ଗୋଲକିପର-କ୍ରିଷନ ବାହାଦୂର ପାଠକ, ସୂରଜ କରକେରା³ ଡିଫେଣ୍ଡର- ଜର୍ମନପ୍ରୀତ ସିଂହ, ଅମିତ ରୋହିଦାସ, ହର୍ମନପ୍ରୀତ ସିଂହ, ଯୁଗରାଜ ସିଂହ, ସଞ୍ଜୟ, ସୁମିତ³ ମିଡ୍ଫିଲ୍ଡର- ରାଜ କୁମାର ପାଲ, ନୀଳକାନ୍ତ ଶର୍ମା, ବିବେକ ସାଗର ପ୍ରସାଦ, ମନପ୍ରୀତ ସିଂହ, ମହମ୍ମଦ ରାହିଲ ମୌସିନ³ ଫରୱାର୍ଡ- ଅଭିଷେକ, ସୁଖଜୀତ ସିଂହ, ଅରଇଜିତ ସିଂହ ହୁଣ୍ଡାଲ, ଉତ୍ତମ ସିଂହ, ଗୁରଜୋତ ସିଂହ ।
