ନୂଆଦିଲ୍ଲୀ ୧୭/୦୯: ବଡ଼ ବିପଦରୁ ରକ୍ଷା ପାଇଗଲା ପୃଥିବୀ । ସେପ୍ଟେମ୍ବର ୧୬ ତାରିଖ ଅର୍ଥାତ୍ ଗତକାଲି ଦିନ ପ୍ରାୟ ୨.୩୦ରେ ‘୨୦୨୪ ଆର୍ଏନ୍୧୬’ ନାମକ ଗ୍ରହାଣୁ ପୃଥିବୀଠୁ ମାତ୍ର ୧୬ ଲକ୍ଷ କିମି ଦୂରରୁ ଅତିକ୍ରମ କଲା । ଅର୍ଥାତ୍ ଚନ୍ଦ୍ରର ଦୂରତାରୁ କେବଳ ୪ ଗୁଣ ଅଧିକ । ୧୧୦ ଫୁଟ ଚଉଡ଼ା ଏହି ଗ୍ରହାଣୁର ବେଗ ଘଣ୍ଟାପ୍ରତି ୧.୦୪ ଲକ୍ଷ କିମି ଥିଲା । ଏହା ସେହି ଆପୋଲୋ ଗ୍ରୁପ୍ ଗ୍ରହାଣୁ, ଯାହାକୁ ପୃଥିବୀ ପାଇଁ ବିପଦପୂର୍ଣ୍ଣ ବିବେଚନା କରାଯାଏ ।
ସୂଚନାଯୋଗ୍ୟ, ଆପୋଲୋ ଗ୍ରହାଣୁଗୁଡ଼ିକ ପୃଥିବୀ ନିକଟସ୍ଥ ଗ୍ରହାଣୁ ସମୂହର । ୧୯୩୦ ମସିହାରେ ଜର୍ମାନ ମହାକାଶଚାରୀ କାରି ରେନ୍ମୁଥଙ୍କ ‘୧୮୬୨ ଆପୋଲୋ’ ଆବିଷ୍କୃତ ହୋଇଥିବାରୁ ଏଗୁଡ଼ିକୁ ଆପୋଲୋ ଗ୍ରହାଣୁ ରୂପେ ନାମକରଣ କରାଯାଇଛି । ଏହି ଗ୍ରହାଣୁ ପୃଥିବୀ ଓ ସୂର୍ଯ୍ୟ ମଧ୍ୟଦେଇ ଅତିକ୍ରମ କରେ । ଏହାର ବିଶେଷତ୍ୱ ହେଉଛି ପୃଥିବୀର ଅତି ନିକଟରୁ ଏହା ଅତିକ୍ରମ କରିଥାଏ । ତେବେ ଗତକାଲି ପୃଥିବୀ ନିକଟରୁ ଅତିକ୍ରମ କରିଥିବା ଗ୍ରହାଣୁ ଯଦି ପୃଥିବୀରେ ଧକ୍କା ହୋଇଥିଲେ, ସାମୂହିକ ବିଲୁପ୍ତି ହୋଇଥାନ୍ତା ।
ନାସାର ସୂଚନା ଅନୁସାରେ, ୨୦୨୪ ଆର୍ଏନ୍୧୬ ଗ୍ରହାଣୁ ପୃଥିବୀ ବାୟୁମଣ୍ଡଳକୁ ଆସିଥିଲେ ପୃଷ୍ଠଠୁ ୨୯ କିମି ଉପରେ ବିସ୍ଫୋରଣ ହୋଇଥାନ୍ତା । ଏଥିରୁ ୧୬ ମେଗାଟନ୍ ଟିଏନ୍ଟି ଭଳି ଉର୍ଜ୍ଜା ନିର୍ଗତ ହୋଇଥାନ୍ତା । ଏ ଭଳି ଧକ୍କାରୁ ଭୟାନକ ତରଙ୍ଗ ସୃଷ୍ଟି ହୁଏ । ଏଭଳି ଘଟଣା ୯୯୯ ବର୍ଷରେ ଥରେ ଘଟିଥାଏ । ଏହି ଆସନ୍ନ ବିପଦର ମାର୍ଗ ଓ ବେଗ ବିଷୟରେ ଜାଣିବା ଲାଗି ନାସାର ସେଣ୍ଟର ଫର୍ ନିଅର-ଆର୍ଥ୍ ଅବ୍ଜେକ୍ଟସ ଷ୍ଟଡି ଗ୍ରହାଣୁ ଉପରେ ନିରନ୍ତର ନଜର ରଖିଥିଲା । ଏଥିସହ ମାଇନର ପ୍ଲାନେଟ୍ ସେଣ୍ଟର, ଗୋଲ୍ଡଷ୍ଟୋନ୍ ସୋଲାର ସିଷ୍ଟମ୍ ରାଡାର ମଧ୍ୟ ଏହା ଉପରେ ନଜର ରଖିଥିଲା ।
