ନୂଆଦିଲ୍ଲୀ,୧୫/୦୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଦୁଇ ଦିନ ପରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ନିଷ୍ପତ୍ତି ନେଇଛନ୍ତି। ତାଙ୍କର ଏହି ଘୋଷଣାରୁ ସେ ବିରୋଧୀ ନେତାଙ୍କ ସହିତ ସାଧାରଣ ଜନତାଙ୍କୁ ମଧ୍ୟ ଚିନ୍ତାରେ ପକାଇଦେଇଛନ୍ତି। ସିଏମ୍ କେଜ୍ରିଓ୍ବାଲ ମଞ୍ଚରୁ କହିଛନ୍ତି ଯେ, 'ମୁଁ ମୁଖ୍ୟମନ୍ତ୍ରୀ ଆସନରେ ସେପର୍ଯ୍ୟନ୍ତ ବସିବିନି, ଯେପର୍ଯ୍ୟନ୍ତ ଜନସାଧାରଣ ଏହାର ଉଚିତ୍ ରାୟ ନ ଦେଇଛନ୍ତି ଯେ, ସେମାନେ ମୋତେ ସଚ୍ଚୋଟ ମନେ କରୁଛନ୍ତି କି ନାହିଁ।' ସିଏମ କେଜ୍ରିୱାଲ କହିଛନ୍ତି ଯେ ଦିଲ୍ଲୀ ନିର୍ବାଚନ ଆଜିଠାରୁ କିଛି ମାସ ରହିଛି ଏବଂ ଯଦି ଆପଣ ଭାବୁଛନ୍ତି ଯେ ମୁଁ ସଚ୍ଚୋଟ ତେବେ ଆଗାମୀ ନିର୍ବାଚନରେ ମୋ ସପକ୍ଷରେ ଭୋଟ୍ ଦିଅନ୍ତୁ। ଏଥି ସହିତ ଅରବିନ୍ଦ କେଜ୍ରିୱାଲ ମଧ୍ୟ ଆବେଦନ କରିଛନ୍ତି ଯେ ଫେବୃଆରୀ ପରିବର୍ତ୍ତେ ନଭେମ୍ବରରେ ଦିଲ୍ଲୀ ନିର୍ବାଚନ କରାଯାଉ।
କିଏ ସମ୍ଭାଳିବ ମୁଖ୍ୟମନ୍ତ୍ରୀ ପଦ?
ଅରବିନ୍ଦ କେଜ୍ରିୱାଲଙ୍କ ଇସ୍ତଫା ସହିତ ଏକ ବଡ଼ ପ୍ରଶ୍ନ ଉଠୁଛି ଯେ, ଏବେ ଦିଲ୍ଲୀର ସିଏମ ପଦବୀରେ କିଏ ରହିବେ। ଏଭଳି ପରିସ୍ଥିତିରେ ଦୁଇ ଦିନ ପରେ ଅନୁଷ୍ଠିତ ହେବାକୁ ଥିବା ପାର୍ଟି ବୈଠକରେ ଆତିଶୀ, ସୌରଭ ଭରଦ୍ୱାଜ ଏବଂ ସୁନୀତା କେଜ୍ରିୱାଲଙ୍କ ନାଁରେ ସହମତି ପ୍ରକାଶ ପାଇବ ବୋଲି ବିଶ୍ୱାସ କରାଯାଏ। ତେବେ କେବଳ କଳ୍ପନାଜଳ୍ପନା ହେଉଛି ଯେ ଆତିଶୀ, ସୌରଭ କିମ୍ବା ସୁନୀତାଙ୍କ ମଧ୍ୟରୁ ଜଣଙ୍କୁ ଅରବିନ୍ଦ କେଜ୍ରିୱାଲାଙ୍କ ସ୍ଥାନ ଦିଆଯାଇପାରେ, କିନ୍ତୁ ବିଶେଷ ସୂତ୍ରରୁ ବର୍ତ୍ତମାନ ସୁଦ୍ଧା କୌଣସି ସ୍ପଷ୍ଟ ସୂଚନା ଆସିନାହିଁ।
ଆତିଶୀ:
ଆତିଶୀ ବର୍ତ୍ତମାନ ଦିଲ୍ଲୀର ଶିକ୍ଷା, ମହିଳା ଏବଂ ଶିଶୁ କଲ୍ୟାଣ, ସଂସ୍କୃତି, ପର୍ଯ୍ୟଟନ ଏବଂ ଜନସେବା ବିଭାଗର ମନ୍ତ୍ରୀ ଅଟନ୍ତି ଏବଂ ଅରବିନ୍ଦ କେଜ୍ରିୱାଲଙ୍କର ଅତିଶୀଙ୍କ ଉପରେ ବହୁତ ବିଶ୍ୱାସ ରହିଛି। ଏଥି ସହିତ, ଆତିଶୀ ଜଳ ଏବଂ ପିଡ୍ଳ୍ଚଡିର ମନ୍ତ୍ରାଳୟ ମଧ୍ୟ ସମ୍ଭାଳିଛନ୍ତି। ଅତିଶୀ ଅରବିନ୍ଦ କେଜ୍ରିୱାଲଙ୍କ ଗୁଡ୍ ବୁକ୍ରେ ମଧ୍ୟ ଅଛନ୍ତି। ଏହି କାରଣରୁ ଆତିଶୀଙ୍କ ନାଁ ମଧ୍ୟ ମୁଖ୍ୟମନ୍ତ୍ରୀ ପଦ ପାଇଁ ସାମ୍ନାକୁ ଆସୁଛି।
ସୌରଭ ଭରଦ୍ବାଜ:
ସୌରଭ ଭରଦ୍ୱାଜ ଦିଲ୍ଲୀ ବିଧାନସଭାରେ ଗ୍ରେଟର କୈଳାଶ ନିର୍ବାଚନମଣ୍ଡଳୀରୁ ପ୍ରତିନିଧିତ୍ୱ କରୁଛନ୍ତି। ସେ ମାର୍ଚ୍ଚ ୨୦୨୩ ରୁ ଦିଲ୍ଲୀ ଜଳ ବୋର୍ଡର ଚେୟାରମ୍ୟାନ୍ ତଥା ସ୍ୱାସ୍ଥ୍ୟ, ନଗର ଉନ୍ନୟନ ଏବଂ ଜଳ ମନ୍ତ୍ରୀ ଥିଲେ। ୮ ଅଗଷ୍ଟ ୨୦୨୩ରେ, ସେ ତାଙ୍କ ପଦବୀରୁ ବହିଷ୍କୃତ ହୋଇଥିଲେ ଏବଂ ତାଙ୍କ ମନ୍ତ୍ରଣାଳୟ ପିଡବ୍ଳୁଡି ଆତିଶୀଙ୍କୁ ଦିଆଯାଇଥିଲା । ଏଥି ସହିତ ସେ ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ମୁଖ୍ୟ ମୁଖପାତ୍ର ମଧ୍ୟ ଅଟନ୍ତି। କୁହାଯାଉଛି ଯେ, ସୌରଭ କିମ୍ବା ଆତିଶୀଙ୍କ ମଧ୍ୟରୁୁ ଜଣଙ୍କୁ ଦିଲ୍ଲୀରେ ସିଏମ୍ ପଦ ଦିଆଯାଇପାରେ।
ସୁନିତା କେଜ୍ରିଓ୍ବାଲ:
ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନୀତାଙ୍କ ନାଁ ମଧ୍ୟ ଏହି ଦୌଡ଼ରେ ଆଗରେ ଆସୁଛି କିନ୍ତୁ କୁହାଯାଉଛି ଯେ, ବର୍ତ୍ତମାନ ଅରବିନ୍ଦ କେଜ୍ରିୱାଲ ଜେଲରୁ ବାହାରିବା ପରେ ସୁନୀତା ପୁଣି ଥରେ ରାଜନୀତିରୁ ଓହରିପାରନ୍ତି ଏବଂ ଅରବିନ୍ଦ କେଜ୍ରିୱାଲ ଆଗକୁ ଆସିପାରନ୍ତି। ଏଭଳି ପରିସ୍ଥିତିରେ ସୁନୀତା କେଜ୍ରିୱାଲଙ୍କ ମୁଖ୍ୟମନ୍ତ୍ରୀ ହେବାର ସମ୍ଭାବନା ବହୁତ କମ୍ ବୋଲି କୁହାଯାଉଛି।
