ନୂଆଦିଲ୍ଲୀ ୦୧/୦୪: ନୋଏଡାର ଜଣେ ବ୍ୟକ୍ତିଙ୍କ ନିକଟକୁ ଅଟୋ ଭଡ଼ା ବାବଦକୁ ଆସିଛି ସାଢ଼େ ୭ କୋଟିରୁ ଅଧିକ ଟଙ୍କାର ବିଲ୍ । ଉବର କମ୍ପାନୀ ପକ୍ଷରୁ ଦୀପକ ତେଙ୍ଗୁରିଆ ଏକ ଅଟୋ ଭଡ଼ା ବାବଦ ୬୨ ଟଙ୍କା ବଦଳରେ ୭.୬୬ କୋଟି ଟଙ୍କାର ବିଲ୍ ପାଇଛନ୍ତି । ଏଥିଯୋଗୁ ଦୀପକଙ୍କ ସମେତ ସମ୍ପୃକ୍ତ ଅଟୋ ଚାଳକ ଏବଂ କମ୍ପାନୀ ମଧ୍ୟ ଚକିତ ହୋଇଯାଇଥିଲେ । ଏ ନେଇ ଦୀପକଙ୍କ ସାଙ୍ଗ ଆଶିଷ ମିଶ୍ର ଏକ୍ସରେ ଏକ ଭିଡିଓ ପୋଷ୍ଟ କରିଛନ୍ତି । ଏଥିରେ ଦୁଇ ବନ୍ଧୁ ଉକ୍ତ ଭଡ଼ା ବାବଦରେ କଥା ହେଉଥିବା ଦେଖିବାକୁ ମିଳିଛି ।
ପୋଷ୍ଟରେ କ୍ୟାପ୍ସନରେ ଲେଖାଯାଇଛି, ‘ସକାଳୁ ସକାଳୁ ଉବର କମ୍ପାନୀ ଦୀପକଙ୍କୁ ଏତେ ଧନୀ କରିଦେଇଛି ଯେ ସେ ଉବରର ଏକ ଶାଖା କିଣିବାକୁ ବିଚାର କରୁଛନ୍ତି । ସବୁଠୁ ମଜାଦାର କଥା ହେଲା ଉକ୍ତ ଟ୍ରିପ୍ ଏ ପର୍ଯ୍ୟନ୍ତ ବାତିଲ ମଧ୍ୟ ହୋଇନାହିଁ । ୬୨ ଟଙ୍କାର ଅଟୋ ବୁକ୍ କରି ତୁରନ୍ତ କୋଟିପତି ଋଣୀ ବନନ୍ତୁ’ । ଦୀପକ ତାଙ୍କ ଫୋନ୍ ସ୍କ୍ରିନ୍କୁ କ୍ୟାମେରାରେ ଦେଖାଇଛନ୍ତି । ଏଥିରେ ଦେଖାଯାଇଛି ଯେ, ଟ୍ରିପ୍ ପାଇଁ ତାଙ୍କୁ ୧ କୋଟି ୬୭ ଲକ୍ଷ ୭୪ ହଜାର ୬୪୭ ଟଙ୍କା ବିଲ୍ ଆସିଛି । ଅତିରିକ୍ତ ଭାବେ ପ୍ରତୀକ୍ଷା ସମୟ ପାଇଁ ତାଙ୍କୁ ୫ କୋଟି ୯୯ ଲକ୍ଷ ୯ ହଜାର ୮୯ ଟଙ୍କା ବିଲ୍ ମିଳିଛି । ଏଥିରେ ତାଙ୍କୁ ୭୫ ଟଙ୍କା ପ୍ରମୋସନାଲ ଡିସ୍କାଉଣ୍ଟ ଦିଆଯାଇଛି ।
सुबह-सुबह @Uber_India ने @TenguriyaDeepak को इतना अमीर बना दिया कि Uber की फ्रैंचाइजी लेने की सोच रहा है अगला. मस्त बात है कि अभी ट्रिप कैंसल भी नहीं हुई है. 62 रुपये में ऑटो बुक करके तुरंत बनें करोडपति कर्ज़दार. pic.twitter.com/UgbHVcg60t
— Ashish Mishra (@ktakshish) March 29, 2024
ଦୀପକ ମଜାରେ କହିଛନ୍ତି, ଏହା ପୂର୍ବରୁ ସେ କେବେ ଏତେ ମାତ୍ରାରେ ଶୂନର ସାମ୍ନା କରି ନ ଥିଲେ । ଏଥିରେ ଆଶିଷ କହୁଛନ୍ତି, ‘କ’ଣ ତୁମେ ମଙ୍ଗଳ ଗ୍ରହରୁ ଆସୁଛ କି? ଯଦି ଆପଣ ଚନ୍ଦ୍ରଯାନ ପାଇଁ ଯାତ୍ରା ବା ଟ୍ରିପ୍ ବୁକ୍ କରିଥା’ନ୍ତେ ତେବେ ବି ଏତେ ଟଙ୍କା ଭଡ଼ା ଲାଗି ନ ଥା’ନ୍ତା ।’ ଏହି ପୋଷ୍ଟରେ ଅନେକେ ସୋସିଆଲ ମିଡିଆ ୟୁଜର ଅନେକ ମଜାଳିଆ କମେଣ୍ଟ ପୋଷ୍ଟ କରିଛନ୍ତି ।
