ବାଲେଶ୍ୱର,୦୨/୦୬: ତାରିଖ ଜୁନ୍ ୨ । ସମୟ ସନ୍ଧ୍ୟା ୭ । ସ୍ଥାନ ବାହାନଗା ରେଳ ଷ୍ଟେସନ । ବାଲେଶ୍ୱରରୁ ଭଦ୍ରକ ଅଭିମୁଖେ ଯାଉଥିଲା କରମଣ୍ଡଳ ଏକ୍ସପ୍ରେସ। ଯାନ୍ତ୍ରିକ ତ୍ରୁଟି ପାଇଁ ବାହାନଗା ରେଳ ଷ୍ଟେସନରେ ଲୁପ୍ ଲାଇନରେ ଛିଡ଼ା ହୋଇଥିବା ଏକ ମାଲବାହୀ ଟ୍ରେନ୍କୁ ଧକ୍କା ଦେଇଥିଲା । ଦୁର୍ଘଟଣା ଏତେ ଜୋରରେ ହୋଇଥିଲା ଯେ କରମଣ୍ଡଳର କିଛି ଡବା ରେଳ ଲାଇନରୁ ବାହାରକୁ ଛିଟ୍କି ପଡ଼ିଥିଲା । ଫଳରେ ଦୁର୍ଭାଗ୍ୟବଶତଃ ସେହି ସମୟରେ ଭଦ୍ରକରୁ ବାଲେଶ୍ୱର ଅଭିମୁଖେ ବିପରୀତ ରେଳ ଧାରଣାରେ ଯାଉଥିବା ବେଙ୍ଗାଲୁରୁ-ହାଓଡ଼ା ଏକ୍ସପ୍ରେସ ମଧ୍ୟ ଦୁର୍ଘଟଣାଗ୍ରସ୍ତ ହୋଇଥିଲା । ଯାହାକି ଭାରତ ସମେତ ପୃଥିବୀର ସବୁଠୁ ବଡ଼ ଟ୍ରେନ୍ ଦୁର୍ଘଟଣା ବୋଲି ଅଭିହିତ କରାଯାଇଛି ।
ଏହା ଭିତରେ ବାହାନଗା ଟ୍ରେନ୍ ଦୁର୍ଘଟଣାକୁ ପୂରିଛି ବର୍ଷେ । ଲୌହ ଦାନବର ରକ୍ତ ଭୋଜି କଥା ମନେ ପଡ଼ିଲେ ଏବେ ବି ଲୋମ ଟାଙ୍କୁରି ଉଠିଛି । ଏହି ଦୁଃଖଦ ଘଟଣା କେବଳ ଭାରତ କାହିଁକି ତମାମ ବିଶ୍ୱବାସୀଙ୍କ ଆଖିରେ ଲୁହ ଭରି ଦେଇଥିଲା । ଏହି ମର୍ମନ୍ତୁଦ ଦୁର୍ଘଟଣାରେ ଲିଭିଯାଇଥିଲା ୨୯୬ ଜଣଙ୍କ ଜୀବନ ଦୀପ । ୧୨ଶହରୁ ଊଦ୍ଧ୍ୱର୍ ଯାତ୍ରୀ ଆହତ ହୋଇଥିଲେ । ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ପ୍ରଧାନମନ୍ତ୍ରୀ, ସମସ୍ତ ରାଜନୈତିକ ଦଳର ନେତା ଏଠାକୁ ଆସିବା ସହ ସମବେଦନା ଜଣାଇଥିଲେ । କେନ୍ଦ୍ର ଓ ରାଜ୍ୟ ସରକାର ପକ୍ଷରୁ ବିଭିନ୍ନ ପ୍ରତିଶ୍ରୁତି ଦିଆଯାଇଥିଲା । ତେବେ ସବୁ ପ୍ରତିଶ୍ରୁତି ପ୍ରତାରଣା ପାଲଟିଛି । ବର୍ଷକ ତଳର ସେହି ଛାତିଥରା ଦୁର୍ଘଟଣାକୁ ନେଇ ‘ପ୍ରମେୟ’ର ସ୍ୱତନ୍ତ୍ର ଉପସ୍ଥାପନା ।
�ସ୍ୱପ୍ନ ପାଲଟିଛି ଫ୍ଲାଏଓଭର ଏହି ଦୁର୍ଘଟଣା ପରେ ଦୁର୍ଘଟଣାସ୍ଥଳକୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଆସିଥିଲେ । ଘଟଣା ସ୍ଥଳରେ ନିଜେ ରହିବା ସହ ଉଦ୍ଧାର କାର୍ଯ୍ୟକୁ ତଦାରଖ କରିଥିଲେ । ପରେ ଏଠାରେ ବିଭିନ୍ନ ଉନ୍ନତିମୂଳକ କାର୍ଯ୍ୟ କରିବା ପାଇଁ ପ୍ରତିଶ୍ରୁତି ଦେଇଥିଲେ । ବାହାନାଗା-ଗୋପାଳପୁର ରାସ୍ତା ଦେଇ ଯାଇଥିବା ରେଳ ଲାଇନ ଉପରେ ଫ୍ଲାଏଓଭର ନିର୍ମାଣ କରିବା ଥିଲା ଅନ୍ୟତମ । ୧ କୋଟି ଟଙ୍କା ବ୍ୟୟର ଏହି କାମ ଖୁବ ଶୀଘ୍ର କରାଯିବ ବୋଲି ସେ ପ୍ରତିଶ୍ରୁତି ଦେଇଥିଲେ । ମାତ୍ର ଏବେବି ସେହି କାମ ଆରମ୍ଭ ହୋଇନି । ଟ୍ରେନ୍ ଚଳାଚଳ ପାଇଁ ଫାଟକ ବନ୍ଦ ରହୁଥିବାରୁ ବାହାନଗା-ଗୋପାଳପୁର ରାସ୍ତାରେ ଯିବା ଆସିବା କରୁଥିବା ଲୋକଙ୍କ ସହ ଆମ୍ବୁଲାନ୍ସ, ଦମକଳ ଗାଡ଼ି ଭଳି ଜରୁରିକାଳୀନ ସେବାରେ ନିୟୋଜିତ ଗାଡ଼ି ଅଟକି ରହୁଛି ।
�ରାସ୍ତା ମରଣଯନ୍ତା ଦୁର୍ଘଟଣା ପରେ ବାହାନଗାରୁ ଗୋପାଳପୁର ଏବଂ ଷ୍ଟେସନକୁ ଯାଇଥିବା ରାସ୍ତା ଅଧିକ କ୍ଷୟକ୍ଷତି ହୋଇଥିଲା । ଏହି ରାସ୍ତାକୁ ତୁରନ୍ତ ମରାମତି କରଯିବ ବୋଲି ପ୍ରତିଶ୍ରୁତି ମିଳିଥିଲା । ଏହାରି ଭିତରେ ଗୋଟିଏ ବର୍ଷ ବିତିଯାଇଥିଲେ ହେଁ ରାସ୍ତାର ଉନ୍ନତୀକରଣ ହୋଇନି । ରାସ୍ତା ମରଣଯନ୍ତା ପାଲଟିଛି । ଏଥିପାଇଁ କେହି ବି ଗୁରୁତ୍ୱ ଦେଉନାହାନ୍ତି ।
�କେବେ ହେବ ଷ୍ଟେସନ ନବୀକରଣ ଦୁର୍ଘଟଣା ପରେ ବାହାନଗା ରେଳ ଷ୍ଟେସନକୁ ଏକ ମଡେଲ ଷ୍ଟେସନ କରାଯିବ ବୋଲି ରେଳମନ୍ତ୍ରୀ ଶ୍ରୀ ବୈଷ୍ଣବ ପ୍ରତିଶ୍ରୁତି ଦେଇଥିଲେ । ଏହି ଷ୍ଟେସନରେ ବିଭିନ୍ନ ଅତ୍ୟାଧୁନିକ ସୁବିଧା ରହିବ ବୋଲି ମଧ୍ୟ କହିଥିଲେ । ମାତ୍ର ଏଯାଏ ଏହି କାମ ହୋଇନି । ଏବେ ବି ପୁରୁଣା ଆଜବେଷ୍ଟସ୍ ଷ୍ଟେସନରେ ଲାଗିଛି । ଷ୍ଟେସନର ବିଭିନ୍ନ ସମସ୍ୟା ରହିଛି । ସେଥିମଧ୍ୟରୁ ପାନୀୟ ଜଳ ଅବ୍ୟବସ୍ଥା ମୁଖ୍ୟ ସମସ୍ୟା ପାଲଟିଛି ।
�ହେଲାନି ଆଲୋକୀକରଣ ଦୁର୍ଘଟଣା ପରେ ଏହି ଅଞ୍ଚଳରେ ଭୟର ବାତାବରଣ ଖେଳିଯାଇଥିଲା । ସଞ୍ଜ ହେଲେ ସ୍ଥାନୀୟ ଲୋକେ ଘରୁ ବାହାରିବାକୁ ଡରୁଥିଲେ । ଏହାକୁ ଦୃଷ୍ଟିରେ ରଖି ଉକ୍ତ ଅଞ୍ଚଳକୁ ଆଲୋକୀକରଣ କରାଯିବ ବୋଲି ରେଳ ବିଭାଗ ପକ୍ଷରୁ ପ୍ରତିଶ୍ରୁତି ମିଳିଥିଲା । ଏହି ବର୍ଷକ ଭିତରେ କେବଳ ସେହି ଅଞ୍ଚଳରେ ମାତ୍ର ୨ଟି ଷ୍ଟ୍ରିଟ୍ ଲାଇଟ୍ ଲଗାଯାଇଛି । ଅଧିକାଂଶ ଦିନ ଏହା ଜଳୁନଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଅପେକ୍ଷାରେ ମଡେଲ ସ୍କୁଲ, ଅତ୍ୟାଧୁନିକ ହସ୍ପିଟାଲ୍ ଏହି ଦୁର୍ଘଟଣା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଠାରେ ଏକ ମଡେଲ ସ୍କୁଲ ନିର୍ମାଣ କରିବାକୁ ପ୍ରତିଶ୍ରୁତି ଦେଇଥିଲେ । ରେଳମନ୍ତ୍ରୀ ବାହାନଗା ହସ୍ପିଟାଲକୁ ମଧ୍ୟ ଉନ୍ନତ ହସ୍ପିଟାଲ କରିବାକୁ କହିଥିଲେ । ଏଥିପାଇଁ ୧ କୋଟି ଟଙ୍କା ଦେବେ ବୋଲି ପ୍ରତିଶ୍ରୁତି ଦେଇଥିଲେ । ମାତ୍ର ବର୍ଷକ ଭିତରେ ଏହି ଦୁଇ ପ୍ରକଳ୍ପ କାମରେ ଆସିନି । ମୁଖ୍ୟମନ୍ତ୍ରୀ ନିଜ ପ୍ରତିଶ୍ରୁତି ମୁତାବକ ୧ କୋଟି ୭୫ ଲକ୍ଷ ୮୮ ହଜାର ଟଙ୍କା ବ୍ୟୟରେ ମଡେଲ ସ୍କୁଲ ନିର୍ମାଣ କରୁଛନ୍ତି। ଏହି କାମର ବିଳମ୍ବକୁ ନେଇ ଅସନ୍ତୋଷ ତେଜୁଛି । ତେବେ କାମର ୭୦ ପ୍ରତିଶତ ସରିଥିବା ବେଳେ ସ୍କୁଲ ଖୋଲିବା ପୂର୍ବରୁ କାମ ଶେଷ ହେବ ବୋଲି କୁହାଯାଉଛି । ଅପରପକ୍ଷରେ କେନ୍ଦ୍ର ପକ୍ଷରୁ ମିଳିଥିବା ପ୍ରତିଶ୍ରୁତି ମୁତାବକ ହସ୍ପିଟାଲ କାମ ଆରମ୍ଭ ହୋଇନି ।
� ଶୀତଳ ପଡ଼ିଛି ତଦନ୍ତ ଏହି ଘଟଣା ବିଶ୍ୱବାସୀଙ୍କ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା । କେଉଁଥିପାଇଁ ଏହି ଘଟଣା ଘଟିଲ? ଏହି ଘଟଣାରେ କେଉଁମାନେ ଜଡ଼ିତ? ତାହାକୁ ନେଇ ବିଶ୍ୱବାସୀ ଚାହିଁ ରହିଛନ୍ତି । ଏହି ଦୁର୍ଘଟଣାର ଗୁରୁତ୍ୱକୁ ଅନୁଭବ କରି ପ୍ରଥମରୁ ସିବିଆଇକୁ ତଦନ୍ତ ଭାର ଦିଆଯାଇଥିଲା । ସିବିଆଇ ଘଟଣାର ତଦନ୍ତ କରି ବରିଷ୍ଠ ସିଗ୍ନାଲ ଇଞ୍ଜିନିୟର ଅରୁଣ କୁମାର ମହନ୍ତ, ସିନିୟର ସେକ୍ସନ ଅଫିସର(ସିଗ୍ନାଲ) ଅମୀର ଖାନ, ଟେକ୍ନିସିଆନ ପପୁ କୁମାର ଯାଦବ ପ୍ରମୁଖଙ୍କୁ ଗିରଫ କରିଥିଲା । ପରେ ଅନ୍ୟ ୪ ଜଣଙ୍କୁ ବି ଗିରଫ କରାଯାଇଥିବା ଶୁଣିବାକୁ ମିଳିଥିଲା । ତେବେ ଏହି ତଦନ୍ତ କୁଆଡ଼େ ଗଲା ତାହାକୁ ନେଇ ବିଭିନ୍ନ ଆଲୋଚନା ହେଉଛି।
