ନୂଆଦିଲ୍ଲୀ,୦୯/୮: ବାଂଲାଦେଶରେ ନୂଆ ସରକାର ଗଠନ ହୋଇଛି। ନୋବେଲ ବିଜେତା ମହମ୍ମଦ ୟୁନୁସଙ୍କ ଏହି ସରକାରର ମୁଖ୍ଯ ପରାମର୍ଶଦାତା ଭାବେ ଶପଥ ନେଇଛନ୍ତି। ଶାନ୍ତି ପାଇଁ ସମସ୍ତଙ୍କୁ ଆହ୍ବାନ ଦେଇଛନ୍ତି ୟୁନୁସ। କେହି ବି ହିଂସାକାଣ୍ଡ କରନ୍ତୁ ନାହିଁ ବୋଲି ସେ ଅନୁରୋଧ କରିଛନ୍ତି। ଏବେ ଦେଶ ଗଠନର ସମୟ ବୋଲି କହିଛନ୍ତି ୟୁନୁସ।

ଦେଶକୁ  ପ୍ରଥମ ସମ୍ବୋଧନରେ ୟୁନୁସ କହିଛନ୍ତି ଯେ, ଯେଉଁମାନେ ଅରାଜକତା ବିସ୍ତାର କରନ୍ତି ସେମାନେ ଆଇନ ପ୍ରଣୟନକାରୀ ସଂସ୍ଥାର ସମ୍ପୂର୍ଣ୍ଣ ଶକ୍ତିକୁ ସାମ୍ନା କରିବାକୁ ପ୍ରସ୍ତୁତ ରୁହନ୍ତୁ। ଷଡଯନ୍ତ୍ରକାରୀମାନେ ଛାତ୍ର-ଜନତାଙ୍କ ମଧ୍ୟରେ ବିଦ୍ରୋହ ସୃଷ୍ଟି କରି ଦେଶରେ ଅରାଜକତା ଏବଂ ଭୟର ବାତାବରଣ ଉପୁଜାଇଛନ୍ତି। ଅରାଜକତା ଆମର ଶତ୍ରୁ, ଏବଂ ଏହାକୁ ଶୀଘ୍ର ପରାସ୍ତ କରିବାକୁ ହେବ।

ହିଂସାଗ୍ରସ୍ତ ବାଂଲାଦେଶରେ ଗତକାଲି ନୂଆ ସରକାର ଗଠନ ହୋଇଛି। ନୋବେଲ ବିଜେତା ମହମ୍ମଦ ୟୁନୁସ ଏହି ଅନ୍ତରୀଣ ସରକାରର ନୂଆ ମୁଖ୍ୟ ହୋଇଛନ୍ତି। ସେ ଅନ୍ତରୀଣ ସରକାରର ମୁଖ୍ୟ ପରାମର୍ଶଦାତା ଭାବେ ଗତକାଲି ଶପଥ ନେଇଛନ୍ତି। ବଙ୍ଗଭବନରେ ଆୟୋଜିତ ଶପଥ ଗ୍ରହଣ କାର୍ଯ୍ୟକ୍ରମରେ ଗତକାଲି ରାଷ୍ଟ୍ରପତି ମହମ୍ମଦ ସାହାବୁଦ୍ଦିନ ତାଙ୍କୁ ଶପଥ ପାଠ କରାଇଛନ୍ତି। ୟୁନୁସଙ୍କ ସହ  ଅନ୍ୟ ୭ ଜଣ ନେତା ମଧ୍ୟ ଶପଥ ନେଇଛନ୍ତି। ବାଂଲାଦେଶ ଜାତୀୟ ସଂଗୀତ ସହ ଶପଥ ଗ୍ରହଣ ଉତ୍ସବ କାର୍ଯ୍ୟକ୍ରମ ଆରମ୍ଭ ହୋଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟୁନୁସଙ୍କୁ ଅଭିନନ୍ଦନ ଜଣାଇଛନ୍ତି ଏବଂ ବାଂଲାଦେଶରେ ଶାନ୍ତି ଓ ପ୍ରଗତି ପାଇଁ ମିଳିତ ଭାବେ କାମ କରିବାକୁ ଆଶ୍ବସ୍ତ କରିଛନ୍ତି। ସେପଟେ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଦେଶ ଛାଡ଼ିଥିଲେ ମଧ୍ଯ ବାଂଲାଦେଶରେ ଏବେ ବି ହିଂସାକାଣ୍ଡ ଜାରି ରହିଛି। ଆୱାମି ଲିଗ୍ ର ନେତାଙ୍କୁ ଟାର୍ଗେଟ କରି ହତ୍ଯା କରାଯାଉଥିବାରୁ ଚିନ୍ତା ପ୍ରକାଶ ପାଇଛି। ହସିନା ଏଯାଏ ତାଙ୍କର ଭବିଷ୍ଯତ ନେଇ କିଛି ନିଷ୍ପତ୍ତି ନେଇ ନାହାନ୍ତି। ସେ ଏବେ ଭାରତରେ ଅଛନ୍ତି। କେଉଁ ଦେଶକୁ ଯିବେ,କେଉଁ ଦେଶରେ ରାଜନୈତିକ ଶରଣ ନେବେ, ତାହା ସ୍ପଷ୍ଟ ହୋଇନାହି।