ବାଙ୍କୀ, ୧୩/୦୯ : ନିଶାଶକ୍ତ ଅବସ୍ଥାରେ ଦୁଇ ଯୁବକଙ୍କ ମଧ୍ୟରେ ମାରପିଟ୍। ଜଣେ ମୃତ। କଟକ ଜିଲ୍ଲା ବାଙ୍କୀ ଥାନା ଅନ୍ତର୍ଗତ ବ୍ରାହ୍ମଣୀଆ ଗାଁରେ ଏଭଳି ଘଟଣା ଘଟିଛି। ମୃତକ ଜଣଙ୍କ ହେଉଛନ୍ତି କାବୁ ଭୋଇ । ବାଙ୍କୀ ଥାନାରେ ଏନେଇ ଏତଲା ଦିଆଯାଇଛି । ପୋଲିସ ସଂପୃକ୍ତ ମୁନା ନାଏକକୁ ଗିରଫ କରିଛି।
ସୂଚନାନୁଯାୟୀ, ଗତ ସୋମବାର ରାତିରେ ବ୍ରାହ୍ମଣୀଆ ଗ୍ରାମର ମୁନା ନାଏକ ଓ କାବୁ ଭୋଇ ସାଥୀ ହୋଇ ମଦ ପିଆପିଇ ହେଇଥିଲେ । ନିଶାଶକ୍ତ ଅବସ୍ଥାରେ ଦୁଇ ଜଣଙ୍କ ମଧ୍ୟରେ ପାଟିତୁଣ୍ଡ ହେବା ସହ ମାରପିଟ୍ ହେଇଥିଲେ । ମୁନା ନାଏକ କାବୁ ଭୋଇର ପଛପଟକୁ ମଦ ବୋତଲ ପିଟି ଦେଇଥିଲା । ଏନେଇ ଖବର ପାଇ ପରିବାର ଲୋକେ ଅମ୍ୱଲାନ୍ସ ଯୋଗେ ତାଙ୍କୁ କଟକ ବଡ ଡାକ୍ତରଖାନାକୁ ନେଇ ଯାଇଥିଲେ। ସେଠାରେ କାବୁ ଭୋଇଙ୍କ ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ। ଏନେଇ ପରିବାର ଲୋକେ ବାଙ୍କୀ ଥାନାରେ ଏତଲା ଦେବାପରେ ପୋଲିସ ଘଟଣାରେ ସଂପୃକ୍ତ ମୁନା ନାଏକକୁ ଗିରଫ କରିବା ସହ ତଦନ୍ତ ଚଳାଇଛି।
