ନୂଆଦିଲ୍ଲୀ, ୩୧।୮: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯିବ ମଲ୍ଟି ଫର୍ମାଟ ସିରିଜ୍ । ବିସିସିଆଇ ଘୋଷଣା କଲା ଭାରତୀୟ ଟିମ୍ । ଟିମ୍‌ରେ ସାମିଲ ହେଲେ ପୂର୍ବତନ ଖେଳାଳି ତଥା କୋଚ୍ ରାହୁଲ ଦ୍ରାବିଡ଼ଙ୍କ ୧୮ ବର୍ଷିୟ ପୁଅ ସମିତ ଦ୍ରାବିଡ଼ । 

ସମିତ ଟିମ୍ ଇଣ୍ଡିଆର ଅଣ୍ଡର-୧୯ ସ୍କ୍ୱାର୍ଡରେ ଡେବ୍ୟୁ କରିବେ । ଭାରତର ଅଣ୍ଡର-୧୯ ଟିମ୍ ଅଷ୍ଟ୍ରେଲିଆ ସହ ୱାନଡ଼େ ଏବଂ ଚାରି ଦିବସୀୟ ମ୍ୟାଚ୍ ଖେଳିବାକୁ ରହିଛି । ଏହି ଦୁଇଟି ଫର୍ମାଟରେ ସମିତଙ୍କୁ ଖେଳିବାର ସୁଯୋଗ ମିଳିଛି । ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯିବାକୁ ଥିବା ଏହି ସିରିଜ୍ ୨୧ ସେପ୍ଟେମ୍ବରରୁ ଆରମ୍ଭ ହେବ । ଯାହା ଅକ୍ଟୋବର ୧୦ ଯାଏ ଚାଲିବ । ଜୁନିଅର ଚୟନ କମିଟି ଅଷ୍ଟ୍ରେଲିଆ ଅଣ୍ଡର-୧୯ ବିପକ୍ଷରେ ଆଗାମୀ ମଲ୍ଟି ଫର୍ମାଟ୍ IDFC ଫାଷ୍ଟ ବ୍ୟାଙ୍କ ଘରୋଇ ସିରିଜ୍ ପାଇଁ ଇଣ୍ଡିଆ ଅଣ୍ଡର-୧୯ ଦଳ ଚୟନ କରିଛି । 

ସିରିଜରେ ୩ଟି ୫୦ ଓଭର ମ୍ୟାଚ୍ ଏବଂ ଦୁଇଟି ୪ ଦିନିଆ ମ୍ୟାଚ୍ ପୁଡୁଚେରୀ ଏବଂ ଚେନ୍ନାଇରେ ଖେଳାଯିବ । ଅଷ୍ଟ୍ରେଲିଆ ବିପକ୍ଷ ODI ସିରିଜରେ ଭାରତର ଅଣ୍ଡର-୧୯ ଟିମ୍‌ର ଅଧିନାୟକ ହେବେ ୟୁପିର ଷ୍ଟାର ବ୍ୟାଟ୍ସମ୍ୟାନ୍ ମହମ୍ମଦ ଅମାନ । ଅନ୍ୟପଟେ ଚାରି ଦିନିଆ ସିରିଜରେ ମଧ୍ୟପ୍ରଦେଶର ସୋହମ୍ ପାଟୱରାନ୍ ଭାରତୀୟ ଦଳର ନେବେ ନେତୃତ୍ୱ । ତେବେ ଯଦି ରାହୁଲ ଦ୍ରାବିଡ଼ଙ୍କ ପୁଅ ସମିତ ଦ୍ରାବିଡଙ୍କ କଥା କହିବା ତେବେ ସେ ଏହା ପୂର୍ବରୁ ମହାରାଜ ଟ୍ରଫି KSCA ଟି-୨୦ରେ ଖେଳି ସାରିଛନ୍ତି । ତାଙ୍କୁ ୫୦ ହଜାର ଟଙ୍କାରେ କିଣିଥିଲା ଟିମ୍ ।