ନୂଆଦିଲ୍ଲୀ,୧୭/୦୩: ସାଧାରଣ ନିର୍ବାଚନକୁ ନେଇ ବିଦେଶରେ ଆଇପିଏଲ୍ର ଦ୍ୱିତୀୟ ଭାଗ ଆୟୋଜନ କରିବା ନେଇ ଚାଲିଥିବା ଆଲୋଚନାର ଅନ୍ତ ଘଟିଛି । ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟ ଭାରତରେ ଆୟୋଜନ କରାଯିବ ବୋଲି ବିସିସିଆଇ ସମ୍ପାଦକ ଜୟ ଶାହା ଘୋଷଣା କରିଛନ୍ତି । ମାର୍ଚ୍ଚ ୨୨ରୁ ଏପ୍ରିଲ୍ ୭ ତାରିଖ ମଧ୍ୟରେ ମୋଟ୍ ୨୧ଟି ଲିଗ୍ ମ୍ୟାଚ୍ ପାଇଁ କ୍ରୀଡ଼ାସୂଚୀ ଘୋଷଣା କରା ଯାଇଥିଲା । ଖୁବ୍ ଶୀଘ୍ର ବାକି ମ୍ୟାଚ୍ ପାଇଁ ତାରିଖ ଘୋଷଣା ହେବ ବୋଲି ଶାହ ସ୍ପଷ୍ଟ କରିଦେଇଛନ୍ତି ।
ଶନିବାର ନିର୍ବାଚନ କମିଶନ ପକ୍ଷରୁ ଆଗାମୀ ସାଧାରଣ ନିର୍ବାଚନ ପାଇଁ ଚୂଡ଼ାନ୍ତ ତାରିଖ ଘୋଷଣା କରାଯିବା ମାତ୍ରେ ଆଇପିଏଲ୍ର ଦ୍ୱିତୀୟ ପର୍ଯ୍ୟାୟ ଆୟୋଜନକୁ ନେଇ ଆଲୋଚନା ଜୋରଦାର ହୋଇଥିଲା । ୟୁଏଇରେ ଦ୍ୱିତୀୟ ଭାଗ ଆୟୋଜନ କରିବାକୁ ବିସିସିଆଇ ଯୋଜନା କରୁଥିବା ଖବର ମଧ୍ୟ ଗଣମାଧ୍ୟମରେ ପ୍ରସାରିତ ହୋଇଥିଲା । ଏପରିକି କିଛି ଫ୍ରାଞ୍ଚାଇଜମାନଙ୍କ ଦାବିକୁ ଗ୍ରହଣ କରି ବିସିସିଆଇର କିଛି ସଦସ୍ୟ ଦୁବାଇ ଅଭିମୁଖେ ଯାତ୍ରା କରିଥିବା ଖବର ମଧ୍ୟ ଘୁରି ବୁଲିଥିଲା । ମାତ୍ର ଜୟ ଶାହ ଆୟୋଜନ ସମ୍ପର୍କିତ ତଥ୍ୟ ପ୍ରଦାନ କରି ସବୁ ଉଡ଼ା ଖବରରେ ପୂର୍ଣ୍ଣଛେଦ ପକାଇ ଦେଇଥିଲେ ।
୨୦୧୪ରେ ସାଧାରଣ ନିର୍ବାଚନକୁ ନେଇ ୟୁଏଇ ଆଇପିଏଲ୍ର ପ୍ରଥମ ଭାଗର ୨୦ଟି ମ୍ୟାଚ୍ ଆୟୋଜନ କରାଯାଇଥିଲା । ଏହା ପୂର୍ବରୁ ୨୦୦୯ ସାଧାରଣ ନିର୍ବାଚନ ପାଇଁ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟକୁ ଦକ୍ଷିଣ ଆଫ୍ରିକାରେ ଆୟୋଜନ କରାଯାଇଥିଲା । କରୋନା ମହାମାରୀ ସମୟରେ ମଧ୍ୟ ୟୁଏଇରେ ଆଇପିଏଲ୍ ୨୦୨୦ ଓ ୨୦୨୧ ସିଜନ ଆୟୋଜିତ ହୋଇଥିଲା । ସୂଚନାଯୋଗ୍ୟ, ଏପ୍ରିଲ ୧୯ରୁ ଲୋକସଭା ନିର୍ବାଚନ ଆରମ୍ଭ ହେବ । ମୋଟ୍ ୭ଟି ପର୍ଯ୍ୟାୟରେ ନିର୍ବାଚନ ହେବ ଓ ଜୁନ୍ ୪ତାରିଖରେ ମତଦାନ ଶେଷ ହେବ ।
