ମାଲକାନଗିରି,୨୧/୫ : ଗତ ୨୦୨୧ ମସିହାରେ ମନରେଗାରେ କାର୍ଯ୍ୟ କରୁଥିବା ୧୧୭୩୮ ଜଣ ହିତାଧିକାରୀ କୋଭିଡ ସମୟରେ ୨ମାସର ସେମାନଙ୍କ ପ୍ରୋତ୍ସାହନ ରାଶି ପାଇ ପରି ନଥିଲେ । ସେମାନେ ସୂଚନା ଆଇନ ବଳରେ ୩ ବର୍ଷ ପରେ ୧୧୭୩୮ ଜଣ ହିତାଧିକାରୀ ଫେରି ପାଇଛନ୍ତି ମନରେଗା  ପ୍ରୋତ୍ସାହନ ଟଙ୍କା।

କରୋନା ସମୟରେ ୧.୪.୨୦୨୧ ଠାରୁ ୩୦.୬.୨୦୨୧ ମଧ୍ୟରେ ମନରେଗାରେ କାର୍ଯ୍ୟ କରିଥିବା ଶ୍ରମିକମାନଙ୍କୁ ପ୍ରୋତ୍ସାହନ ରାଶି ବାବଦକୁ  ଦୈନିକ ୫୦ଟଙ୍କା ଲେଖା ଦେବା ପାଇଁ ରାଜ୍ୟସରକାର ଘୋଷଣା କରିଥିଲେ। ଏହି ଟଙ୍କା ପାଇଁ ଶ୍ରମିକମାନେ ପଞ୍ଚାୟତ,ବ୍ଲକ ଅଫିସ କୁ ଯାଇ ଯାଇ କିଛି ସୁଫଳ ନପାଇ ହତାଶ ହୋଇପଡିଥିଲେ। ପ୍ରୋତ୍ସାହନ ରାଶି ପାଇବାରେ ଅନିୟମିତତା ଖବର ପାଇ ଜିଲ୍ଲା ସୂଚନା ଅଧିକାର ପ୍ରବକ୍ତା   ବରିଷ୍ଠ ଆଇନଜୀବୀ ଅଶୋକ କୁମାର ପଟ୍ଟନାୟକ ୧୬.୭.୨୦୨୨ ଓ ୭.୧୨.୨୦୨୨ ରେ ଜିଲ୍ଲା ପରିଷଦ କୁ ତୁରନ୍ତ ସୂଚନା ପ୍ରଦାନ କରିବା ନିମନ୍ତେ ଅନୁରୋଧ କରିଥିଲେ। ଜିଲ୍ଲା ପରିଷଦ ପକ୍ଷରୁ ମାଲକାନଗିରି ଜିଲ୍ଲାର ୭ଟି ବ୍ଲକ କୁ ତଥ୍ୟ ଦେବା ନିମନ୍ତେ ନିର୍ଦ୍ଦେଶ ଦେଇଥିଲେ ମଧ୍ୟ  କୌଣସି ବ୍ଲକ  ତଥ୍ୟ ପ୍ରଦାନ କରିନଥିଲେ। ତଥ୍ୟ ନ ମିଳିବାରୁ ଆଇନଜୀବୀ ଶ୍ରୀ ପଟ୍ଟନାୟକ ୭ଟି ଯାକ ବ୍ଲକ ବିରୋଧରେ ରାଜ୍ୟ ସୂଚନା କମିଶନର ନିକଟରେ ଅଭିଯୋଗ ଦାଖଲ କରିଥିଲେ । ରାଜ୍ୟ ସୂଚନା କମିଶନର ଅଦାଲତ ପକ୍ଷରୁ ସମସ୍ତ ବ୍ଲକ କୁ ତୁରନ୍ତ ତଥ୍ୟ ପ୍ରଦାନ ନିମନ୍ତେ ନିର୍ଦେଶ ଦେଇଥିଲେ। ଏହା ପରେ କୋରକୁଣ୍ଡା ବ୍ଲକର   ତଥ୍ୟ ପ୍ରଦାନ ସନ୍ତୋଷ ଜନକ ନଥିବାରୁ ଆଇନଜୀବୀ  ଶ୍ରୀ ପଟ୍ଟନାୟକ ସୂଚନା କମିଶନର ଓ ବିଡ଼ିଓ ଙ୍କୁ ଜଣାଇଥିଲେ। ପରେ ୧୧୭୩୮ ଜଣ ଶ୍ରମିକଙ୍କୁ ସେମାନଙ୍କ ପ୍ରାପ୍ୟ ଦିଆଯାଇ ନଥିବା କଥା ସ୍ଵୀକାର କରି ଆଜି ୧୧୭୩୮ ଜଣ ଶ୍ରମିକଙ୍କ ୧କୋଟି୯ଲକ୍ଷ ୪୨ହଜାର ଟଙ୍କା ପ୍ରଦାନ ନିମନ୍ତେ ମାଲକାନଗିରି ଷ୍ଟେଟବ୍ୟାଙ୍କ କୁ ବ୍ଲକ ପକ୍ଷରୁ ଉପଦେଶ ପତ୍ର ପଠାଇଛନ୍ତି। ଅନ୍ୟ ବ୍ଲକ ଏପର୍ଯ୍ୟନ୍ତ ତଥ୍ୟ ଦେଇ ନଥିବାରୁ ଏହି ପ୍ରୋତ୍ସାହନ ରାଶି ପ୍ରଦାନ ରେ ବ୍ୟାପକ ଜାଲିଆତି ହୋଇଥିବାର ଆଶଙ୍କା କରି ଜିଲ୍ଲାପାଳ ତଥା ମନରେଗାର ମୁଖ୍ୟ ସଂଯୋଜକଙ୍କୁ ଆଇନ ଜୀବି ଶ୍ରୀ ପଟ୍ଟନାୟକ ଅବଗତ କରି ଏହାର ନିରପେକ୍ଷ ତଦନ୍ତ ପାଇଁ ଦାବିକରିଛନ୍ତି।

ଆହୁରି ପଢନ୍ତୁ : ନେତାଜୀ ସୁବାସ ସେତୁ ଉପରେ ସିରିଜ୍ ଦୁର୍ଘଟଣା : ୨ ବାଇକ, କାରକୁ ଧକ୍କା ଦେଲା ଇନୋଭା, ୨ ଆହତ